သျှမ်းပြည် ကွတ်ခိုင်မြို့နယ်တွင် အမျိုးသမီးနှင့် ကလေးအပါအဝင် လမ်းခင်းလုပ်သား ၆ ဦးသည် မြေမြှုပ်မိုင်း နင်းမိ၍ တစ်ဦး သေဆုံးပြီး ၄ ဦးမှာ ဒဏ်ရာပြင်းထန်ကြောင်း စုံစမ်းသိရသည်။
ယမန်နေ့ (မတ်လ ၁၇ ရက်) နံနက် ၁၁ နာရီခွဲခန့်တွင် ကွတ်ခိုင်မြို့ တိုးဂိတ်အကျော်ရှိ ခရစ်ယာန်သုဿာန်အနီး၌ လမ်းခင်းလုပ်ငန်း ဆောင်ရွက်နေသည့် အလုပ်သမားနှင့် မိသားစုဝင်များသည် နေ့လယ်စာ ထမင်းစားနားရန် ပြင်ဆင်နေချိန် မြေမြှုပ်မိုင်းနင်းမိပြီး အမျိုးသမီးနှင့် ကလေး အပါအဝင် စုစုပေါင်း ၆ ဦး ဒဏ်ရာပြင်းထန်ကြောင်း ကွတ်ခိုင်ဒေသခံများက ပြောသည်။
“ကလေးငယ်ကော ထိတယ်ဆိုတော့ ၆ ယောက်ပေါ့။ ၇ နှစ်ကလေးတော့ မိုင်းအစအန သေးသေးလေးတွေ ထိတာ၊ ကျောက်ပေါက်သလို အပေါက်တွေ ဖြစ်တာ။ ကျန်တဲ့ ၅ ယောက်မှာ မိန်းကလေး ၁ ယောက်က မျက်လုံးတစ်ဘက် ကန်းသွားတဲ့ သဘောရှိတယ်။ သူတို့က မိုင်းစတွေ ဝင်တာ၊ အဲ့တာ ခွဲစိတ်ဖို့ လိုနေတာ”ဟု ကွတ်ခိုင်မြို့ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
ကွတ်ခိုင်မြို့ တိုးဂိတ်အနီးတွင် မိုင်းနင်းမိ၍ ထိခိုက်ဒဏ်ရာ ရသူများမှာထဲမှ နမ့်ပါချီးကျေးရွာတွင် ယာယီနေထိုင်သည့် အသက် ၄၈ နှစ် အရွယ်ရှိ ဦးစိုးဝင်း သည် ခြေထောက်ပြတ်ဒဏ်ရာဖြင့် သွေးထွက်လွန်ပြီး ယနေ့ (မတ်လ ၁၈ ရက်) နံနက်ပိုင်းတွင် သေဆုံးသွားခဲ့ကြောင်း ကွတ်ခိုင်ဒေသခံများထံမှ သိရသည်။
“ဒီမနက်ဆုံးသွားတဲ့ ဦးလေးကျတော့ သွေးလွန်တာပေါ့။ ခြေထောက်တစ်ဘက်က လုံးလုံးပြတ်ထွက်သွားပြီး ဘယ်ရောက်သွားမှန်း မသိဘူး။ နောက်တစ်ဘက်ကလည်း ပြတ်လုဆဲဆဲပဲ၊ အရိုးပဲ ကျန်တော့တာ အသားတောင်မရှိတော့ဘူး။” ဟု ကွတ်ခိုင် အမျိုးသမီး ကဆိုသည်။
မြေမြှုပ်မိုင်းနင်းမိပြီး ဒဏ်ရာပြင်းထန်သူများမှာ နန်းစန္ဒီလင်း (၂၅)နှစ်၊ မဇာခြည်ထွေး (၂၃)နှစ်၊ မသင်းသင်းခိုင် (၁၈)နှစ်နှင့် မခိုင်သဇင်အေး (၁၃)နှစ်တို့ ဖြစ်ကြပြီး လက်ရှိတွင် ခွဲစိတ်ကုသမှုခံယူရန် ငွေကြေးအကူအညီ လိုအပ်နေကြောင်း ကွတ်ခိုင်ဒေသခံများက ပြောသည်။
“ပုဂ္ဂလိကဆေးခန်း သွားကုရင် တစ်ယောက်ကို ၁၀ သိန်းလောက်ကျမှာ၊ ၄ယောက် ကျန်တာဆိုတော့ သိန်း ၄၀ လောက် ကုန်မယ် သူတို့က ပိုက်ဆံမရှိကြဘူး။ တစ်နေ့လုပ် တစ်နေ့စားတဲ့ လမ်းခင်းအလုပ်သမားတွေဆိုတော့ ငွေကြေးအခက်အခဲ ရှိတာပေါ့။ ဆေးကုတာ မတတ်နိုင်ဘူးဖြစ်နေတာ၊ အကူအညီ လိုနေတယ်။ လားရှိုးပို့နိုင်ဖို့ကလည်း လမ်းခရီးအခက်အခဲ ဖြစ်နေတာ”ဟု မိုင်းနင်းမိသည့် ဒဏ်ရာရလူနာများကို ကူညီပေးနေသူတစ်ဦးက သျှမ်းသံတော်ဆင့်ကို ပြောသည်။
ထို့အပြင် နန်းစန္ဒီလင်း၏ သမီးဖြစ်သူ အသက် (၇)နှစ်အရွယ်ရှိ မမေစစ်နိုင်သည် မိုင်းစများ ထိမှန်ခဲ့ပြီး ဒဏ်ရာမစိုးရိမ်ရကြောင်း သိရသည်။
အလားတူ မတ်လ ၁၂ ရက်နေ့ တစ်ရက်တည်းတွင် ကွတ်ခိုင်မြို့နယ်တွင် မြေမြှုပ်မိုင်းနင်းမိသည့် ဖြစ်စဉ်နှစ်ခု ဖြစ်ပွားခဲ့ပြီး ကွတ်ခိုင်မြို့ရပ်ကွက် (၅)မှ ထင်းသွားရှာသည့် အမျိုးသားတစ်ဦးနှင့် ပန်ဆေးရွာမှ လယ်တောထဲ ကျွဲသွားရှာသည့် အမျိုးသမီး တစ်ဦးတို့ ဖြစ်ပြီး နှစ်ဦးစလုံးမှာ မိုင်းနင်းမိ၍ ခြေထောက်တစ်ဘက်စီ ဖြတ်လိုက်ရကြောင်း ကွတ်ခိုင်ဒေသခံများက ပြောသည်။
“၁၀၂၇ စစ်ဆင်ရေး” ၅ လနီးပါး ကာလအတွင်း ကွတ်ခိုင်မြို့နယ် တစ်ခုတည်းတွင် အရပ်သား (၁၃)ဦးထက်မနည်း မြေမြှုပ်မိုင်း နင်းမိပြီး တစ်ဦးသေဆုံးခဲ့ကာ အများစုမှာ ခြေထောက်ဖြတ်လိုက်ရကြောင်း ဒေသခံများထံမှ သိရသည်။
တအာင်း(ပလောင်)တပ်ဖွဲ့ TNLA က သိမ်းပိုက်ထိန်းချုပ်ထားသည့် ကွတ်ခိုင်မြို့ရှိ ပြည်သူ့ဆေးရုံတွင် ပြီးခဲ့သည့် ဇန်နဝါရီလ ၄ ရက်နေ့အထိ စစ်ကောင်စီလက်အောက်ခံ Non-CDM ကျန်းမာရေးဝန်ထမ်းများ ကုသပေးခဲ့ပြီး လက်ရှိတွင် TNLA တပ်ဖွဲ့မှ ကျန်းမာရေးဝန်ထမ်းများနှင့် လုပ်ငန်းလည်ပတ်နေကြောင်း ကွတ်ခိုင်မြို့ဒေသခံများက ပြောသည်။
Leave a Comments