Monday, July 22, 2024

ဆီဆိုင်သို့ စစ်ရှောင်လာသည့် ကရင်နီပြည်သူများ ထပ်မံပြောင်းရွှေ့ရ

Must read

ဆီဆိုင်မြို့နယ်သို့ လာရောက်စစ်ဘေးရှောင်နေသော ကရင်နီစစ်ရှောင်များသည် ဆီဆိုင်တိုက်ပွဲကြောင့် ထပ်ပြီး စစ်ဘေးရှောင်နေရကြောင်း ကရင်နီစစ်ရှောင်များထံ သတင်းသိရသည်။

ဆီဆိုင်မြို့နယ် စစ်ရှောင်

သျှမ်းပြည်နယ်တောင်ပိုင်း၊ ဆီဆိုင်မြို့နယ်မှာ ပအိုဝ်းအမျိုးသားလွတ်မြောက်ရေး တပ်မတော် ( PNLO/PNLA) ၊ KNDF၊ PDF ပူးပေါင်းတပ်ဖွဲ့နှင့် PNO ၊ စစ်ကောင်စီ ပူးပေါင်တပ်ဖွဲ့များသည် ဇန်နဝါရီလ ၂၄ ရက်တွင် တိုက်ပွဲ ပြင်းထန်စွာဖြစ်ပွားခဲ့ပြီး မြို့ခံအပါအဝင် ကရင်နီစစ်ရှောင်များ ထပ်မံ ထွက်ပြေးတိမ်းရှောင်နေရသည်။

ကရင်နီစစ်ရှောင်များသည် စစ်ဘေးဒဏ်ကို ထပ်ဆင့်ခံစားရ၍ နောက်ထပ်စစ်ရှောင်ရလျှင် နေစရာ အခက်အခဲများစွာ ရှိနိုင်ကြောင်း စစ်ရှောင် တစ်ဦးက သျှမ်းသံတော်ဆင့်ကို ပြောသည်။

” လွိုင်ကော်ကနေ ဆီဆိုင်ကို စစ်ရှောင်ရတယ်။ အခုလည်း ထပ်ပြီး ပြေးရပြန်ပြီ။နေဖို့နေရာလဲ မကျန်တော့ဘူး။ စိတ်တွေလည်း မခိုင်တော့ဘူး။ ဘယ်တောမှ ဒီလိုပြေးနေရတာလွတ်မလည်း မသိဘူး။”ဟု ကရင်နီ စစ်ရှောင်တစ်ဦးကဆိုသည်။

စစ်ရှောင်နေရသဖြင့် ဝင်ငွေမရှိဘဲ အလှူရှင်များနှင့်သာ ရပ်တည်နေရ၍ နေထိုင်စားသောက်ရေး အတွက်ပါ ရှေ့ဆက်စိုးရိမ်နေရကြောင်း သိရှိရပါသည်။

ဆီဆိုင်မြို့နယ် စစ်ရှောင်များ

” လာလှူကြာတာနဲ့ပဲ စားရတာပေါ့။ ဝင်ငွေကလဲမရှိဘူးလေ။ နိုင်ငံရေးခြေနေက မတည်မငြိမ်နဲ့ဆိုတော့ အလှူရှင်တွေလဲ နဲလာတယ်။ ကိုယ့်ဒေသမဟုတ်တော့ ဘာမှလုပ်ကိုင်မစားတတ်ဘူး။ ဘာတွေဆက်ဖြစ်လာမလဲမသိဘူး။ သေမလား အသက်ရှင်မလားပဲ။”ဟု စစ်ရှောင်အမျိုးသမီးက ပြောပါသည်။

ဆီဆိုင်မြို့မရဲစခန်းကို ဇန်နဝါရီ ၂၄ ရက် ညနေပိုင်းတွင် PNLA နှင့်မဟာမိတ်ပူးပေါင်းအဖွဲ့တွေက တိုက်ခိုက်သိမ်းပိုက်ခဲ့ပြီး ညအချိန်တွင် စစ်ကောင်စီတပ်တွေက လေယာဥ်ဖြင့် ဗုံးကြဲသဖြင့် နေအိမ်များပျက်စီးပြီး ပြည်သူများ ထိခိုက်ဒဏ်ရာ ရရှိခဲ့ကြောင်း သိရသည်။

Leave a Comments

- Advertisement -spot_img

Latest article