သျှမ်းပြည် ဆီဆိုင်မြို့နယ်နှင့် ဟိုပုံးမြို့နယ်ကို ပအိုဝ်းအမျိုးသား လွတ်မြောက်ရေးတပ်မတော် PNLA က ထိန်းချုပ်ထားနိုင်ခဲ့ပြီး ရန်သူများဆက်ပြီး ထိုးစစ်မဆင်နိုင်ရန် ကျေးရွာအားမီးရှို့ခဲ့သည်ဟု ထုတ်ပြန်စာစောင် အတု ပျံ့နှံ့နေလျှက်ရှိသည်။

စစ်ကောင်စီ၏ ဝါဒဖြန့်နယ်ချယ်တယ်ရီဂရမ်ဖြစ်သည့် (Ko Thet) ဆိုသည့်အကောင့်မှ “PNLA/PNLOအဖွဲ့က ပအိုဝ်းကျေးရွာများကို ၎င်းတို့ကိုယ်တိုင် မီးရှို့တာဖြစ်ကြောင်းနှင့် ဒီမိုကရေစီရမှ အလျှော်ပြန်ပေးမည်ဟု ပြည်သူကိုဂျင်းထည့်သည့်အပြင် အပြစ်မဲ့ပြည်သူတွေကိုပါ သတ်ဖြတ်ဖို့အထိ ခြိမ်းခြောက်နေတဲ့စာတစ်စောင် ထုတ်ပြန်” ဟုဆိုကာ ပြည်သူလူထုကို အထင်လွဲမှားစေရန် ရည်ရွယ်ချက်ဖြင့် ဖြန့်ဝေနေသည်။

မူရင်းလင့် – https://archive.ph/nPptv

သျှမ်းသံတော်ဆင့် အချက်အလက်စစ်ဆေးသည့်အဖွဲ့များအနေဖြင့် အဆိုပါအကြောင်းအရာကို စစ်ဆေးမှုပြုလုပ်ခဲ့သည်။ ယင်းမှာ ထုတ်ပြန်ချက်စာစောင်အတု ဖြစ်နေကြောင်း တွေ့ရသည်။

ပအိုဝ်းအမျိုးသားလွတ်မြောက်ရေးတပ်မတော် PNLA ၏ တရားဝင်ထုတ်ပြန်ချက်ဖြစ်သည့် PNLA News & Information Department မှ အဆိုပါအကြောင်းအရာနှင့်ပတ်သက်၍ မဟုတ်မမှန်ကြောင်း ယမန်နေ့ မတ်လ ၁၃ ရက်တွင် ပြန်လည်ထုတ်ပြန်ထားသည်။

စစ်ရေးအခြေအနေ အလွန်ရှုပ်ထွေးနေသည့် လက်ရှိကာလကို မသမာသူများက အခွင့်ကောင်းယူကာ တော်လှန်ရေးတပ်ဖွဲ့များနှင့် ပြည်သူများအကြား ထင်ယောင်ထင်မှားဖြစ်စေရန် သတင်းအတုများကို လုပ်ကြံဖန်တီးနေသည်ဟု ရေးသားဖော်ပြထားသည်။

မူရင်းလင့်- https://www.facebook.com/share/p/1T6a1UMxSvqk52wH/?mibextid=oFDknk

ထို့အပြင် ထုတ်ပြန်ချက်တွင် ရေးသားဖော်ပြထားသည့် အချက်အလက်များအရ “အမိန့်မလိုက်နာခြင်း၊ ကောက်ယူသည့်အခွန်ကို မပေးဆောင်ခြင်း၊ စစ်မှုထမ်းမလိုက်နာခြင်း၊ အဖွဲ့အစည်းကို ဖီဆန်ခြင်း ပြုလုပ်ပါက ထိရောက်စွာအရေးယူသွားမှာဖြစ်ပြီး ကျူးလွန်သူများကိုလည်း အသက်အားမခံပေးမှာ မဟုတ်ကြောင်း” ရေးသားခဲ့ရာတွင်လည်း မသမာသူများ၏ လုပ်ကြံရေးသားချက်ဖြစ်သည်။

ထို့ကြောင့် ဆီဆိုင်မြို့နယ်နှင့် ဟိုပုံးမြို့နယ်ကို PNLA ကထိန်းချုပ်နိုင်ခဲ့ပြီး ကျေးရွာအား PNLA မှမီးရှို့ခဲ့ကြောင်း ထုတ်ပြန်ထားသည့် စာစောင်မှာ အတုဖြစ်ကြောင်း စီစစ်ခဲ့သည်။

သျှမ်းသံတော်ဆင့် စာဖတ်ပရိတ်သတ်များအနေဖြင့် လူမှုကွန်ရက် စာမျက်နှာများတွင် ဖော်ပြနေသည့် သတင်းများကို ချက်ချင်းမယုံကြည်ဘဲ စိတ်ချရသော သတင်းမီဒီများတွင် သွားရောက်ဖတ်ရှု့ကြရန် တိုက်တွန်းပါသည်။

သတင်းတု၊ သတင်းမှားဟု ယူဆရသည့် သတင်းများကိုလည်း သျှမ်းသံတော်ဆင့် လူမှုကွန်ရက်စာမျက်နှာ (SHAN Burmese Vision ) Facebook Chat Boxမှဆစ်ဆင့် သတင်း၏ လင့်ခ် (သို့မဟုတ်) Screen Short ပုံပေးပို့ခြင်းဖြင့် စစ်ဆေးနိုင်သည်။