သျှမ်းပြည် နမ့်ခမ်းမြို့နယ်ထဲ ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SS) ကို တပ်သားစုဆောင်းခြင်း၊ စစ်ရေး၊အုပ်ချုပ်ရေး ငွေကြေး ကောက်ခံခြင်း ဆက်မလုပ်ရန် တအာင်း (ပလောင်)အမျိုးသားလွတ်မြောက်ရေးတပ်မတော် (TNLA) က အသိပေးလိုက်သည်။

ညီနောင်မဟာမိတ်ဖြစ်သည့် SSPP/SSA မှ တပ်သားစုဆောင်းရေး ကိစ္စအပါအဝင် စစ်ရေး၊အုပ်ချုပ်ရေးငွေကြေး ကောက်ခံရေး စသည့် ကိစ္စများကို ဆက်လက်မလုပ် ဆောင်ရန် PSLF/TNLA မှအထူးမေတ္တာရပ်ခံကြောင်း ဇန်နဝါရီ ၂၁ရက်စွဲဖြင့် အသံပေးစာပေးပို့ခဲ့သည်။

“ ဒီစာက အမှန်ပါ။ ကျနော်တို့ (SSPP) ကို တိုက်ရိုက်ပို့လာတဲ့စာပါ။ ဘယ်လို လူမှုကွန်ရက်ပေါ်လွတ်သွားလဲမသိဘူး။ ဒီကိစ္စနဲ့ပတ်သက်ပြီးတော့ လူကြီးတွေ ဘာမှ ဆွေးနွေးတာမရှိသေးဘူးဗျ” ဟု SSPP ၏ အရာရှိတစ်ဦးက သျှမ်းသံတော်ဆင့်ကိုပြောသည်။

နမ့်ခမ်းမြို့အပါအဝင် မြန်မာနိုင်ငံတစ်ခုလုံကို ၁၉၅၈ခုနှစ်မှ စတင်ပြီး ဗမာစစ်အာဏာရှင် အဆက်ဆက်တို့၏ သိမ်းပိုက်ပြီး ဖိနှပ်ကျင့်မှု၊ မတရားသဖြင့် အုပ်ချုပ်ရေးစီမံမှုတို့ကို နှစ်ပောင်းများစွာခံခဲ့ရပြီး နမ့်ခမ်းမြို့သည် ၁၀၂၇ စစ်ဆင်ရေးတွင် ဗမာစစ်အာဏာရှင်အောက်မှ လွတ်မြောက်ကြောင်း ဒေသခံပြည်သူများထံ ‌ရောက်ရှိခဲ့ပြီးပြဖြစ်ကြောင်း SSPP ထံပေးပို့သည့်စာတွင် ရေးသားထားသည်။

ထို့အပြင် နမ့်ခမ်းမြို့ဧရိယာအတွင်းရှိ ပြည်သူများသည် ယခုချိန်တွင် လွတ်မြောက်လွတ်လပ်သည့် ပြည်သူများ ဖြစ်ကြောင်း၊ နမ့်ခမ်းမြို့နယ်ရှိ ဗမာစစ်အာဏာရှင်အုပ်စုကို ဖယ်ရှားရှင်းလင်း‌မောင်းနှင်ထုတ်သည့် PSLF/TNLA မှလည်း နမ့်ခမ်းမြို့နယ်ရှိပြည်သူများ၏ သဘောတူဆန္ဒအတိုင်း နမ့်ခမ်းမြို့နယ်ကို တည်ငြိမ် အေးချမ်း ဖွံ့ဖြိုးလာအောင် တာဝန်ယူဆောင်ရွက်ရခြင်းဖြစ် သည်ဟု အဆိုပါစာတွင် ဖော်ပြထားသည်။

ထို့ကြောင့် တည်ငြိမ်အေးချမ်း လုံခြုံမှုရှိနေပြီ ဖြစ်သည့် နမ့်ခမ်းမြို့နယ်အတွင်း ညီနောင်မဟာမိတ်ဖြစ်သည့် SSPP/SSA တပ်သားစုဆောင်ရေးကိစ္စရပ်အပါအဝင် စစ်ရေး၊ အုပ်ချုပ်ရေး၊ ငွေကြေးကောက်ခံရေး စသည့်ကိစ္စများ ဆက်လက် မလုပ်ဆောင်ရန် TNLA က မေတ္တာရပ်ခံထားသည်။

အထက်ပါ ပေးပို့ချက်နှင့် ပတ်သတ်၍ SSPP/SSA မှ နမ့်ခမ်းမြို့နယ်ရှိ ဒေသခံ သျှမ်းလူထု မိဘပြည်သူများ ကို ကျေးရွာလုံခြုံ‌ရေးတပ်ဖွဲ့စည်းရန်၊စစ်မှုထမ်းရန်ဆောက်ရွက်နေသည်ကို TNLA၏ ရပ်ရွာ အုပ်ချုပ်ရေးမှုးအဖွဲ့ များမှ အုပ်ချုပ်ရေးဌာနမှ တင်လာသည့်အတွက် PSLF/TNLA ဗဟိုနှင့် မဟာမိတ် ရေးရာဌာန မှ သိရကြောင်း ဇန်နဝါရီလ ၂၁ ရက်နေ့တွင် SSPP/SSA ထံသို့ ပေးပို့ခဲ့ကြောင်း သိရသည်။

ပြီးခဲ့သည့် ဇန်နဝါရီ ဒုတိယအပတ်တွင်သျှမ်းမြောက် နမ့်ခမ်းမြို့နယ် SSPP/SSA မှ မြို့ထဲ ရပ်ကွက်နှင့် ကျေးရွာ အုပ်ချုပ်ရေးမှူးများကို အစည်းအဝေးခေါ်ပြီး တပ်သားသစ် စုဆောင်းပေးရန်ပြောဆိုခဲ့ပြီးနောက်မှာ TNLA က ယခုလို စာပေးပို့ခြင်းဖြစ်သည်။

သို့သော် ဇန်နဝါရီ ၂၁ရက် နေ့လည် ၁၂နာရီကျော်တွင် နမ့်ခမ်းမြို့နယ် နောင်မလုံကျေးရွာအတွင်းသို့ စစ်ကောင်စီမှ လေကြောင်းဖြင့် ဗုံးကြဲမှုပြုလုပ်ခဲ့ပြီး ဒေသခံ နှစ်ဦး ထိခိုက်ဒဏ်ရာရရှိခဲ့ကာ နေအိမ်များ ပျက်စီးမှုရှိကြောင်း သိရသည်။

လွန်ခဲ့သည့် ဇန်နဝါရီလပိုင်းတွင်လည်း TNLA မှ နမ့်ခမ်းကျေးရွာအုပ်ချုပ်ရေးမှူးများကို ခေါ်ဆိုပြီး နမ့်ခမ်းမြို့နယ် အတွင်း သန်းခေါင်စာရင်းကောက်ယူရန်နှင့် နမ့်ခမ်းမြို့နယ်အတွင်းရှိ ရွှေလီမြစ် ကူးတို့ဆိပ်များတွင် လေလံဆွဲသူများ၊ သား၊ငါး ကုန်စည်ဒိုင်းများမှ လေလံဆွဲသူများအပြင် စီးပွားရေးလုပ်ငန်းရှင်များကိုလည်း ဆင့်ခေါ်ပြီး အခွန်ကိစ္စ များဆွေးနွေးခဲ့ကြောင်းသိရသည်။