တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ်ရေးထိုးထားသည့် တိုင်းရင်းသားလက်နက်ကိုင် (၇)ဖွဲ့တို့သည် မျက်နှာစုံညီ အစည်းအဝေး ကျင်းပပြီးနောက် စုဖွဲ့မှုပုံစံအသစ်ဖြင့် မဟာမိတ်ဖွဲ့စည်းလိုက်ကြောင်း စုံစမ်းသိရသည်။

မတ်လ ၁၇ ရက်မှ စတင်ပြီး ထိုင်းနိုင်ငံ ချင်းမိုင်မြို့တွင် ကျင်းပနေသည့် NCA လက်မှတ်ရေးထိုးထားသော တိုင်းရင်းသားလက်နက်ကိုင် (၇)ဖွဲ့ 7 NCA-S EAO တို့၏ မျက်နှာစုံညီ အစည်းအဝေး ဒုတိယနေ့ (မတ်လ ၁၈ ရက်)တွင် စုဖွဲ့မှုပုံစံအသစ်ဖြင့် တိုင်းရင်းသားလက်နက်ကိုင် အဖွဲ့အစည်း (၇)ဖွဲ့၏ မဟာမိတ်အဖွဲ့ (7 EAO Alliance) အဖြစ် ပြောင်းလဲဖွဲ့စည်းနိုင်ခဲ့ကြောင်း ကြေညာချက်ထုတ်ပြန်လာသည်။

ယခုပြောင်းလဲဖွဲ့စည်းလိုက်သည့် တိုင်းရင်းသားလက်နက်ကိုင် (၇)ဖွဲ့၏ မဟာမိတ်အဖွဲ့ (7 EAO Alliance) တွင် အဖွဲ့ခေါင်းဆောင်အဖြစ် သျှမ်းပြည် ပြန်လည်ထူထောင်ရေးကောင်စီ RCSS ဥက္ကဋ္ဌ ဗိုလ်ချုပ်ကြီး ယွက်စစ်နှင့် ဒုတိယ အဖွဲ့ခေါင်းဆောင်အဖြစ် မွန်ပြည်သစ်ပါတီ NMSP ဒု-ဥက္ကဋ္ဌ နိုင်အောင်မင်း တို့ကို တာဝန်ပေးအပ်ကြောင်း ထုတ်ပြန်ချက်တွင် ဖော်ပြထားသည်။

ထို့အပြင် ချမှတ်ထားသော လုပ်ငန်းစဉ်များကို ဖော်ဆောင်နိုင်ရေးအတွက်လည်း လက်နက်ကိုင်အဖွဲ့ တစ်ခုချင်းစီမှ ကိုယ်စားပြုတစ်ဦးစီ ပါဝင်သော အတွင်းရေးမှူးအဖွဲ့ကိုလည်း ဖွဲ့စည်းထားသည်။

တိုင်းရင်းသားလက်နက်ကိုင် (၇)ဖွဲ့၏ မဟာမိတ်အဖွဲ့ (7 EAO Alliance) သည် လျင်မြန်စွာ ဖြစ်ပေါ်ပြောင်းလဲနေသည့် နိုင်ငံရေး၊ စစ်ရေး အခြေအနေများကို ဆွေးနွေးပြီးနောက် အားလုံးပါဝင်သော တွေ့ဆုံဆွေးနွေးရေးမှတဆင့် ငြိမ်းချမ်းရေးရရန်နှင့် နိုင်ငံရေးအပြောင်းအလဲများ ဖြစ်ပေါ်လာရန် သက်ဆိုင်သူအားလုံးနှင့် နိုင်ငံရေးဆွေးနွေးပွဲများ ကျင်းပခြင်းတို့ကို ဆောင်ရွက်သွားမည်ဟု ဆိုသည်။

NCA လက်မှတ်ရေးထိုးထားသည့် တိုင်းရင်းသားလက်နက်ကိုင် (၇)ဖွဲ့တို့၏ ယခုပြောင်းလဲလာသည့် စုဖွဲ့မှုပုံစံသစ်သည် မြန်မာ့ငြိမ်းချမ်းရေး လုပ်ငန်းစဉ်တွင် ဦးဆောင်ကူညီ ပံ့ပိုးပေးခဲ့သည့် စဝ်ဟန်ယောင်ဟွေက NCA သည် ပြန်သုံး၍ မရ‌တော့ဘဲ ပျက်စီးသွားပြီဖြစ်ကြောင်း သျှမ်းသံတော်ဆင့်နှင့် သီးသန့်တွေ့ဆုံမေးမြန်းခန်းတွင် ပြောဆိုပြီးနောက် ထွက်ပေါ်လာခြင်း ဖြစ်သည်။