သျှမ်းပြည် ဆီဆိုင်မြို့ရှိ လမ်းမပေါ်ရှိ စစ်ကောင်စီဂိတ်များကို ပအိုဝ်းအမျိုးသားများ လွတ်မြောက်ရေး အဖွဲ့ချုပ် (PNLO)နှင့် ကရင်နီအမျိုးသား ကာကွယ်ရေးတပ်ဖွဲ့KNDF၊ PDF ပူးပေါင်းတပ်ဖွဲ့တို့ စတင်ထိုးစစ်ဆင် တိုက်ခိုက်၍ မြို့တွင်းတိုက်ပွဲဖြစ်ပွားနေကြောင်း ဆီဆိုင်ဒေသခံများပြောပြချက်အရသိရသည်။
ယနေ့ (ဇန်နဝါရီလ ၂၄ ရက်) နံနက်အစောပိုင်းအချိန်မှစ၍ ဆီဆိုင်မြို့၏ တောင်ဘက် (၃) မိုင်ခန့်ဝေးသော ဆီဆိုင်-လွိုင်ကော် ကားလမ်းမပေါ်ရှိ ပအိုဝ်းပြည်သူ့စစ် PNO စစ်ဆေးရေးကို PNLO၊ KNDF နှင့် PDF ပူးပေါင်းတပ်ဖွဲ့တို့ တိုက်ခိုက်ပြီး လမ်းမအတိုင်း မြောက်ဘက်အရပ်ကိုမူ၍ ထိုးစစ်ဆင်တိုက်ခိုက်လာခဲ့ကြောင်း ဆီဆိုင်ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။
ထို့နောက် ဆီဆိုင်မြို့အဝင် ဆိုင်းဘုတ်အနီးရှိ စစ်ကောင်စီ ဌာနဆိုင်ရာ စစ်ဆေးရေးဂိတ်ကိုထပ်မံ တိုက်ခိုက်ပြီး ဝင်ရောက်လာရာ ယင်းမြို့ထဲရှိ စစ်ကောင်စီတပ်၊ ပအိုဝ်းပြည်သူ့စစ် PNO တို့နှင့် ထိတွေ့တိုက်ပွဲ ဖြစ်ပွားခဲ့သည်။
“ ဒီနေ့မနက် PNO စစ်ဆေးရေးဂိတ်တွေ၊ ဌာနပေါင်းစုံ စစ်ရေးဂိတ်ကို သူတို့ဝင်တိုက်တာ။ အခုမြို့အဝင် ရွှေညောင်ပင် ဓာတ်ဆီဆိုင်နားမှာ တိုက်ပွဲဖြစ်နေတယ်” ဟု ဒေသခံတစ်ဦးက ပြောသည်။
လက်ရှိသတင်းရေးသားချိန်ထိ ဆီဆိုင်မြို့ ဘေးပတ်ပတ်လည်နှင့် မြို့အဝင်တွင် ထိတွေ့တိုက်ပွဲများ ဖြစ်ပွားနေသေးကြောင်း ဒေသခံများပြောပြချက်အရသိရသည်။
အလားတူ စစ်ကောင်စီဘက်မှ လေယာဉ်ဖြင့် လာရောက်ပျံဝဲနေသဖြင့် ဆီဆိုင်မြို့ရှိ ပြည်သူများ ကြောက်လန့်တကြား ထွက်ပြေးတိမ်းရှောင်နေရကြောင်း ဆိုသည်။
သို့သော် ရုတ်တရက် မြို့တွင်းတိုက်ပွဲ ဖြစ်ပွားလာသောကြောင့် ကြိုတင်ပြင်ဆင်ချိန် မရှိဘဲ ထွက်ပြေးရသူများ ရှိသလို ထွက်မပြေးနိုင်ဘဲ တိုက်ပွဲကြား ပိတ်မိနေသူများရှိလည်း ကျန်ရှိနေသည်။
“နော်ထောင်မှာပဲ ရှိသေးတယ်လို့ထင်တာ။ ဒီနေ့မနက်သူတို့ရုတ်တရက် တက်လာသော မြို့နဲ့ကပ်ရပ် ရွာတွေမှာ ရှောင်ချိန်လည်းမရလိုက်ဘူး။ ပြင်ဆင်ချိန်လည်းမရဘူး။ တချို့ကြိုတင်သိထားတဲ့သူ၊ သတ္တိဝီရိယရှိထားတဲ့သူတွေကတော့ အထုပ်အပိုးတွေနဲ့ ကြိုတင်ပြင်ဆင်ထားမှုရှိတယ်။ ဒီနေ့အခြေအနေထားမျိုး ကျနော်တို့ထွက်လာတုန်းကဆို တချို့ဘာမှမပြင်ဆင်ထားဘူး။ ဈေးဆိုင်တောင်ဖွင့်နေသေးတယ်။ မထင်ထားဘူးပေါ့” ဟု ဒေသခံတစ်ဦးက ထပ်လောင်းပြောသည်။
ပြီးခဲ့သည့် (ဇန်နဝါရီလ ၂၁ ရက်) တွင် ဟိုပုံးမြို့နယ် မဲနယ်တောင်ဒေသအတွင်း ပအိုဝ်းအမျိုးသား လွတ်မြောက်ရေးတပ်မတော် (PNLO) တို့ လက်နက်များသယ်ဆောင်လာပြီး စံဖူးကျေးရွာရှိ စစ်ကောင်စီတပ်ဖွဲ့၊ PNO တပ်ဖွဲ့တို့နှင့် ထိပ်တိုက်ဆိုင်ရင် ပစ်ခတ်မှုဖြစ်စဉ်အပြီး နောက်နှစ်ရက်တွင် ဆီဆိုင်မြို့နယ် နောင်ထော်ကျေးရွာမှာ တိုက်ပွဲစတင်ဖြစ်ပွားလာခဲ့သည်။
ထိုနောင်ထော်ကျေးရွာ တိုက်ပွဲအတွင်း စစ်ကောင်စီတပ်စခန်း ၂ ခုအပါအဝင် ပအိုဝ်းပြည်သူ့စစ် PNO တပ်စခန်းကို ပအိုဝ်းအမျိုးသားလွတ်မြောက်ရေးတပ်မတော် (PNLO)မှ ယမန်နေ့ (ဇန်နဝါရီလ ၂၃ )တွင် သိမ်းပိုက်နိုင်ခဲ့ကြောင်း သိရသည်။
ဆီဆိုင်မြို့နယ် တိုက်ပွဲတွင် ပအိုဝ်းအမျိုးသားလွတ်မြောက်ရေးတပ်မတော် (PNLO)၊ ကရင်နီအမျိုးသား ကာကွယ်ရေးတပ်ဖွဲ့KNDF၊ PDF ပူးပေါင်းတပ်ဖွဲ့တို့အပြင် သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) တပ်မှပါဝင်ပူးပေါင်း တိုက်ခိုက်နေကြောင်း သတင်းသိရသည်။
