သျှမ်းပြည်နယ် တောင်ပိင်း၊ ဟိုပုံးမြို့နယ်၊ မဲနယ်တောင်ဒေသရှိ ကျောက္ကဆျားကျေးရွာကို စစ်ကောင်စီ လေတပ် ဂျက်ဖိုက်တာဖြင့် ယမန်နေ့ (မတ်လ ၁၆ ရက်နေ့) နေ့လယ် ၂ နာရီခန့်က ပေါင် ၅၀၀ ဗုံး ၂ ကြိမ် ကြဲချ တိုက်ခိုက်ခဲ့ကြောင်း ပအိုဝ်းအမျိုးသား လွတ်မြောက်ရေး တပ်မတော် (PNLA) က ယနေ့ (မတ် ၁၇)ရက်တွင် ထုတ်ပြန်သည်။
ယင်းသို့ ဗုံးကြဲ တိုက်ခိုက်မှုကြောင့် ကျေးရွာအတွင်းရှိ နေအိမ် ၄ အိမ်ထက်မနည်း ထိခိုက်ပျက်စီးခဲ့ပြီး လူထိခိုက်မှု ရှိမရှိကိုမူ မသိရှိရသေးကြောင်း ဆိုသည်။
“ဗုံးကြဲတာ ၄ လုံးမကဘူးထင်တယ်။ အသံအကျယ်ကြီး ခဏခဏ ကြားနေရတာ။ ရွာထဲကလူတွေ ထွက်ပြေးနေရတာ ရက်ကြာပြီ။ PNLA စစ်သားလည်း မရှိဘူး။ ရွာကိုတမင်ဖျက်ဆီးတာ” ဟု ရွာအနီးတွင် တိမ်းရှောင်နေသည့် ထမ်းယံရွာသား တစ်ဦးက ပြောသည်။
မတ်လ ၁၅ ရက်ကလည်း ဆီဆိုင်မြို့နယ်၊ ထမ်းယံကျေးရွာကို ပေါင် ၅၀၀ ဗုံးသာမက မီးလောင်ဗုံး အသုံးပြု၍ ၆ ကြိမ် တိုက်ခိုက်ခဲ့သဖြင့် ထမ်းယံ ဘုန်းတော်ကြီးကျောင်းနှင့် နေအိမ်၂ လုံး ပျက်စီးခဲ့သေးသည်။
ပြီးခဲ့သည့် မတ်လ ၁၅ ရက်နေ့ကလည်း ဆီဆိုင်မြို့နယ်၊ အနောက်ဘက်ကို စစ်ကောင်စီတပ် စစ်ကြောင်းထိုး သဖြင့် တိုက်ပွဲဖြစ်ပွားရာ စစ်ကောင်စီ တပ်ဖွဲ့ဝင် ၂ ဦး သေဆုံးခဲ့သည်ဟု PNLA က ထုတ်ပြန်ထားသည်။
လက်ရှိ စစ်ကောင်စီ အရှေ့ပိုင်းတိုင်းစစ်ဌာနချုပ် (ရပခ) နှင့် မိုင်များစွာ မကွာဝေးသည့် ဟိုပုံးမြို့နယ်၊ ဆီဆိုင်မြို့နယ်နှင့် ပင်လောင်းမြို့နယ် တောင်ပိုင်းတွင် PNLA ပူးပေါင်းတပ်နှင့် စစ်ကောင်စီတပ် တိုက်ပွဲများ ဖြစ်ပွားနေပြီး ဒေသခံ ထောင်ပေါင်းများစွာ ထွက်ပြေး တိမ်းရှောင်နေရသည်။
လတ်တလော ဆီဆိုင်မြို့ကို ပအိုဝ်းအမျိုးသား လွတ်မြောက်ရေးတပ်မတော် (PNLA) က ထိန်းချုပ်ထားပြီး နေ့စဥ် စစ်ကောင်စီတပ် လေကြောင်း တိုက်ခိုက်မှုနှင့် လက်နက်ကြီး ပစ်ခတ်မှုကြောင့် မြို့တွင်း နေအိမ် အဆောက်အအုံ များစွာ ပျက်စီးခဲ့သည်။
