သျှမ်းပြည် ဆီဆိုင်မြို့နယ် နောင်ကျိန် (ခ) ကုန်းသာရွာတွင် နေထိုင်သည့် အမျိုးသမီး ၁ ဦးကို ပအိုဝ်းအမျိုးသား လွတ်မြောက်တပ်မတော် PNLA၊ ကရင်နီအမျိုးသား ကာကွယ်ရေးတပ် KNDF နှင့် ပြည်သူ့ကာကွယ်ရေးတပ် PDF တို့ပူးပေါင်းအဓမ္မပြုကျင့်ခဲ့ကြောင်း သတင်းမှားဖြန့်ချိနေလျှက်ရှိသည်။
စစ်ကောင်စီ၏ ဝါဒဖြန့်တယ်ရီဂရမ်ဖြစ်သည့် ကျော်စွာ (Kyaw Swar) ဆိုသည့်အကောင့်မှ “ ၅-၂-၂၀၂၄ ရက်နေ့မှာ PNLA၊ KNDF၊ PDF ဟာ ဆီဆိုင်မြို့နယ် နောင်ကျိန် (ခ) ကုန်းသာရွာသူ မနန်းဝန်းအား ကျေးရွာသင်္ချိုင်း ကုန်းအနီးမှာ အဓမ္မပြုကျင့်ခဲ့ကြ တယ်လို့သိရပါတယ်” ဟုဆိုကာ ပြည်သူလူထုကို အထင်လွှဲမှားသွားစေရန် ရည်ရွက်ချက်ဖြင့် ချဲ့ကားရေးသားဖြန့်ချိနေခြင်း ဖြစ်သည်။
မူရင်းလင့် – https://archive.ph/O6K25
သျှမ်းသံတော်ဆင့် အချက်အလက် စစ်ဆေးသည့်အဖွဲ့များအနေဖြင့် အဆိုပါအကြောင်းအရာကို စစ်ဆေးမှု ပြုလုပ်ခဲ့သည်။ ယင်းမှာ မှားယွင်းနေကြောင်း တွေ့ရသည်။
ဆီဆိုင်မြို့နယ် နောင်ကျိန် (ခ) ကုန်းသာရွာသူ မနန်းဝန်းအား ကျေးရွာသင်္ချိုင်းကုန်းအနီးမှာ အဓမ္မပြုကျင့်ခဲ့သည်ဟု ရေးသားခဲ့ရာတွင် မည်သူမည်ဝါက ကျုးလွန်ခဲ့ကြောင်း ရှင်းရှင်းလင်းလင်း ရေးသားဖော်ပြထားနိုင်ခြင်းမရှိသလို ခိုင်မာသည့်သက်သေအထောက်အထားဖြင့်လည်း ဖော်ပြထားခြင်းမရှိပါ။
ထို့အပြင် မနန်းဝန်းအား မတရားပြုကျင့်နေသည့်အချိန် ၎င်း၏မိခင်ဖြစ်သူ မြင်သွားသဖြင့် အကူအညီ တောင်းခံနေသည့်အခါ မိခင်ဖြစ်သူကိုပါ နှုတ်ပိတ်သတ်ပစ်လိုက်သည့်ဟု ရေးသားခဲ့ရာ၌ သတ်ပစ်ခံရသူ မိခင်ဖြစ်သူမှာ မည်သူဖြစ်ကြောင်း (အသက်၊ အမည်) ကိုလည်းရေးသားဖော်ပြထားခြင်း မတွေ့ရပေ။
အဆိုပါအကြောင်းအရာနှင့် ပတ်သက်၍ ယုံကြည်စိတ်ချရသည့် သတင်းဌာနများတွင်လည်း ရေးသားဖော်ပြ ထားခြင်းမရှိပါ။
အလားတူ ၎င်းမှဖော်ပြထားသည့် ဓာတ်ပုံသည် ပအိုဝ်းအမျိုးသား ဖက်ဒရယ်ကောင်စီ-PNFC ဥက္ကဋ္ဌ နာမည်ပါ အကောင့်တုဖြင့် ဖော်ပြထားသည့် ကျေးရွာဆိုင်းဘုတ်ပုံသာ ဖြစ်သည်။ ပအိုဝ်းအမျိုးသား ဖက်ဒရယ်ကောင်စီ-PNFC ဥက္ကဋ္ဌ နာမည်နှင့် Facebook အကောင့်တုထွက်နေ အောက်ကလင့်ကို ကြည့်ပါ။
မူရင်းလင့် – https://www.facebook.com/MeKongNewsMM/posts/430063986046718
ပအိုဝ်းအမျိုးသားလွတ်မြောက်ရေးတပ်မတော် PNLA မှ လှုမှုကွန်ရက် စာမျက်နှာပေါ်တွင် ဖော်ပြနေသည့် သတင်းတု၊ သတင်းမှားများအား သတိပြုရန်နှင့် ၎င်းတို့တရားဝင်ထုတ်ပြန်ကြေညာထားသည့် သတင်းများကို စောင့်ကြည့်ကြရန် ပြီးခဲ့သည့် ဖေဖော်လပိုင်းက ကြေညာထားသည်။
ထို့ကြောင့် ဆီဆိုင်မြို့နယ် နောင်ကျိန် (ခ) ကုန်းသာရွာတွင် နေထိုင်သည့် အမျိုးသမီး ၁ ဦးကို PNLA၊ KNDF၊ PDF တို့ အဓမ္မပြုကျင့်ဆိုသည့် သတင်းမှာ မဟုတ်မမှန်၊ သတင်းတု၊ သတင်းမှား ဖြစ်ကြောင်း စီစစ်တွေ့ရှိရသည်။
သျှမ်းသံတော်ဆင့် စာဖတ်ပရိတ်သတ်များအနေဖြင့် လူမှုကွန်ရက် စာမျက်နှာများတွင် ဖော်ပြနေသည့် သတင်းများကို ချက်ချင်းမယုံကြည်ဘဲစိတ်ချရသော သတင်းမီဒီများတွင် သွားရောက်ဖတ်ရှု့ကြရန် တိုက်တွန်းပါသည်။
သတင်းတု၊ သတင်းမှားဟု ယူဆရသည့် သတင်းများကိုလည်း သျှမ်းသံတော်ဆင့် လူမှုကွန်ရက်စာမျက်နှာ (SHAN Burmese Vision ) Facebook Chat Boxမှဆစ်ဆင့် သတင်း၏ လင့်ခ် (သို့မဟုတ်) Screen Shortပုံပေးပို့ခြင်းဖြင့် စစ်ဆေးနိုင်သည်။
