သျှမ်းပြည် မိုင်းပန်မြို့နယ်တွင် သျှမ်းပြည်ပြန်လည် ထူထောင်ရေးကောင်စီ (RCSS/SSA) ဥက္ကဋ္ဌ ဗိုလ်ချုပ်ကြီးယွက်စစ်မှ လူထုတွေ့ဆုံပွဲ ပြုလုပ်ခဲ့ကြောင်း စုံစမ်းသိရသည်။
ဖေဖော်ဝါရီလ ၁၄ ရက် နံနက် ၁၀ နာရီခန့်မှ စတင်ပြီး မိုင်းပန်မြို့နယ် နားမွန်(ၼႃးဝွၼ်) ကျေးရွာတွင် RCSS ဥက္ကဋ္ဌ ဗိုလ်ချုပ်ကြီးယွက်စစ်မှ လူထုတွေ့ဆုံပွဲ ပြုလုပ်ခဲ့ပြီး အဖွဲ့အစည်း၏ ပေါ်လစီများကို ရှင်းပြခဲ့ကာ ဒေသခံပြည်သူ ၁၀၀၀ နီးပါး တက်ရောက်ခဲ့ကြောင်း မိုင်းပန်ဒေသခံများက ပြောသည်။
“ဒီကာလအတွင်းမှာ ပြည်သူတွေလည်း ဒုက္ခရောက်နေတဲ့အချိန် လူထုတွေ့ဆုံမှုတွေ လုပ်သွားပြီး သူတို့ရဲ့ ပေါ်လစီတွေကို ရှင်းပြသွားမယ်လို့ ပြောတယ်။ သျှမ်းမြောက်က စစ်ဘေးရှောင်တွေ မိုင်းပန်ဘက်ကို ရောက်လာရင် အလုပ်အကိုင်နဲ့ နေရာထိုင်ခင်း ပေးမယ်ပေါ့။ မိုင်းပန်မှာလည်း ရွာဟောင်း ၂၀၀ ကျော်ရှိတော့ အဲ့ဒါတွေကို ပြန်လည်ထူထောင်ပေးချင်တာလည်း ပါတာပေါ့”ဟု ၎င်းလူထုတွေ့ဆုံပွဲသို့ တက်ရောက်ခဲ့သည့် မိုင်းပန်ဒေသခံတစ်ဦးက သျှမ်းသံတော်ဆင့်ကို ပြောသည်။
မိုင်းပန်မြို့နယ်တွင် ပထမဆုံးအကြိမ် ကျင်းပပြုလုပ်ခဲ့သည့် လူထုတွေ့ဆုံပွဲတွင် RCSS ဥက္ကဋ္ဌမှ လက်ရှိနိုင်ငံရေးအခြေအနေ၊ သျှမ်းအမျိုးသား သွေးစည်းညီညွတ်ရေး၊ သျှမ်းပြည်တပ်မတော်၏ ပေါ်လစီနှင့် အုပ်ချုပ်ရေး အခြေအနေများကို ရှင်းပြခဲ့ပြီး ဒေသခံပြည်သူများက ၎င်းတို့၏ အခက်အခဲများကို မေးမြန်းတင်ပြခဲ့ကြောင်း Tai Freedom မီဒီယာမှ ဖေဖော်ဝါရီလ ၁၅ ရက်တွင် ထုတ်ပြန်ထားသည်။
“သျှမ်းမြောက်နဲ့ ဆီဆိုင်လိုမျိုးဆိုရင် စစ်ဖြစ်လာတိုင်း စစ်ဘေးရှောင်ရတယ်ပေါ့။ ပြည်သူတွေက အဲ့လိုမြင်ကြတော့ RCSS အနေနဲ့ စစ်မျက်နှာဖွင့်ရင်လည်း နောက်ဆုံးမှာ ပြည်သူတွေပဲ ထွက်ပြေးရဦးမှာ။ သွားစရာ မြေမရှိ ဖြစ်မှာပေါ့၊ ပြည်သူတွေပဲ ဒုက္ခရောက်ကြမှာ”ဟု လူထုတွေ့ဆုံပွဲသို့ တက်ရောက်နားထောင်ခဲ့သည့် မိုင်းပန်ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ယမန်နှစ် ၂၀၂၃ ဇန်နဝါရီလအတွင်းက RCSS တပ်ဖွဲ့မှ ဦးဆောင်ပြီး မိုင်းပန်မြို့ နားမွန်(ၼႃးဝွၼ်) ကျေးရွာတွင် သျှမ်းပြည်အမျိုးသားနေ့ကို ကျင်းပပြုလုပ်ရန် စီစဉ်ခဲ့ရာ စစ်ကောင်စီတပ်က လာရောက်တားမြစ်ခဲ့ဖူးကြောင်း မိုင်းပန်ဒေသခံများထံမှ သိရသည်။
“ဒီတခေါက် ဗိုလ်ချုပ်ကြီး ယွက်စစ် လာတာလည်း NCA အတိုင်းဆိုရင် ဘာမှ ကျူးလွန်တာမရှိဘူး။ RCSS အနေနဲ့လည်း မတရားအသင်း မဟုတ်ဘူး၊ အကြမ်းဖက် အဖွဲ့အစည်းလည်း မဟုတ်ဘူးဆိုတော့ လွတ်လွတ်လပ်လပ် သွားလာလို့ရတယ်လို့ ပြောရမှာပေါ့။ လောလောဆယ်တော့ လင်းခေးခရိုင်မှာပဲ လှုပ်ရှားနေတာ တွေ့တယ်”ဟု မိုင်းပန်မြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ဆက်ပြောသည်။
လက်ရှိတွင် သျှမ်းပြည် ပြန်လည်ထူထောင်ရေးကောင်စီ/ သျှမ်းပြည်တပ်မတော် (RCSS/SSA) သည် NCA လမ်းစဉ်ကို ဆက်လက်ကိုင်စွဲထားပြီး စစ်ကောင်စီ၏ အမျိုးသား စည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ကော်မတီ (NSPNC)နှင့်လည်း ပုံမှန် တွေ့ဆုံဆွေးနွေးပြီး နိုင်ငံရေးပြဿနာကို တွေ့ဆုံဆွေးနွေးခြင်း နည်းလမ်းဖြင့် ဆက်ဖြေရှင်းမည်ဟု ဇန်နဝါရီလ ၂၉ ရက်က ထုတ်ပြန်ကြေညာထားသည်။
