ဆီဆိုင်မြို့နယ်မှ လွိုင်လင်လေးသို့နေရပ်ပြန်သွားသော စစ်ရှောင်များ စားဝတ်နေရေး အခက်အခဲကြုံတွေ့နေ ကြောင်း သိရသည်။
သျှမ်း-ကရင်နီနယ်စပ်တကြောရှိ တိုက်ပွဲများကြောင့် ဆီဆိုင်မြို့နယ်ထဲသို့ ထွက်ပြေးတိမ်းရှောင်လာသူများသည် လွိုင်လင်လေးမြို့ကို နေရပ်ပြန်သွားခဲ့ကြပြီး စိုးရိမ်မှုများနှင့် စားဝတ်နေရေးအတွက် အခက်အခဲများ ကြုံတွေ့ နေရကြောင်း စစ်ရှောင်အမျိုးသားတစ်ဦးက သျှမ်းသံတော်ဆင့်ကိုပြောသည်။
“ခုက တခြားနေရာ တွေထပ်ပြေးဖို့က အခက်အခဲရှိလို့ ကိုယ်နေရပ်ကိုပြန်ခဲ့တာပေါ့။တိုက်ပွဲတွေကငြိမ်နေပါတယ်ဆိုပေမယ့် စားဝတ်နေရေး အတွက်ကအခက်တွေ့နေတာပေါ့ ။ဆီဆိုင်နဲ့ဆိုက်ခေါင်မှာလည်းသွားဝယ်လို့မရဘူးလို့လေ။”ဟု စစ်ဘေးရှောင်အမျိုးသားတစ်ဦးက ပြောသည်။
လွိုင်လင်လေးမြို့နယ်မှ ပင်လောင်းမြို့နယ်ရှိ နမ့်တုတ်ရွာတွင် ဈေးသွားဝယ်နေကြရပြီး သွားလာရေးအတွက် အခက်အခဲများလည်းရှိနေကြောင်းကို စစ်ရှောင်အမျိုးသားတစ်ဦးက ဆက်ပြောသည်။
“တောလမ်းကနေသွားရတာ ပင်လောင်းမြို့နယ်ထဲမှာရှိတဲ့ နမ့်တုတ်ရွာကို သွားရတာ။၆ မိုင်လောက်တော့ မကဘူး။ ကားတွေနဲ့တော့ သွားလို့ရတယ်။တိုက်ပွဲတွေမရှိတော့ဘူးဆိုပေမယ့် ဗုံးတွေကိုတော့ ကြောက်ရတာပေါ့ လမ်းတွေမှာ အဲ့လိုတွေ စိုးရိမ်နေရတာပေါ့။”ဟု စစ်ရှောင်အမျိုးသားတစ်ဦးက ပြောသည်။
ထိုအပြင် ဖေဖော်ဝါရီလ ၆ ရက် ညနေပိုင်းမှစပြီး လူအင်အား ၃၀၀ ကျော်ရှိသည့် စစ်ကောင်စီတပ်ဖွဲ့ဝင် တပ်သားများသည် ဆီဆိုင်မြို့နယ် ဆိုက်ခေါင်စံပြကျေးရွာရှိ ဇောတိက ရာမကျောင်းဝန်းအတွင်း လာရောက်တပ်စွဲထားကြောင်း သိရသည်။
အလားတူ စစ်ကောင်စီတပ်ဖွဲ့မှ ပစ်ခတ်လိုက်သည့် လက်နက်ကြီးများကြောင့် ဆီဆိုင်မြိုနှင့် ၇ မိုင်အကွာတွင်ရှိသည့် ထီတမောင်းဘုန်းကြီးကျောင်းသို့ ယမန်နေ့ (ဇန်နဝါရီလ ၇ ရက်) ကျရောက်ပေါက်ကွဲပြီး ကျောင်းဇရပ်နှင့်ဓမ္မာရု့အဆောက်အဦး ပျက်စီးခဲ့သည်။
သျှမ်းပြည် ဆီဆိုင်မြို့နယ်တွင် စစ်ကောင်စီ လက်အောက်ခံ ပအိုဝ်းပြည်သူစစ် (PNO/PNA) နှင့် ပအိုဝ်းအမျိုးသား လွတ်မြောက် ရေးတပ်မတော် (PNLO/PNLA) တို့တိုက်ပွဲများကြောင့် ဒေသခံများနှင့် ကရင်နီစစ်ရှောင်များ လူဦးရေ သောင်းချီ ထွက်ပြေးတိမ်းရှောင်နေရကြောင်း သိရသည်။
