သျှမ်းပြည် ကျေးသီးမြို့နယ် လူဝင်မှုကြီးကြပ်ရေးရုံးနှင့် ပြည်သူ့အင်အား ဝန်းကြီးဌာနရုံး
သို့ မှတ်ပုံတင်သွားရောက်လုပ်ဆောင်သူ ဒေသခံများထံ ဝန်ထမ်းများက ပိုက်ဆံအဆမတန်တောင်းခံခြင်းကို ခံနေရကြောင်း သွားရောက်လုပ်ဆောင်ပြီးသူများ သတင်းပေးပို့ချက်အရသိရသည်။
ယခင်က ဒေသခံများသည် မှတ်ပုံတင်လုပ်ဆောင်လျှင် တစ်ဦးကို အများဆုံး ၅ ထောင်ကျပ် လဝကရုံးမှ ဝန်ထမ်းများထံပေး၍ မှတ်ပုံတင်ရရှိခဲ့သော်လည်း လက်ရှိမှာ မှတ်ပုံတင်လုပ်ဆောင်ပါက တစ်ဦးကို မြန်မာကျပ်ငွေ ၃ သောင်းမှ ၅ သောင်းကျပ်အထိ ပေးဆောင်နေရကြောင်း ကိုယ်တိုင်ပေးဆောင်ရသူ ဒေသခံတစ်ဦးက ပြောသည်။
“မှတ်ပုံတင်သွားလုပ်ရင် ဘယ်လောက်ပေးရမှာလဲ သူတို့မပြောဘူး။ မှတ်ပုံလုပ်ပြီးရင် ဒီလောက်ပေးရမယ်၊ အဲ့လောက်ပေးရမယ် ဆိုပြီးတောင်းတာ။ အခုကလည်း နိုင်ငံရေးမကောင်းတာနဲ့ သူများတွေက နိုင်ငံခြား ထွက်ချင်လို့ မှတ်ပုံတင်လာလုပ်ပါတယ်ဆိုမှ သူတို့ကအခွင့်ကောင်း ယူပြီးတောင်းနေတာ” ဟု ၎င်းဒေသခံတစ်ဦးက ပြောသည်။
လက်ရှိတွင် သျှမ်းပြည်အတွင်း စစ်ရေးပဋိက္ခအပြင် နိုင်ငံရေး၊ စီးပွားရေး ကျဆင်းမှုကြောင့် ပြည်သူများသည် တစ်နေ့တစ်ခြား စားဝတ်နေရေး ပိုမိုကြပ်တည်းလာရာမှ စားဝတ်နေရေးဖြေရှင်းရန် အတွက် တိုင်းတပါးထွက်ပြီးအလုပ်ရှာဖွေနေကြခြင်း ဖြစ်သည်။
ထို့အပြင် စစ်တပ်အာဏာသိမ်းပြီးနောက်ပိုင်း သျှမ်းပြည်ရှိ လူဝင်မှုကြီးကြပ်ရေးရုံးနှင့် ပြည်သူ့အင်အား ဝန်းကြီးဌာနရုံးများသည် မှတ်ပုံတင်လာရောက်လုပ်ကိုင်သူ ဒေသခံများထံသို့ ပိုက်ဆံ အဆန်မတန် တောင်းခံမှု ရှိသလို တရားမဝင် ဝင်ရောက်လာသည့်တရုတ်လူမျိုးများထံ သိန်းနှင့်ချီပိုက်ဆံတောင်းယူ၍ မှတ်ပုံတင်အတု ထုတ်ပေးခဲ့သည်။
