သျှမ်းပြည် ဟိုပုံးမြို့နယ် မဲနယ်တောင်ဒေသ နမ့်ဟူးကျေးရွာကို စစ်ကောင်စီ က ယမန်နေ့ (မတ် ၁၃)ရက် တွင် ပြာကျသည့်အထိ မီးရှို့ဖျက်ဆီးလိုက်ကြောင်း စုံစမ်းသိရသည်။
အဆိုပါ စစ်ကောင်စီ တပ်ဖွဲ့မှ မီးရှို့လိုက်သော ဟိုပုံးမြို့နယ် မဲနယ်တောင်ဒေသ နမ့်ဟူးကျေးရွာသည် အိမ်ခြေ (၁၀၀)ခန့်ရှိကြောင်း၊ ထိုအိမ်များသည် ပြာကျသည့်အထိ မီးလောင်ပျက်စီးသွားကြောင်း အသက် ၃၀အရွယ်ရှိ ဟိုပုံးဒေသခံ အမျိုးသားတစ်ဦး ကသျှမ်းသံတော်ကို ပြောသည်။
“သူတို့ စစ်ကောင်စီကတော့ တစ်ရွာပြီးတစ်ရွာကို မီးလိုက်ရှို့နေတာပဲ။ဟိုပုံးမြို့ရဲ့ အရှေ့ဖက်မှာရှိတာပေါ့။ အဲ့ရွာက လူတွေကတော့ အရင်လ ကတည်းကပြေးနေကြတာ။အဲ့မဲနယ်တောင် ဒေသတဝိုက်မှာ မီးရှို့ခံရတဲ့ ရွာတွေက ၇ ရွာ ၈ရွာလောက်ရှိနေပြီ။”ဟု အသက် ၃၀ ဝန်းကျင်အမျိုးသားတစ်ဦးက ပြောသည်။
လက်ရှိ မီးရှို့ခံပြီး တစ်ရွာလုံးပြာကျသွားသော နမ့်ဟူးကျေးရွာသည် ဟိုပုံးမြို့နှင့် ၁၀မိုင်ခန့်သာဝေးကွာသည်။
သျှမ်းပြည် ဟိုပုံးမြိုန့ယ် မဲနယ်တောင်ဒေသ တောင်ခြေရှိအနီးရှိ နမ့်ဟူးကျေးရွာကို စစ်ကောင်စီက ယမန်နေ့ (မတ်လ ၁၃ ရက်) တွင် ရွာလုံးကျွတ်နီးပါး မီးရှို့ဖျက်ဆီးခဲ့ကြောင်း ပအိုဝ်းအမျိုးသား လွတ်မြောက်ရေး တပ်မတော် (PNLA) က ထုတ်ပြန်ထားသည်။
နမ့်ဟူးကျေးရွာအတွင်း ပအိုဝ်းအမျိုးသားလွတ်မြောက်ရေးတပ်မတော်(PNLA) တပ်ဖွဲ့ဝင်များ တည်ရှိသည့် နေရာ မဟုတ်ကြောင်း လည်း ထုတ်ပြန်ချက်တွင်ရေးသားထားသည်။
ထိုမဲနယ်တောင်ဒေသ အနီးတဝိုက်ရှိ ရွာဒေသခံများသည် ပြီးခဲ့သည့် ဖေဖော်ဝါရီလ နောက်ဆုံးပတ်မှစ၍ နီးစပ်ရာ ဟိုပုံး၊တောင်ကြီးမြို့တို့တွင် ထွက်ပြေး သိမ်းရှောင်နေခဲ့ကြောင်း သိရသည်။
ထို့အပြင် ယမန်နေ့တွင်ပင် စစ်ကောင်စီသည် ဆိုက်ခေါင်စံပြကျေးရွာမှနေပြီး ဆီဆိုင်မြို့ထဲသို့ လက်နက်ကြီးများဖြင့် အကြိမ် ၈၀ ကျော် ဆက်လက်ပစ်ခတ်တိုက်ခိုက်ခဲ့သဖြင့် နေအိမ်များ ၁၄ အိမ်ထက်မနည်း အများအပြား ထိခိုက်ပျက်စီးခဲ့ရသည်။
ဆီဆိုင်မြို့နယ်နှင့် ဟိုပုံးမြို့နယ်တွင် တိုက်ပွဲများကြောင့် အဆောက်အဦးပျက်စီးမှု ၁၉၆ လုံးရှိပြီး စစ်ဘေးရှောင်ဦးရေ စုစုပေါင်း ၈၉၂၇၈ ဦးနှင့် သေဆုံးသူ ၄၉ ဦးအထိရှိနေကြောင်း Pa-o youth Organization မှ ထုတ်ပြန်ခဲ့သည်။
Leave a Comments