သျှမ်းပြည် အခြေစိုက် လက်နက်ကိုင် တပ်ဖွဲ့ တစ်ခုဖြစ်သည့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) မှ “၁၀၂၇ စစ်ဆင်ရေး” ကာလအတွင်း ခိုးယူခံရသည့် ပစ္စည်းများ ပြန်လည်ပေးပို့ရန် အသိပေး ထုတ်ပြန်လာခဲ့သည်။

ဇန်နဝါရီလ (၂၃) ရက်စွဲဖြင့် PSLF/TNLA မှ အများပြည်သူပိုင် ပစ္စည်းများအား မူလနေရာဌာနသို့ ပြန်လည်ပေးပို့ရန် အသိပေးအကြောင်းကြားထားသည်။

ထို့အပြင် အဆိုပါ ထုတ်ပြန်ချက်၌ “မြို့သိမ်းတိုက်ပွဲ (1027 – Operation) ဆင်နွဲသည့် ကာလတွင် ဌာနဆိုင်ရာ အသီးသီးရှိ ရုံးပိုင် ပစ္စည်းများ၊ စက်ယန္တရားများ၊ ပရိဘောဂပစ်စည်းများ၊ စာရွက်စာတမ်းများကို မသမာသူများမှ ခိုးယူသွားကြောင်း စုံစမ်းသိရသည့်အတွက် ခိုးယူသွားသည့် ပစ္စည်းများအား မူလနေရာသို့ ပြန်လည်ပေးပို့ရမည်” ဟု ရေးသားဖော်ပြထားသည်ကို တွေ့ရသည်။

ထို့ အသိပေး ထုတ်ပြန်သည့် အတိုင်း လိုက်နာ ဆောင်ရွက်မှု မရှိကြောင်း စစ်ဆေးတွေ့ရှိပါက ထိရောက်စွာ အရေးယူခြင်း ခံရမည်ဟုလည်း မှတ်ချက်အဖြစ် ရေးသားဖော်ပြထားသည်ကို တွေ့ရှိရသည်။

သျှမ်းမြောက်ဒေသအတွင်း ဖြစ်ပွားခဲ့သည့် ၁၀၂၇ စစ်ဆင်ရေး အကြား မူဆယ်ခရိုင်၊ နမ့်ခမ်းမြို့နယ်၊ နောင်တင်း ကျေးရွာအတွင်း၌ PSLF/TNLA တပ်သားများမှ အရပ်သား ပြည်သူပိုင် ပစ္စည်းများ ရိုက်ခွဲဖျက်ဆီးခြင်း၊ နေအိမ်များကို ဖောက်ထွင်းဝင်ရောက်ကာ အိမ်တွင်းပစ္စည်းများ ခိုးယူခြင်းတို့ ကျူးလွန်ခဲ့ကြောင်းလည်း ဒေသခံများ၏ ပြောပြချက် အရ သိရသည်။

ထို့အပြင် နမ္မတူမြို့နယ်အတွင်း စစ်ကောင်စီ နှင့် TNLA တို့၏ တိုက်ပွဲ အပြီး စစ်ရှောင်ထွက်ပြေးသည့် ဒေသခံများ နေရပ်အတွင်း အမြန်ပြန်လာကြရန်နှင့်၊ သတ်မှတ်ထားသည့် နေ့ရက်အတွင်း နေအိမ်သို့ ပြန်ရောက်နေထိုင်မှု မရှိပါက နေအိမ်များကို သိမ်းဆည်းယူမှုလည်း TNLA တပ်မှ ခြိမ်းခြောက်ပြောဆိုမှု ရှိခဲ့ကြောင်း ဒေသခံများထံမှ သိရသည် ။

ယင်းကဲ့သို့ PSLF/TNLA အသိပေး ထုန်ပြန်စာ နှင့် TNLA ၏ တပ်သားများမှ အရပ်သား နေအိမ်များ ဖောက်ထွင်း ဖျက်ဆီးခြင်းများ နှင့် ပတ်သက်ပြီး အသေးစိတ် မေးမြန်း သိရှိနိုင်ရန် အတွက် တပ်ဖွဲ့၏ ပြောရေးဆိုခွင့် နှင့် ဆက်ဆံရေး တာဝန်ရှိသူများထံသို့ ဆက်သွယ်ခဲ့သော်လည်း အဆက်အသွယ်မရခဲ့ပေ။

၁၀၂၇ စစ်ဆင်ရေး ကာလအတွင်း TNLA တပ်ဖွဲ့သည် စစ်ကောင်စီ အခြေစိုက် မြို့/ မြို့နယ်များဖြစ်ကြသည့် နမ့်ဆန်၊ မန်တုံ၊ မိုင်းလုံ၊ နမ့်ခမ်းမြို့ နှင့် နမ္မတူမြို့ကဲ့သို့ သျှမ်းမြောက်ရှိ စစ်ကောင်စီတပ်စခန်း ကျော်ကို TNLA တပ်ဖွဲ့က တိုက်ခိုက်သိမ်းပိုက်ထားကြောင်း ထုတ်ပြန်ထားသည်ကို တွေ့ရသည်။

၎င်းတို့တိုက်ခိုက် ထိန်းချုပ်နိုင်သည့် မြို့နယ်များကို ၎င်းတို့၏ အုပ်ချုပ်ရေး ယန္တရားများဖြင့် စတင်လည်ပတ် နေကြသော်လည်း တချို့သော မြို့နယ်ရှိ ဒေသခံများက ကန့်ကွက်မှု ရှိနေကြောင်းလည်း သိရသည်။