သျှမ်းပြည်ဆီဆိုင်မြို့နယ် ဆိုက်ခေါင်ကျေးရွာတွင် ပအိုဝ်းပြည်သူ့စစ် PNOအဖွဲ့၏ အမိန့်အာဏာအရ ဒေသခံများသည် စစ်ဝတ်စုံနှင့်သေနတ်ကိုင်ဆောင်ပြီး လုံခြုံရေးကင်းလှည့်ပေးနေရကြောင်း စုံစမ်းသိရသည်။
ပအိုဝ်းပြည်သူ့စစ် PNO အဖွဲ့ဝင် ဦးခွန်သန်းထိုက်အောင် (ခ) ဦးထိုက်အောင်နှင့် ဦးကောပိတမှ ဦးဆောင်ပြီး တစ်အိမ်လျှင် ၁ ဦး မဖြစ်မနေ ကင်းလှည့်စောင့်ပေးရန် (ဇန်နဝါရီလ ၁၅ ရက်) တွင် အစည်းအဝေးခေါ်ယူပြီး ပြောကြားခဲ့ခြင်း ဖြစ်ကြောင်း ဆိုက်ခေါင်ကျေးရွာဒေသခံတစ်ဦးကပြောသည်။
လက်ရှိတွင် ညောင်ပင်သာရပ်ကွက်နှင့် တံတားဦးရပ်ကွက်နေ ဒေသခံများကို ခေါ်ယူပြီး နေ့ည ကင်းစောင့်ပေးရန် စစ်ဝတ်စုံနှင့်သေနတ်ကိုင် ထုတ်ပေးထားကြောင်း ဆိုသည်။
“ညောင်ပင်သာ၊ တံတားဦးက ကင်းစောင့်ရတယ်။ သူတို့သေနတ်ထုတ်ပေးတယ်။ သူတို့ပြောအရတော့ ကင်းပေါ့။ ယူနီဖောင်းထုတ်ပေးတယ်။ သေနတ်ထုတ်ပေးတယ်။ ရွာအဝင်၊ အထွက်၊ အလယ် ရှိသမျှအဝင်လမ်းတွေအကုန်လုံး ကင်းစောင့်ရတယ်။ နေ့ရောညရောပဲ” ဟု ၎င်းဒေသခံတစ်ဦးက ပြောသည်။
ယင်းကဲ့သို့ ကင်းစောင့်ရန် ငြင်းဆန်ပါက နေအိမ်သိမ်းယူမည်ဟုလည်း ပအိုဝ်းပြည်သူ့စစ် PNO အဖွဲ့က ခြိမ်းခြောက်ခဲ့သေးကြောင်း ၎င်းကဆက်ပြောသည်။
ထို့အပြင် စစ်ကောင်စီတပ်မှ တစ်ရပ်ကွက်လျှင် လူအယောက် ၃၀ ပေးရန်အတွက် ပအိုဝ်းပြည်သူ့စစ် PNO ကို လိုက်လံခေါ်ယူခိုင်းစေပြီး လူမပေးနိုင်ပါက အကြိုအပို့လုပ်ပေးရန် တစ်ရပ်ကွက်လျှင် တစ်ရက် ကား ၃ စီးပေးရမည်ဟု PNO ကဒေသခံများကို ပြောကြားခဲ့သည်။
“လူ ၃၀ ပေးရတယ်။ မပေးနိုင်တဲ့ရပ်ကွက်က သူတို့သွားချင်တဲ့နေရာကို တစ်ရက် ကား ၃ စီးပေးရတယ်။ နောက်ညောင်ပင်သာနဲ့ တံတားဦးရပ်ကွက်က လူအယောက် ၈၀ အတွက်ကို ထမင်း၊ ဟင်း ချက်ပေးနေရတယ်။ ပြီးတော့ဆိုက်ခေါင်အရှေ့ဘက် အမြောက်တပ်ရှိတဲ့နေရာကို သွားပို့ပေးရတယ်” ဟု ဆိုက်ခေါင်ကျေးရွာဒေသခံ တစ်ဦးက ထပ်လောင်းပြောသည်။
စစ်ကောင်စီနှင့်လက်အောက်ခံ ပြည်သူ့စစ်အဖွဲ့ PNO တို့ ယခုပြုနေသည့် လုပ်ရပ်များသည် ဒေသခံများကို တိုက်ပွဲကြား ပါဝင်လာအောင် အနုနည်းဖြင့် ဆွဲခေါ်နေခြင်း ဖြစ်ကြောင်း ဒေသအတွင်း တက်ကြွလှုပ်ရှားသူတစ်ဦးက ပြောသည်။
“ဒါက ကျနော်တို့ ဒေသခံတွေကို အနုနည်းနဲ့ပေါ်တာဆွဲတာပဲ။ သူတို့အစည်းအဝေးခေါ်တယ်။ ဘယ်ရပ်ကွက်မှ မလုပ်ချင်ဘူး။ တစ်ရပ်ကွက်ကို သုံးလေးကြိမ် ခေါ်တယ်။ တစ်ယောက်မှလည်းမလာကြဘူး။ အခုက မလာမချင်း တစ်အိမ် တစ်ယောက် မလာရင် အိမ်သိမ်းမယ်ဆိုတာ ပြောလိုက်တယ်။ သိမ်းခံရမှာကြောက်တော့ ပိုက်ဆံရှိတဲ့ရပ်ကွက်တွေကတော့ ကားတွေ ငှားပေးကြတယ်။ပိုက်ဆံမရှိတဲ့ ရပ်ကွက်တွေက ကင်းစောင့်ပေးရတာပေါ့” ဟု ဒေသအတွင်း တက်ကြွလှုပ်ရှားသူတစ်ဦးက ပြောသည်။
အာဏာသိမ်း စစ်ကောင်စီသည် ၎င်းတို့လက်အောက်ခံဖြစ်သည့် ပအိုဝ်းပြည်သူ့စစ် PNO အဖွဲ့ထိန်းချုပ်ရာ နယ်မြေဒေသအတွင်း ရပ်ရွာလုံခြုံရေးအတွက် တစ်ရွာလျှင် အမျိုးသား ၅ ဦး စစ်မှုထမ်းခိုင်းစေရန်အတွက် ဇန်နဝါရီလ ၂၇ ရက်ကတည်းက လက်နက်နှင့် ခဲယမ်းပစ္စည်းထောက်ပံ့ခဲ့သည်။
Leave a Comments