သျှမ်းပြည်သိန္နီမြို့အခြေစိုက် စစ်ဆင်ရေးကွပ်ကဲမှုဌာနချုပ် စကခ-၁၆အနီးရှိ နေအိမ်များတွင် စစ်သားအလောင်းများတွေ့ရှိကြောင်း စုံစမ်းသိရသည်။
လက်ရှိ သိန္နီမြို့နယ်တွင် တိုက်ပွဲများငြိမ်သက်နေသဖြင့် စစ်ဘေးရှောင်များသည် မိမိနေအိမ်သို့ ပြန်သွားကြည့်ချိန် နေအိမ်ခြံဝန်းအတွင်း စစ်သားအလောင်းများအား တွေ့ရှိပြီး ပြန်လည်တူးဖော်ကာ အခြားနေရာသို့သွားမြုပ်ပေးနေရကြောင်း သိန္နီမြို့ဒေသခံအမျိုးသမီးတစ်ဦးက သျှမ်းသံတော်ဆင့်ကိုပြောသည်။
အဆိုပါ စစ်သားအလောင်းများသည် “၁၀၂၇ စစ်ဆင်ရေး” ကာလအတွင်း တိုက်ပွဲကြောင့် ကျဆုံးသွားသည့် စစ်ကောင်စီတပ်ဖွဲ့ဝင်များ၏ အလောင်းများ ဖြစ်သည်။
“မနေ့က ကျမတို့အိမ်ပြန်ပြီး ရှင်းလင်းရေးလုပ်တုန်း တွေ့တာ။ ဘယ်စစ်သားမှ လာမထုတ်ပေးဘူး။ အလောင်း ထုတ်ရဲတဲ့သူတွေကတော့ တူးပြီးအခြားနေရာမှာ သွားမြုပ်ထားလိုက်တယ်။ အလောင်းမထုတ်ရဲတဲ့ သူကတော့ လူငှားပြီးတူးခိုင်းရတယ်” ဟု ကောင်းဟော်ရွာ အမျိုးသမီး က သျှမ်းသံတော်ဆင့်ကို ပြောသည်။
လက်ရှိ ဒေသခံနေအိမ်ခြံဝန်းအတွင်း တွေ့ရှိထားသည့် စစ်သားအလောင်းများမှာ ၁၀ လောင်းထက်မနည်း ရှိပြီးဖြစ်သလို ဆက်ပြီးတွေ့ရှိနေသေးသည့် အလောင်းများလည်း ရှိနေသေးကြောင်း ဆိုသည်။
“အရင်ရှေ့ရက်တွေလည်း အလောင်းတွေ့ထားတယ်။ အလောင်းတွေကတော့ ရေတွက်လို့ တောင်မရတော့ဘူး။ ထပ်တွေ့တဲ့အလောင်းတွေကော၊ မမြုပ်ရသေးတဲ့အလောင်းတွေ ရှိနေတာ”ဟု ၎င်းဒေသခံတစ်ဦးက ဆက်ပြောသည်။
ထို့အပြင် တိုက်ပွဲကြောင့် သိန္နီမြို့ ဒေသခံအများစုသည် လားရှိုးမြို့ ထွက်ပြေးတိမ်းရှောင်နေရပြီး လက်ရှိအချိန်ထိ တိုက်ပွဲငြိမ်သက်သော်လည်း နေအိမ်ပျက်စီးများပျက်စီးသွားခြင်းကြောင့် နေရပ်သို့ပြန်လည်နေထိုင်ခြင်း မပြုကြသေးပေ။
တစ်ဖက်တွင် သိန္နီမြို့ကို ထိန်းချုပ်ထားသည့် ကိုးကန့်တပ်ဖွဲ့ MNDAAတပ်ဖွဲ့က နေရပ်သို့ ပြန်လာခြင်းမရှိသည့် ဒေသခံနေအိမ်များကို ချိတ်ပိတ်ခြင်း၊ သိမ်းဆည်းခြင်း ပြုလုပ်နေကြောင်း သတင်းသိရသည်။
Leave a Comments