သျှမ်းပြည်နယ် မြောက်ပိုင်း၊ လားရှိုးမြို့မှ မိုင်းယော် အထွက်ဘက်ရှိ စစ်ကောင်စီ ခမရ (၆၈) တပ်ရင်းမှ ဗိုလ်ကြီး ဦးဆောင်၍ မိုင်းခင်းပြီးနောက် ဦးဆောင်သူ ဗိုလ်ကြီး မိုင်းနင်းမိသဖြင့် ခြေထောက် ဖြတ်လိုက်ရကြောင်း တပ်တွင်း သတင်းရင်းမြစ်က ပြောသည်။
ပြီးခဲ့သည့် ဖေဖော်ဝါရီလ ၆ ရက်တွင် ခမရ (၆၈) တပ်အ၀င်ဂိတ် နေရာလွတ်များတွင် မိုင်းခင်းပြီးနောက် မိုင်းကွင်း အတွင်း သေနတ် ကျန်ခဲ့သဖြင့် ပြန်သွားယူသည့် ဗိုလ်ကြီးဖြိုးပြည့်စုံ (DSA 53) မိုင်းနင်းမိပြီး လားရှိုး စစ်ဆေးရုံသို့ တင်ပို့ ကုသရာ ခြေထောက် တစ်ဖက် ဖြတ်လိုက်ရခြင်း ဖြစ်သည်ဟု ဆိုသည်။
“သူဦးဆောင်ခင်းတဲ့မိုင်း ပြန်နင်းမိတာဗျ။ တိုတစ် ရှည်တစ် ဖြစ်သွားတယ်။ ခုက လားရှိုးကတပ်တွေ အကြောက်လွန်ပြီး တပ်ပတ်ဝန်းကျင်မှာ မိုင်းတွေ အထပ်ထပ် ခင်းနေတာ။ ပြည်သူတွေ စစ်တပ်နား မကပ်ကြဖို့ သတိပေးချင်ပါတယ်” ဟု တပ်တွင်း သတင်းရင်းမြစ်က ပြောဆိုသည်။
အဆိုပါ ခမရ (၆၈) တပ်သည်လားရှိုး-မိုင်းယော် ကားလမ်းမပေါ်တွင် ဂိတ်ဖွင့်ပြီး ငွေတောင်းကြမ်းနေ သဖြင့် ကားသမားနှင့် ခရီးသည်များ ဒုက္ခ ရောက်နေရသည်ဟု ဒေသခံနျားက ဆိုသည်။
လက်ရှိ သျှမ်းပြည်နယ် မြောက်ပိုင်းတွင် တိုက်ပွဲများ ငြိမ်သက်နေသော်လည်း စစ်ကောင်စီတပ်နှင့် ညီနောင်မဟာမိတ်တပ်များ အင်အား အပြိုင်အဆိုင် ဖြည့်တင်းနေသည်သာမက ပြီးခဲ့သည့် ရက်ပိုင်းအတွင်း လားရှိုးမြို့ပေါ်တွင် ဗုံးပေါက်ကွဲမှုများ ဆက်တိုက် ဖြစ်လာသဖြင့် စိုးရိမ်ကြောင်း ဒေသခံများက ပြောသည်။
Leave a Comments