သျှမ်းပြည်တောင်ပိုင်း၊မောက်မယ်မြို့နယ် ကဒူးကြီးဒေသတွင် နေထိုင်သည့် စစ်ဘေးရှောင် တစ်ထောင်ကျော်အတွက် သောက်သုံးရေအခက်ကြုံနေကြောင်း သတင်းရရှိသည်။

ပြီးခဲ့သည့် ဖေဖော်ဝါရီလ ပထမပတ်တွင် ဖြစ်ပွားခဲ့သော စစ်ပွဲကြောင့် ကဒူးကြီးဒေသမှ ဒေသခံ တစ်ထောင်ကျော် စစ်ဘေးတိမ်းရှောင်ခဲ့ရပြီး၊ ခြောက်သွေ့ရာသီရောက်ရှိလာသဖြင့် သောက်သုံးရေလည်း ခက်ခဲလာကြောင်း စစ်ဘေးရှောင်များကို ကူညီပေးနေသည့် အသက် ၃၀ အရွယ်ရှိ အမျိုးသမီးတစ်ဉီးက သျှမ်းသံတော်ဆင့်ကိုပြောသည်။

“အစကတည်းက အဲဒေသမှာ ရေရှားတယ်လေ၊အခုက နွေပိုင်းဆို ‌တော့ ပိုဆိုးတယ်။ သောက်ဖို့တောင် ရေကိုအဝေးကြီး သွားသယ်ရတာ၊ရေတောင်ချိုးဖို့မရှိနေဘူး ၊ညပိုင်းဆို အရမ်းအေးပြီး နေ့ပိုင်းဆို အရမ်းပူတယ်” ဟု ၎င်းအမျိုးသမီးက ဆိုသည်။

အဆိုပါ စစ်ရှောင်များနေထိုင်သည့် နေရာသည် တောထဲ ဖြစ်ပြီး၊ လာရောက်ကူညီပေးသူများသိပ်မရှိကြောင်း၊ လက်ရှိ ရာသီဥတုသည်လည်း နေ့အချိန်တွင် အလွန်ပူပြင်းပြီး၊ ညအချိန်တွင် အေးနေသဖြင့် ရာသီဥတုမမျှကာ ဖျားနာနေသည့် သူများလည်း ရှိကြောင်း ၎င်းစစ်ရှောင်များကို ကူညီပေးနေသည့် သူက ပြောသည်။

လက်ရှိ မောက်မယ်မြို့နယ်အတွင်း တိုက်ပွဲများ ရပ်တန့်နေပြီး ပအိုဝ်းပြည်သူ့စစ် (PNO)က ဖိအားပေးနေရပ်ပြန်ခိုင်းသည်။

သို့ သော် ထိုနေရာတွင် PNO နှင့် ပအိုဝ်းအမျိုးသားလွတ်မြောက်ရေး တပ်မတော် (PNLA)တို့ အချိန်မရွေး စစ်ရေးပြန်ဖြစ်နိုင်သည့်အတွက် နေရပ်မပြန်ရဲကြကြောင်း၊ ထို့အပြင် မြေမြှုပ်မိုင်းအန္တရာယ်လည်း ရှိနေသေးသဖြင့် မပြန်သေးကြောင်း စစ်ဘေးရှောင် အမျိုးသားတစ်ဉီးက သျှမ်းသံတော်ဆင့်ကိုပြောသည်။

“တချို့ကတော့ PNO ကအတင်းပြန်ခိုင်းလို့ ပြန်ကြတာ၊အဓိက အိမ်ရှိတဲ့သူတွေပေါ့လေ ပြန်ကြတာ၊တချို့ကလည်း အိမ်မီးရှို့ခံရတော့ ပြန်စရာမရှိ ၊ PNOက မြေမြုပ်မိုင်းတွေမရှင်းပေးသေးတော့ မပြန်ရဲကြတာ၊ ပြန်တဲ့သူတွေကလည်း မြေမြုပ်မိုင်းကြောက်လို့ တောခြံတွေဆို မသွားရဲကြသေးဘူး။”ဟုစစ်ဘေးရှောင် အမျိုးသားတစ်ဦးက သျှမ်းသံတော်ဆင့်ကို ပြောသည်။

ဆက်လက်ပြီး နေရပ်ပြန်စစ်ဘေးရှောင်များကို PNOက စစ်မှုထမ်းခေါ်ယူနေမှုများလည်းရှိနေပြီး ငွေကြေးကောက်ခံမှုများလည်း ရှိနေကြောင်းသိရသည်။

ထိုကဒူးကြီးဒေသသည် လမ်းပန်းဆက်သွယ်ရေးခက်ခဲသည့် ဒေသဖြစ်ပြီး ကျန်းမာရေးစောင့်ရှောက်မှု ၊သောက်သုံးရေနှင့် စားနပ်ရိက္ခာများလိုအပ်နေကြောင်း သိရသည်။

ပြီးခဲ့သည့် ဖေဖော်ဝါရီလ (၁)ရက်နေ့မှ စပြီး ကဒူးကြီးဒေသ ဗန်းမတ်ကျေးရွာ၊ နောင်ထောဝ်ကျေးရွာ၊ဟံ ဗွားရွာတို့တွင် စစ်ကော်မရှင်တပ်၊ ပအိုဝ်းပြည်သူ့စစ်(PNO) နှင့် ပအိုဝ်းအမျိုးသားလွတ်မြောက်ရေးတပ်တော်(PNLA)တို့ တိုက်ပွဲဖြစ်ပွားခဲ့သည်။

ထိုတိုက်ပွဲကြောင့် ဒေသခံ (၁၀၀၀)နီးပါး စစ်ဘေးတိမ်းရှောင်ခဲ့ရပြီး ယနေ့အထိ စစ်ဘေးရှောင် (၈၀)ရာခိုင်နူန်းရှိကြောင်း သိရသည်။