သျှမ်းပြည် နမ္မတူမြို့နယ်တွင် မပေါက်ကွဲသေးသည့် လက်နက်ကြီး ဆော့ကစားရာမှ ပေါက်ကွဲမှုဖြစ်ပြီး ကလေးတစ်ဦး ပွဲချင်းပြီး သေဆုံးကာ ၁ ဦး ဒဏ်ရာပြင်းထန်ခဲ့ကြောင်း စုံစမ်းသိရသည်။
မတ်လ ၃ ရက်နေ့က နမ္မတူမြို့နယ် နမ့်ခွန်လုံ (ခ) တောင်သုံးလုံးကျေးရွာတွင် မပေါက်ကွဲသေးသည့် စစ်အကြွင်းအကျန် လက်နက်ကြီးကို ယူဆော့ကစားရာမှ ပေါက်ကွဲမှုဖြစ်ပွားပြီး အသက် ၁၃ နှစ်အရွယ်ရှိ မောင်ထွန်းထွန်းဝင်း ပွဲချင်းပြီး သေဆုံး၍ ၁၁ နှစ်အရွယ်ရှိ မောင်ပုရစ်သည် ဒဏ်ရာပြင်းထန်ကြောင်း နမ္မတူဒေသခံများက ပြောသည်။
“နမ့်ခွန်လုံဘက်က စစ်တပ်နားမှာ ဖြစ်တာ။ နမ္မတူနယ်ထဲမှာ အရင်တုန်းက တိုက်ပွဲဖြစ်တော့ ကျန်ခဲ့တဲ့ စစ်လက်ကျန် ပစ္စည်းပေါ့။ တောထဲသွားတဲ့ ကလေးတွေက မပေါက်ကွဲသေးတဲ့ လက်နက်ကြီးကို ယူဆော့မိရင်းနဲ့ ပေါက်ကွဲတာ၊ တစ်ယောက်ကတော့ ပွဲချင်းပြီး ဆုံးသွားတယ်”ဟု ဖြစ်စဉ်သိရှိသူ နမ္မတူဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
မပေါက်ကွဲသေးသည့် လက်နက်ကြီးဆော့ကစားပြီး ပေါက်ကွဲမှုကြောင့် ဦးခေါင်းနှင့် လက်တို့တွင် ထိခိုက်ဒဏ်ရာ ရရှိခဲ့သည့် ကလေးကို လက်ရှိတွင် လားရှိုး ပြည်သူ့ဆေးရုံသို့ ဆေးဝါးကုသရန် ပို့ဆောင်ထားကြောင်း ၎င်းအမျိုးသမီးက ဆက်ပြောသည်။
အဆိုပါ စစ်အကြွင်းအကျန် အမျိုးအစားသည် စစ်ကောင်စီတပ်နှင့် တအာင်း(ပလောင်)တပ်ဖွဲ့ TNLA တို့၏ နှစ်ဘက်တိုက်ပွဲ ဖြစ်ပွားပြီးနောက် ကျန်ရှိခဲ့သည့် လက်နက်ကြီးဖြစ်နိုင်ကြောင်း နမ္မတူဒေသခံများက ပြောသည်။
အလားတူ ဖေဖော်ဝါရီလ ၂ ရက်ကလည်း နမ့်ဆန်မြို့နယ်တွင် မပေါက်ကွဲသေးသည့် စစ်အကြွင်းအကျန် လက်နက်ကြီးကို ယူဆော့ကစားမိရာမှ ပေါက်ကွဲမှု ဖြစ်ပွားခြင်းကြောင့် အသက် (၁၀)နှစ်အောက် ကလေးငယ် ၃ ဦး ပွဲချင်းပြီး သေဆုံးသွားခဲ့ကြောင်း တအာင်းအမျိုးသမီးအဖွဲ့ (TWO) မှ ထုတ်ပြန်ထားသည်။
မြေမြှုပ်မိုင်း စောင့်ကြည့်လေ့လာရေးအဖွဲ့၏ ၂၀၁၇ ခုနှစ်မှ ၂၀၂၂ ခုနှစ်အထိ မှတ်တမ်းများအရ မြေမြှုပ်မိုင်းနှင့် ပေါက်ကွဲစေတတ်သော စစ်အကြွင်းအကျန်များကြောင့် မြန်မာနိုင်ငံတဝှမ်းလုံး၌ သျှမ်းပြည်တွင် အရပ်သားထိခိုက်သေဆုံးမှု အများဆုံးဖြစ်ပွားခဲ့ပြီး ကလေးထိခိုက်သေဆုံးမှုမှာ စုစုပေါင်း၏ လေးပုံတစ်ပုံခန့်ရှိကြောင်း ထုတ်ပြန်ထားသည်။
ထိုအထဲတွင် အများစုမှာ စစ်လက်နက်အကြွင်းအကျန်နှင့် မိုင်းများကို ပေါက်ကွဲစေတတ်သည့် ပစ္စည်းမှန်းမသိဘဲ ထိမိကိုင်မိပြီး ယူဆော့ကစားရာမှ ပေါက်ကွဲမှုဖြစ်ပွား၍ ထိခိုက်သေဆုံးရခြင်းဖြစ်ကြောင်း သိရသည်။
Leave a Comments