သျှမ်းပြည် ဆီဆိုင်မြို့ကို စစ်ကောင်စီတပ်ဖွဲ့မှ လက်နက်ကြီးဖြင့် ပစ်ခတ်ခဲ့သောကြောင့် မြို့ပေါ်သို့ ကျရောက်ပေါက်ကွဲပြီး ဆိုင်ခန်း ၆ ခန်းမီးလောင်သွားကြောင်း စုံစမ်းသိရသည်။
ယနေ့ (ဇန်နဝါရီလ ၂၈ ရက်) နေ့လည် ၂ နာရီခွဲဝန်းကျင်မှစပြီး ဆီဆိုင်မြို့နယ် ဆိုက်ခေါင်စံပြကျေးရွာအနီးရှိ စစ်ကောင်စီတပ်ဖွဲ့မှ လက်နက်ကြီးဖြင့် ပစ်ခတ်ခဲ့သောကြောင့် ဆီဆိုင်မြို့မဈေးအရှေ့သို့ ကျရောက်ပေါက်ကွဲပြီး ဆိုင်ခန်း ၆ ခန်းမီးလောင် ပျက်စီးသွားကြောင်း PNLA ၏တပ်ဖွဲ့ဝင်တပ်သားတစ်ဦးက ပြောသည်။
“သူတို့ဆိုက်ခေါင်ကနေ လက်နက်ကြီးနဲ့ လှမ်းထုတာ။ ဆီဆိုင်မြို့ပေါ်ကို လာကျပြီး မြို့မဈေးအရှေ့ ဘက်က ဆိုင်ခန်းတွေမီးလောင်သွားတာ။ အကုန်တော့ မလောင်ဘူး။ အစောပိုင်းလောင်တာကတော့ ၆ ဆိုင်လောက်တော့ လောင်သွားတယ်။ ပစ္စည်းတွေလည်း အကုန်လောင်သွားတာပေါ့။ အခုတော့ မီးငြိမ်းသွားပြီ” ဟု ၎င်းက ပြောသည်။
အဆိုပါ ဆိုင်ခန်းများမီးလောင်သွားခြင်းနှင့် ပတ်သက်၍ ပျက်စီးသွားသည့် တန်းဖို့ကိုတော့ အသိအစိတ်ကို မသိရသေးကြောင်း ဆိုသည်။
အလားတူ ဆီဆိုင်မြို့ပေါ်ကို ယနေ့ တစ်နေကုန်နီးပါး စစ်ကောင်စီက လေယာဉ်ဖြင့် လာရောက် ဗုံးကြဲတိုက်ခိုက်နေလျက်ရှိကြောင်း သိရသည်။
ထိုကဲ့သို့ စစ်ကောင်စီဘက်မှ လက်နက်ကြီးနှင့် လေကြောင်းဗုံးကြဲတိုက်ခြင်း အပြင်းအထန် ပြုလုပ်နေသောကြောင့် ဒေသခံများအနေဖြင့် ဘေးလွတ်ရာ နေရာသို့ ထွက်ပြေးတိမ်းရှောင်ရန်၊ တိုက်ပွဲနီးစပ်ရာ ဒေသများတွင် မနေကြရန် PNLA ၏တပ်ဖွဲ့ဝင်တပ်သားတစ်ဦးက တောင်းဆိုထားသည်။
“အဓိကတော့ ပိတ်မိနေတဲ့ဒေသခံအနေနဲ့ စစ်ကောင်စီနဲ့နီးစပ်ရာ နေရာတွေမှာ အသက်နိုင်ဆုံး ရှောင်ပေးဖို့လိုတယ်။ ဖြစ်နိုင်ရင် မြို့အနီးမှာ မရှောင်တာအကောင်းဆုံးပဲ။ ဟိုပုံး၊ ဆီဆိုင်မြို့တွင်းမှာ မရှောင်တာ အကောင်းဆုံးပဲ” ဟု ၎င်းကတိုက်တွန်းထားသည်။
ပြီးခဲ့သည့် (ဇန်နဝါရီလ ၂၂ ရက်) မှ (ယနေ့ ဇန်နဝါရီလ ၂၈ ရက်)အထိ ဆီဆိုင်မြို့နယ်တွင် ဖြစ်ပွားသည့် တိုက်ပွဲအတွင်း လက်နက်ကြီးနှင့် လေကြောင်းတိုက်ခိုက်မှုကြောင့် အမျိုးသား ၁ ဦးနှင့် အမျိုးသမီး ၁ ဦး သေဆုံးပြီး ပြည်သူ ၄ ဦး ထိခိုက်ဒဏ်ရာရရှိခဲ့သည်။
Leave a Comments