သျှမ်းပြည် ဟိုပုံးမြို့နယ် စံဖူးကျေးရွာ အနီးတွင် ပအိုဝ်းအမျိုးသားတပ်မတော်/ ပအိုဝ်း အမျိုးသား အဖွဲ့ချုပ် (PNO/PNA) နှင့် ပအိုဝ်းအမျိုးသားလွတ်မြောက်ရေးတပ်မတော် (PNLA) တို့ အဖွဲ့ တိုက်ပွဲ ပြင်းထန်နေမှုကြောင့် ဒေသခံများ ပိတ်နေကြောင်း သတင်းရရှိသည်။
ဟိုပုံးမြို့နယ်၊ မဲနယ်တောင်ဒေသ စံဖူးကျေးရွာအနီးတွင် PNO/PNA နှင့် PNLA တို့က ယနေ့ ဇန်နဝါရီလ ၂၁ ရက် နံနက်အစောပိုင်းတွင် တိုက်ပွဲ ဖြစ်ပွားလျှက်ရှိပြီး ဒေသခံများ ပိတ်မိနေကြသည်။
ထိုသို့ တိုက်ပွဲ ပြင်းထန်နေမှုကြောင့် မဲနယ်တောင်သို့ လာရောက်ကြသည့် ခရီးသွားများအပြင် ဒေသခံများ ပိတ်မိနေကြကြောင်းသိရှိရသည်။
” ကျနော်တို့က မဲနယ်တောင်ကို အလည်လာကြတာ။ အခုက ရုတ်တရက်တိုက်ပွဲ ထဖြစ်တော့ ဘာလုပ်လို့ ဘာကိုင်ရမှန်းမသိတော့ဘူး။ လမ်းတွေလည်း ပိတ်ထားတော့ သွားစရာလည်း မရှိဘူး”ဟု မဲနယ်တောင် ခရီးသွားတစ်ဦးကပြောပါသည်။
ထို့အပြင် ပိတ်မိနေသူများထဲတွင် သက်ကြီးရွယ်အိုနှင့် နာမကျန်းဖြစ်နေသည့် ဒေသခံများလည်း ရှိတာကြောင့် စိုးရိမ်မှုရှိနေကြောင်းလည်းသိရပါသည်။
” အခုက အိမ်အောက်ထပ်မှာ ဝင်ပုန်းနေရတာ။ အပြင်လဲမထွက်ရဲဘူး။ နေမကောင်းဖြစ်နေတဲ့ အမေအတွက်လဲ စိတ်ပူတယ်။ တစ်ခါမှ မကြုံဖူးတော့ လန့်ပြီးငိုချင်တာပဲသိတယ်။ဘာတွေ ဆက်ဖြစ်လာမလဲ မသိတော့ဘူး”ဟု ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။
လက်ရှိတွင် စစ်ကောင်စီတပ်သားနှင့် PNOပြည်သူ့စစ်များက စငေါ်ကျေးရွာမှစပြီး စံဖူးဒေသထိ လမ်းတစ်လျှောက်တွင်လမ်းပိတ်ထားပြီး စောင့်ကြည့်နေကြောင်း သိရသည်။
