သျှမ်းပြည် ဟိုပုံးမြို့နယ် မဲနယ်တောင်ဒေသ ကျောက္ကဆျာကျေးရွာနေ အမျိုးသားတစ်ဦး အသတ်ခံရကြောင်း စုံစမ်းသိရသည်။
ထိုအသတ်ခံရသည့်အမျိုးသားသည် ပြီးခဲ့သည့် မတ် ၁၆ရက်တွင် ပျောက်ဆုံးခဲ့ပြီး၊ ယမန်နေ့ (မတ် ၁၇)ရက် တွင် ဟိုပုံးမြို့နယ် မဲနယ်တောင်ဒေသ ကျောက္ကဆျာကျေးရွာရှိ မြောင်းထဲတွင် သတ်ဖြတ်ခံရသည့်အလောင်းကို ပြန်တွေ့ခဲ့ကြောင်း ဒေသခံ အမျိုးသမီးတစ်ဦး က သျှမ်းသံတော်ဆင့်ကိုပြောသည်။
“ စနေနေ့ (မတ် ၁၆)ရက်နေ့က ပျောက်သွားတာ။ မနေ့က ပြန်တွေ့တော့ လည်ပင်းလှီးဒဏ်ရာနဲ့ ရွာရဲ့ မြောင်းထဲမှာ ပြန်တွေ့တယ်။ ဘယ်အဖွဲ့ လက်ချက်ဆိုတာတော့မသိဘူး” ဟု ၎င်းအမျိုးသမီးက ဆိုသည်။
ထိုသတ်ဖြတ်ခံရသော အမျိုးသားသည် အသက် ၅၀ ဝန်းကျင်ရှိပြီး၊ ပအိုဝ်းအမျိုးသားအဖွဲ့အစည်း (PNO/PNA) ကို မကြိုက်နှစ်သက်သူတစ်ဦးဖြစ်ကြောင်းလည်း သိရသည်။
ဆီဆိုင်မြို့နယ်နှင့် ဟိုပုံးမြို့နယ် အတွင်းတွင် စစ်ကောင်စီ၊ PNO/PNA ပူးပေါင်းနှင့် ပအိုဝ်း အမျိုးသား လွတ်မြောက်ရေး တပ်မတော် တို့သည် ဇန်နဝါရီ လကုန်ပိုင်းမှစတင်ပြီး တိုက်ပွဲဖြစ်ပွားခဲ့ရာ ယနေ့အချိန်ထိ စစ်ရေးတင်းမာနေသည့် နေရာဖြစ်သည်။
ထိုစစ်ရေးတင်းမာမှုကြား ဆီဆိုင်မြို့နယ်နှင့် ဟိုပုံးမြို့နယ် ဒေသခံများလည်း မကြာခဏ လူပျောက်မှုများ ရှိနေသည်။
ထို့ပြင် ပအိုဝ်း လက်နက်ကိုင် တပ်ဖွဲ့ နှစ်ဖွဲ့ဖြစ်သည့် PNAနှင့် PNLA တို့သည် ဖေဖော်ဝါရီ မှ မတ်လအထိ အရပ်သား ၂၀ဖမ်းဆီးခဲ့သည်။
အဆိုပါ ဖမ်းဆီးခံရသည့် အရပ်သား ၂၀ ဦးထဲတွင် PNLA ဘက်မှ အရပ်သား ၈ ဦးကို ဖမ်းဆီးထိန်းသိမ်းထားပြီး၊ PNA ဘက်မှ အရပ်သား ၁၂ ဦးကို ဖမ်းဆီးထိန်းသိမ်းခဲ့ရာ PNA ဘက်က ၄ဦးပြန်လည်လွတ်ပေးခဲ့ကြောင်း ပအိုဝ်းလူငယ်အစည်းအရုံးမှ တာဝန်ခံ တစ်ဦးက သျှမ်းသံတော်ဆင့်ကို ပြောဆိုခဲ့သည်။
ထို ပအိုဝ်း လက်နက်ကိုင် တပ်ဖွဲ့ (၂)ဖွဲ့ အပြိုင်အဆိုင် ဖမ်းဆီးမှုနှင့် ဒေသခံများပျောက်ဆုံးပြီး သတ်ဖြတ်ခံနေရမှုနှင့် ပတ်သတ်ပြီး ဟိုပုံးမြို့နယ် အတွင်း နေထိုင်သည့် သူများက စိုးရိမ်နေကြောင်း သျှမ်းသံတော်ဆင့်ကို ပြောသည်။
“ အခုဆိုရင် ပိုဆိုးလာတယ်။ နိုင်ငံရေး နည်းနည်းသိတဲ့သူဆိုရင် သတ်နေတဲ့သဘောပဲ။ ရွာတွေဘက်မှာ ပိုဖြစ်တယ်။ နိုင်ငံရေး နည်းနည်းပါးပါး သိရင် အခုလို မျိုးရက်ရက်စက်စက် သတ်ခံရမယ်ဆိုပြီး လုပ်ပြတဲ့သဘောပဲ” ဟု ဟိုပုံးမြို့ တွင်နေထိုင်သည့် အသက် ၄၀ကျော်အရွယ် အမျိုးသားတစ်ဦးက သျှမ်းသံတော်ဆင့်ကိုပြောသည်။
ပြီးခဲ့သည့် (ဖေဖော်ဝါရီလ ၁၄ ရက်) တွင်လည်း ဆီဆိုင်မြို့တိုက်ပွဲကြောင့် ဘန်းယဉ်ကျေးရွာသို့ ထွက်ပြေး တိမ်းရှောင်လာသည့် လူငယ် ၃ ဦးသည် စောင်နှင့်အဝတ်အထည်များ ပြန်ယူရန် နေအိမ်ရှိ ဆီဆိုင်မြို့သို့ ပြန်နေစဉ် လမ်း၌ပျောက်ဆုံးသွားရာ ယနေ့အချိန်ထိ မတွေ့ရှိသေးပေ။
ထို့အပြင် ပြီးခဲ့သည့် (မတ်လ ၁၆ ရက်နေ့)တွင်လည်း ဟိုပုံးမြို့နယ်၊ မဲနယ်တောင်ဒေသရှိ ကျောက္ကဆျားကျေးရွာကို စစ်ကောင်စီ လေတပ် ဂျက်ဖိုက်တာဖြင့် ပေါင် ၅၀၀ ဗုံး ၂ ကြိမ် ကြဲချ တိုက်ခိုက်ခဲ့ကြောင်း ပအိုဝ်းအမျိုးသား လွတ်မြောက်ရေး တပ်မတော် (PNLA) က ထုတ်ပြန်သည်။
