သျှမ်းပြည် ကျေးသီးမြို့နယ်တွင် ကျောက်မီးသွေး အလွန်အကျွံ တူးဖော်နေခြင်းကြောင့် အနံဆိုးထွက်ပြီး ဒေသခံပြည်သူများ ကျန်းမာရေးထိခိုက်နေကြောင်း စုံစမ်းသိရသည်။

ပြီးခဲ့သည့် ၂၀၂၃ ဇူလိုင်လ မှ စတင်ပြီး လက်ရှိအချိန်ထိ ၈ လ အတောအတွင်း လွိုင်လင်ခရိုင် ကျေးသီးမြို့ အရှေ့ဘက်ရှိ မိုင်းကောင်ကျေးရွာတဝိုက်တွင် ကုမ္ပဏီ ၄ ခုမှ ကျောက်မီးသွေး အလွန်အကျွံ တူးဖော်လျက်ရှိရာ ကျောက်မီးသွေးတွင်းများမှ ထွက်ရှိလာသည့် အနံ့ဆိုးများကို နေ့စဉ် ရှူရှိုက်နေရပြီး ကျန်းမာရေးထိခိုက်နေကြောင်း ဒေသခံများက ပြောသည်။

“မိုင်းကောင်မှာ ကျောက်မီးသွေး တူးနေတာ ကုမ္ပဏီ ၄ ခု ရှိတယ်၊ ရွာခံတွေက နာမည်မပြောရဲကြဘူး။ ကျောက်မီးသွေးတွင်းက ထွက်လာတဲ့ အနံ့အသက်က တော်တော်ဆိုးတော့ နှာခေါင်းစည်းနဲ့ သွားရင်တောင် မခံနိုင်ဘူး။ ကျောက်မီးသွေး သယ်တဲ့ကားတွေ ဖြတ်သွားရင်လည်း အနံ့ အရမ်းနံလို့ ခေါင်းကိုက်တဲ့အထိ ဖြစ်တယ်။ ရေရှည်ဆို ကျန်းမာရေးထိခိုက်မှာ”ဟု ကျေးသီးမြို့နယ်မှ ဒေသခံ အမျိုးသားတစ်ဦး သျှမ်းသံတော်ဆင့်ကို ပြောသည်။

ကျေးသီး-မိုင်းနောင်မြို့အကြား မိုင်းကောင်ကျေးရွာအုပ်စုရှိ ကျောက်မီးသွေးတွင်းများသည် ကျေးသီးမြို့နှင့် ၇ မိုင်ခန့်သာ ကွာဝေးပြီး တူး‌ဖော်ရရှိသည့် ကျောက်မီးသွေးများကို လားရှိုးမြို့သို့လည်းကောင်း၊ ဟိုပုန်းမြို့ဘက်သို့လည်းကောင်း ပို့ဆောင်သည့် လမ်းကြောင်းများမှာ တိုက်ပွဲကြောင့် ပိတ်ထားရသဖြင့် ကျောက်မီးသွေး သယ်ပို့ခြင်းကို ယာယီရပ်နားထားကြောင်း သိရသည်။

“တိုက်ပွဲကြောင့် လမ်းတွေပိတ်တော့ ကုမ္ပဏီတွေက မြေကော်ကား၊ ဘက်ဟိုးတွေနဲ့ နမ့်လန်-ကျောက်ဂူ-အင်တော-ရပ်စောက် အဲ့ဘက်လမ်းတွေ ချဲ့ဖို့ တင်သွားတယ်။ အဲ့ဖက်လမ်းကနေ ပတ်ပြီး သယ်မယ်ထင်တယ်။ လမ်းပိတ်လို့ မသယ်တော့ပေမယ့် တွင်းထဲက တူးထုတ်လာပြီး ကျေးသီး-မိုင်းနောင် ကားလမ်းဘေးမှာ နေ့တိုင်းလာပုံထားတယ်”ဟု ကျေးသီးမြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။

ကျေးသီးမြို့နယ်အတွင်း ကျောက်မီးသွေးတူးဖော်ရန် လုပ်ပိုင်ခွင့်ရထားသည့် ကုမ္ပဏီများသည် ဟေဟိန်းကုမ္ပဏီအပြင် MEC ကုမ္ပဏီ၊ နမ့်ပန်ကုမ္ပဏီနှင့် ထွန်းမြတ်အောင် ကုမ္ပဏီတို့မှ လာရောက်တူးဖော်မည်ဖြစ်ပြီး စစ်ကောင်စီတပ် ခလရ-၂၈၆ မှ လုံခြုံရေးယူပေးကြောင်း ၂၀၂၃ စက်တင်ဘာလအတွင်းက သတင်းထွက်ပေါ်ခဲ့သည်။

ထို့အပြင် ကျေးသီးမြို့နယ် မိုင်းကောင်ကျေးရွာအုပ်စုရှိ မိုက်ဟုန်းလိန်ကျေးရွာ (ဝၢၼ်ႈမႆ့ႁူင်းလိူင်) အနီးတွင် ကျောက်မီးသွေး တူးဖော်ရန် ခွင့်ပြုထားသည့် မြေနေရာသည် ဧကပေါင်း ၅၀၀ သာ ရှိပြီး ကုမ္ပဏီများမှ ၇၀၀ ဧက ထက်မနည်း ကျူးကျော် တူးဖော်နေခြင်းကြောင့် သံဃာတော်နှင့် ဒေသခံများက SSPP/SSA တပ်ဖွဲ့သို့ စာပို့တိုင်ကြားခဲ့ဖူးကြောင်း သိရသည်။

အလားတူ SSPP/SSA တပ်ဖွဲ့မှ ၎င်းကျောက်မီးသွေးတွင်းများသို့ ဩဂုတ်လအတွင်းက သွားရောက်စစ်ဆေးခဲ့ကြောင်း၊ စည်းကမ်းချက်ဖြင့် မကိုက်ညီသည့် ကျောက်မီးသွေး တူးဖော်သည့် ကုမ္ပဏီများကို ပိတ်သိမ်းသွားမည်ဖြစ်ကြောင်း SSPP ပြောရေးဆိုခွင့်ရှိသူ ဗိုလ်မှူးကြီး စိုင်းဆုက သြဂုတ်လ ၁၉ ရက်တွင် သျှမ်းသံတော်ဆင့်၏ အင်တာဗျူး အစီအစဉ်မှာ ဖြေကြားခဲ့ဖူးသည်။

လက်ရှိ ကျောက်မီးသွေးကို ဆက်လက်တူးဖော်နေခြင်းကြောင့် ကျေးသီးမြို့နယ်အတွင်း လယ်ယာများအတွက် အဓိက အရေးပါသည့် နမ့်ဟင်ချောင်း (မႄႈၼမ့်ႁႅၼ်) ကို ထိခိုက်နိုင်သည့် အတွက် လယ်ယာ စိုက်ပျိုးရေး လုပ်ငန်းများလည်း ထိခိုက်လာနိုင်ကြောင်း ဒေသခံများက ပြောဆို သုံးသပ်နေကြသည်။