သျှမ်းပြည် နမ္မတူမြို့ရှိ အစိုးရအိမ်ရာများတွင် နေထိုင်သည့် ပင်စင်စားနှင့် ကုမ္ပဏီဝန်ထမ်းများကို နေရာပြောင်းရွှေ့ရန် တအာင်း(ပလောင်) အမျိုးသားလွတ်မြောက်ရေးတပ်မတော် TNLA က အကြောင်းကြားလာခဲ့ကြောင်း စုံစမ်းသိရသည်။
ယမန်နေ့ (ဧပြီလ ၂ ရက်)မှ စတင်ပြီး နမ္မတူမြို့ သတ္တုတွင်းရပ်ကွက် (၄)ရှိ အစိုးရအိမ်ရာများတွင် နေထိုင်သည့် ပင်စင်စားနှင့် ကုမ္ပဏီဝန်ထမ်းများကို ၁၀ ရက်အတွင်း နေရာပြောင်းရွှေ့ပေးရန် တအာင်း(ပလောင်)တပ်ဖွဲ့ TNLA က အသိပေး အကြောင်းကြားလာကြောင်း နမ္မတူမြို့ ဒေသခံများက ပြောသည်။
“အိမ်ငှားတဲ့လူတွေကို ဆက်မငှားပေးတော့တာမျိုးပေါ့။ သတ္တုတွင်းနယ်မြေဘက်မှာ ရပ်ကွက်(၁)ကနေ (၇)အထိက အစိုးရမြေတွေလေ။ ဒီဘက်မှာ ပြည်သူပိုင်တဲ့ မြေတွေ မရှိဘူး။ ဒီမှာနေတဲ့ လူတွေက အများအားဖြင့် ကိုယ်ပိုင်အိမ် မရှိကြဘူး။ အခုလို ရွှေ့ခိုင်းတော့ နေစရာမရှိဘူးပေါ့၊ ဘယ်နားသွားနေကြမှာလဲ”ဟု ဖြစ်စဉ်သိရှိသူ နမ္မတူဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
နမ္မတူမြို့ TNLA တပ်ဖွဲ့က ရွှေ့ပြောင်းခိုင်းနေသည့် သတ္တုတွင်း ရပ်ကွက် (၄)ရှိ အစိုးရပိုင်မြေတွင် နေထိုင်နေသည့် ပင်စင်စားဝန်ထမ်းများ၊ ဝင်းမြင့်မိုရ်နှင့် ထွဋ်ထိပ် ဖက်စပ်ကုမ္ပဏီများမှ ဝန်ထမ်းများမှာ အိမ်ထောင်စု ၃၀ ကျော်နှင့် လူဦးရေ (၁၅၀)နီးပါးရှိကြောင်း သိရသည်။
TNLA တပ်ဖွဲ့က နေရာရွှေ့ပြောင်းပေးရန် အကြောင်းကြားလာခြင်းကြောင့် ၎င်းတို့အတွက် နေရာထိုင်ခင်း အခက်အခဲ ဖြစ်နေပြီး အစားထိုး ပြန်လည်နေရာချထားပေးရန် လိုလားကြောင်း နမ္မတူဒေသခံများထံမှ သိရသည်။
“အစိုးရအိမ်ရာမှာပဲ နေလာကြတာ အင်္ဂလိပ်ခေတ်ကတည်းကပဲ။ ပင်စင်စားတွေဆိုတော့ သားသမီးတွေလည်း ရှိလာတော့ မပြန်နိုင်တော့တာမျိုးပေါ့။ တချို့ဆိုရင် အဖီဆွဲပြီးတော့ နေရတာမျိုးတွေတောင် ရှိတယ်။ ပင်စင်စားတွေပဲ ရှိတာမဟုတ်ဘူး၊ ကုမ္ပဏီဝန်ထမ်းတွေလည်း ရှိတယ်”ဟု နမ္မတူမြို့မှ ၎င်းဒေသခံအမျိုးသားက သျှမ်းသံတော်ဆင့်ကို ပြောသည်။
ယခုကဲ့သို့ နမ္မတူမြို့ရှိ ပင်စင်စားဝန်ထမ်းများကို TNLA တပ်ဖွဲ့က နေရာပြောင်းရွှေ့ခိုင်းခြင်းနှင့် ပတ်သက်ပြီး သျှမ်းသံတော်ဆင့်က TNLA သတင်းနှင့် ပြန်ကြားရေးဌာနသို့ ဆက်သွယ်မေးမြန်းခဲ့ရာ လုံခြုံရေးစိုးရိမ်မှုကြောင့် ရွှေ့ပြောင်းခိုင်းခြင်းဖြစ်ကြောင်း ပြန်လည်ဖြေကြားသည်။
“ဒီဝန်ထမ်းတွေကို ရွှေ့ပြောင်းခိုင်းရတဲ့ ရည်ရွယ်ချက်က ဒီတပ်အတွင်းမှာ နေထိုင်ခြင်းသည် သူတို့အတွက် စိုးရိမ်မှုတွေရှိတယ်၊ မလုံခြုံစေတဲ့အတွက်ကြောင့် ကျမတို့ ရွှေ့ပြောင်းခိုင်းတာ ဖြစ်တယ်။ သူတို့ရဲ့ နေရာထိုင်ခင်းကို စီစဉ်ပေးဖို့တော့ ရှိပါတယ်”ဟု TNLA သတင်းနှင့် ပြန်ကြားရေးဌာနမှူးက သျှမ်းသံတော်ဆင့်ကို ပြောသည်။
လက်ရှိ နေရာပြောင်းရွှေ့ခိုင်းနေသည့် သတ္တုတွင်းနယ်မြေရှိ ရပ်ကွက်များသည် TNLA တပ်ဖွဲ့က တိုက်ခိုက်သိမ်းပိုက်ထားသည့် စစ်ကောင်စီတပ် ခမရ-၃၂၄ အနီး တည်ရှိနေကြောင်း သိရသည်။
ပြီးခဲ့သည့် မတ်လ ၃ ရက်တွင်လည်း ၎င်းတပ်ရင်းအနီး မပေါက်ကွဲသေးသည့် စစ်အကြွင်းအကျန် လက်နက်ကြီးကို ယူဆော့ကစားရာမှ ပေါက်ကွဲမှုဖြစ်ပွားပြီး ကလေးတစ်ဦး ပွဲချင်းပြီး သေဆုံး၍ တစ်ဦးဒဏ်ရာပြင်းထန်ခဲ့ကြောင်း နမ္မတူဒေသခံများက ပြောသည်။
