သျှမ်းပြည် နမ္မတူမြို့နယ် ဒေသခံများကို တအာင်း(ပလောင်) အမျိုးသား လွတ်မြောက်ရေးတပ်မတော် (TNLA) ခေါင်းဆောင်များက သွားရောက်တွေ့ဆုံခဲ့ကြောင်း စုံစမ်းသိရသည်။

ယမန်နေ့ (မတ်လ ၁၈ ရက်) နံနက်ပိုင်းတွင် နမ္မတူမြို့ ပန်ဟိုက်ရပ်ကွက်ရှိ မြို့တော်ခန်းမတွင် TNLA တပ်ဖွဲ့မှ အထွေထွေအတွင်းရေးမှူး ဗိုလ်ချုပ်တားဘုန်းကျော်နှင့် အုပ်ချုပ်ရေးတာဝန်ရှိသူများက ဒေသခံပြည်သူများနှင့် လူထုတွေ့ဆုံပွဲ ပြုလုပ်ခဲ့ပြီး ပညာရေး၊ ကျန်းမာရေးနှင့် ဒေသဖွံ့ဖြိုးရေး လုပ်ငန်းများကို ရှင်းလင်းပြောကြားခဲ့ကြောင်း နမ္မတူဒေသခံများက ပြောသည်။

“အခြေအနေ မတည်ငြိမ်သေးတဲ့ အချိန်တော့ စစ်အုပ်ချုပ်ရေး ပုံစံနဲ့ပဲ အုပ်ချုပ်သွားဦးမယ်။ ၂၀၂၅ ကျရင် ဒေသခံပြည်သူတွေ ကိုယ်တိုင်အုပ်ချုပ်နိုင်အောင် ပြင်ဆင်သွားမယ်လို့ ပြောတယ်။ ငြိမ်းချမ်းရေးနဲ့ ပတ်သက်ပြီး ပြည်သူတွေမေးတော့ စစ်ကောင်စီဘက်က တိုက်ပွဲမစရင် သူတို့ဘက်ကတော့ မဖြစ်ဘူး၊ နောက်ပိုင်းလည်း ဆက်ဆွေးနွေးဖို့ ရှိသေးတယ်လို့ ပြောတယ်”ဟု လူထုတွေ့ဆုံပွဲသို့ တက်ရောက်ခဲ့သည့် နမ္မတူဒေသခံတစ်ဦးက သျှမ်းသံတော်ဆင့်ကို ပြောသည်။

နမ္မတူမြို့တွင် ပြုလုပ်ခဲ့သည့် လူထုတွေ့ဆုံပွဲသို့ ဒေသခံ ပြည်သူများနှင့် လူမှုကူညီရေး အသင်းအဖွဲ့များမှ လူဦးရေ (၃၀၀)ခန့် တက်ရောက်ခဲ့ကြောင်း နမ္မတူဒေသခံများထံမှ သိရသည်။

ထို့အပြင် TNLA တပ်ဖွဲ့က နမ္မတူမြို့နယ်တွင် ဖော်ဆောင်နေသည့် အုပ်ချုပ်ရေးယန္တရားများကို ရှင်းပြပြီး မတ်လ (၄)ရက်နေ့က စစ်ကောင်စီမှ နမ္မတူမြို့နယ် အပါအဝင် နမ့်ဆန်နှင့် မန်တုံမြို့နယ်တို့ကို စစ်အုပ်ချုပ်ရေး ကြေညာခဲ့ခြင်းနှင့် ပတ်သက်ပြီး ဖြစ်လာနိုင်သည့် အခြေအနေများကို သတိထား၍ ဂရုစိုက်ရန် လိုအပ်ကြောင်း ပြောကြားခဲ့သည်ဟု သိရသည်။

“နမ္မတူမှာတော့ ရပ်ကွက်နာမည်တွေ ပြန်ပြောင်းထားတယ်။ CDM ဆရာဝန်တွေနဲ့ နမ္မတူဆေးရုံကိုလည်း ပြန်ဖွင့်ထားပေးတယ်။ နမ္မတူမှာ မနိုင်တာကျတော့ နမ့်ဆန်ဆေးရုံကြီးမှာ အထူးကု ထားပေးမယ်။ ဒီလကုန်ရင် နမ့်ဆန်မှာလည်း အထူးကု ဆရာဝန် ရောက်မယ် ပြောတယ်”ဟု နမ္မတူမြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။

လက်ရှိတွင် TNLA တပ်ဖွဲ့က ထိန်းချုပ်ထားသည့် နမ္မတူမြို့ရှိ ပြည်သူ့‌ဆေးရုံတွင် ကျန်းမာရေးဝန်ထမ်း (၁၈)ဦးဖြင့် ပြန်လည်ပတ်နေပြီး ၎င်းတို့အထဲတွင် CDM ဆရာဝန်ကြီးအချို့နှင့်အတူ CDM ပြုလုပ်ထားသည့် ဒေသခံ ကျန်းမာရေးဝန်ထမ်းများ ပါဝင်ကြောင်း မတ်လ(၁၆)ရက်တွင် သတင်းထုတ်ပြန်ထားသည်။

အလားတူ မတ်လ ဒုတိယပတ်က နမ္မတူမြို့နယ်အတွင်း မန်စံကျေးရွာရှိ လျှပ်စစ်ရုံး၊ မီးသတ်ရုံး၊ ဆေးရုံနှင့် ကျောင်း စသည့် ဌာနဆိုင်ရာရုံးများကိုလည်း TNLA တပ်ဖွဲ့မှ မြေယာအဆောက်အဦ အကျယ်အဝန်းများ တိုင်းထွာသတ်မှတ်ခြင်းများ ပြန်လည်ပြုလုပ်ခဲ့ကြောင်း နမ္မတူဒေသခံများက ပြောသည်။