သျှမ်းပြည် ဟိုပုံးမြို့နယ် ကျေးရွာများထဲသို့ စစ်ကောင်စီမှ ရမ်းသမ်းပစ်ခတ်လိုက်သည့် လက်နက်ကြီး ကျည်များသည် မပေါက်ကွဲသေးဘဲ ကျန်ရှိနေကြောင်း စုံစမ်းသိရသည်။
ဟိုပုံးမြို့နယ်တွင် ဖေဖော်ဝါရီလ ၂၀ ရက်ကစတင်ပြီး ပအိုဝ်းအမျိုးသားလွတ်မြောက်ရေးတပ်မတော် PNLA နှင့် စစ်ကောင်စီတို့အကြား တစ်ဖန်တိုက်ပွဲပြန်လည်ဖြစ်ပွားလာခဲ့သည်။
ထိုတိုက်ပွဲ အတွင်း စစ်ကောင်စီတပ်သည် ထမ်စမ်းဂူရွှေတီဂုံစေတီတောင်ပေါ်မှတပ်စွဲနေ၍ လက်နက်ကြီးဖြင့် ကျေးရွာဘက်သို့ ပစ်ခတ်နေလျက်ရှိကြောင်း ဒေသခံများထံမှ သိရသည်။
ယင်းကဲ့သို့ စစ်ကောင်စီမှ လက်နက်ကြီးပစ်ခတ်ခြင်းကြောင့် ကျေးရွာအတွင်းသို့ ကျရောက်ပေါက်ကွဲပြီး နေအိမ်၊ ဘုန်းကြီးကျောင်းများ ထိမှန်ကာ ပျက်စီးသွားသကဲ့သို့ မပေါက်သေးဘဲ ကျန်ရှိနေသည့်များ ငှက်ပျောဖူးဗုံးသီး ရှိနေကြောင်း ဟိုပုံးမြို့နယ်ဒေသခံ အမျိုးသားတစ်ဦးက ပြောသည်။
“ အခုကားလမ်းဘေးမှာ မပေါက်သေးတဲ့ ဗုံးတွေလည်း တွေ့ထားတယ်၊ ၂ လုံးရှိတယ်။ ကောင်းသပြေနဲ့နီးတယ်။ အခုအဲ့ဘက်သွားလာရင် အရမ်းဂရုစိုက်ရတယ်။ အန္တရာယ်လည်း အရမ်းများတယ်။ ရွာတွေထဲမှာလည်း ကျတယ်။ အခုအိမ်ပြန်သွားကြည့်ကြတာ အိမ်တွေတော်တော်များပျက်စီးကုန်ပြီ။ လက်နက်ကြီးထိတာကော၊ မီးလောင်ထားတာကော ဘယ်လိုမှပြန်နေလို့ မဖြစ်သေးဘူး” ဟု၎င်းက ပြောသည်။
လက်ရှိတွင် မပေါက်ကွဲသေးသည့် ဗုံးတီးများအား လမ်းမဘေးတလျှောက်မှာတွေ့ ရှိထားသော်လည်း မည်သည့်လက်နက်ကိုင်တပ်ဖွဲ့က လာရောက်ရှင်းလင်းရေး မပြုသေးကြောင်း သိရသည်။
ထို့အပြင် ဟိုပုံးမြို့နယ် လွယ်ဝိုးတုတ်ကျေးရွာအနီးတွင်လည်း PNLA တပ်နှင့် စစ်ကောင်စီတပ်တို့ စစ်ရေးတင်းမာနေပြီး အချိန်မရွှေးတိုက်ပွဲဖြစ်ပွားနေသကဲ့သို့ အနီးတဝိုက်ကျေးရွာနှင့် မဲနယ်တောင်ဒေသကို စစ်ကောင်စီဘက်က လက်နက်ကြီး၊ ဒရုန်း၊ လေယာဉ်ဖြင့် ပစ်ခတ်၊ဗုံးကြဲနေလျက်ရှိသည်။
အဆိုပါ တိုက်ပွဲအခြေအနေနှင့် ပတ်သက်၍ သျှမ်းသံတော်ဆင့်မှ ပအိုဝ်းအမျိုးသားလွတ်မြောက်ရေးတပ်မတော် PNLA ၏ ပြန်ကြားရေးထံသို့ ဖုန်းဖြင့်ဆက်သွယ်မေးမြန်းခဲ့သော်လည်း လက်ခံဖြေကြားရှင်းမရှိပေ။
ထွက်ပြေးတိမ်းရှောင်နေရသည့် နမ့်ဟူးကျေးရွာ ဒေသခံ အမျိုးသားတစ်ဦးက “ အခုက ပြန်လို့လည်းအဆင်မပြေဘူး။ လမ်းတွေလည်း ပြန်မဖွင့်ဘူးလေ။ ပြန်လမ်းမရှိဘူး။ အခုဆို မွေတော် ဘုန်းကြီးကျောင်းမှာ လာခိုလှုံရတာ လူ ၁၅၀ ကျော်ရှိတယ်။ သူတို့ကျောင်းမှာလာနေရတယ်ဆိုလည်း မလွတ်လပ်ဘူး။ ရွာမှာတိုက်ပွဲဖြစ်နေတော့ အိမ်ကိုလည်း စိတ်ပူတယ်။ ရွာကိုလည်း စိတ်ပူတယ်” ဟု ပြောသည်။
ဟိုပုံးမြို့နယ်အတွင်း တိုက်ပွဲများကြောင့် ပချားကလိုးရွာ၊ ကျောက္ကချားရွာ၊ ပန်လျှန်းရွာ၊ ပုံအယ်ရွာ၊ ဆီအွန်ရွာ၊ စငေါဝ်းရွာနှင့် လွယ်ဝိုးတုတ်ရွာ စသည့်ဖြင့် ကျေးရွာများမှ ဒေသခံများထွက်ပြေးတိမ်းရှောင်နေရသည်။
ပြီးခဲ့သည့် ဇန်နဝါရီလ ၂၁ ရက်မှ ယနေ့ မတ်လ ၇ ရက်အထိ ဟိုပုံးမြို့နယ်၊ ဆီဆိုင်မြို့နယ်နှင့် လွိုင်လင်မြို့နယ် အတွင်း ဖြစ်ပွားခဲ့သည့် တိုက်ပွဲများကြောင့် မိမိနေရပ်အိုးအိမ်စွန့်ပစ်ပြီး ထွက်ပြေးတိမ်းရှောင်နေရသည့် စစ်ဘေးရှောင် စုစုပေါင်း ၁ သိန်းကျော်အထိ မြင့်တက်လာပြီဖြစ်ကြောင်း သိရသည်။
