သျှမ်းပြည် ညောင်ရွှေမြို့နယ်၊ စံကားအင်းဒေသ၌ အာဏာသိမ်း စစ်ကောင်စီ တပ်ဖွဲ့ နှင့် ပအိုဝ်းအမျိုးသားတပ်မတော် (PNA) တို့က ဒေသခံများကို ၎င်းတို့အတွက် စားသောက်စရာများ အတင်းပို့ဆောင်ခိုင်း နေကြောင်း စုံစမ်းသိရသည်။
ယင်းကဲ့သို့ စစ်ကောင်စီတပ်ဖွဲ့၏ အတင်းခိုင်းစေမှုကြောင့် ဒေသခံများမှ ၎င်းတို့အတွက် စားသောက်စရာများ ပို့ဆောင် ပေးရသော်လည်း လုံခြုံရေး နှင့် အသက်အန္တရာယ်အတွက် စိုးရိမ်နေရကြောင်း အမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“အမိန့်နဲ့ လာတာမို့လို့ သူတို့ခိုင်းတဲ့ အတိုင်းလုပ်ဆောင်ပေးရတယ်ဆိုပေမဲ့ PDF တွေ ရန်ပြုမှာကိုလည်း ကြောက်ရတယ်။ ကျနော်တို့ ရွာသားတွေက သူတို့ခိုင်းတဲ့ အတိုင်းသာ လုပ်ပေးရတာလေ။ ဒါကို PDF တွေ နားမလည်ပြီး ရန်ပြုလာရင် နစ်နာခံ ရမှာက ကျနော်တို့ ရွာသားတွေပဲ ဖြစ်ကြမယ်” ဟု အမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
စံကားအင်းဒေသသည် သျှမ်း-ကယားနယ်စပ် ဖြစ်ပြီး ကုန်းလမ်း၊ ရေလမ်းဖြင့်လည်း ဆက်သွယ်သွားလာနိုင်သည့် အတွက် အာဏာသိမ်း စစ်ကောင်စီ နှင့် PNA တပ်သားများက စစ်ဆေးရေးဂိတ် ပြုလုပ်ကာ ဖြတ်သန်းသွားလာ ခွင့်ကိုလည်း ပိတ်ပင်ထားကြောင်းလည်းသိရသည်။
လက်ရှိအချိန်၌ စံကားအင်းဒေသမှ ပြည်သူများသည် အလှည့်ကျ စနစ်ဖြင့် စစ်ကောင်စီ တပ်သား နှင့် PNA စစ်သားများအတွက် ထမင်း နှင့် သောက်စရာ ရေဗူးများကို ပို့ဆောင်ပေးနေကြောင်း အထက်ပါ အမျိုးသား က ဆက်ပြောသည်။
“တစ်နေ့ကို နှစ်အိမ် / သုံးအိမ် စုပြီး သူတို့အတွက် ချက်ပြုတ်ပြီးတော့ အလှည့်ကျပို့ပေးရတာပေါ့။ ချက်ပေးမယ် လာယူပါဆိုလည်း မဟုတ်ဘူး ၊ သွားပို့ပေးရတာတဲ့။ အဲ့ကြောင့် လုံခြုံရေးအတွက် ပိုပြီး စိုးရိမ်ရတာ။ သွားရင်း လာရင်း တစ်ခုခု ဖြစ်ရင် ဘယ်သူတာဝန်ယူပေးမလဲ။” ဟု အထက်ပါ အမျိုးသားက သျှမ်းသံတော်ဆင့်ကို ဆက်ပြောသည်။
စံကားအင်းဒေသ ခေါ် စံကားမြို့သည် အင်းလေးကန်၏ တောင်ဘက် မိုင်(၄၀) အကွာတွင် တည်ရှိနေခြင်း ဖြစ်ပြီး ပအိုဝ်းပြည်သူ့စစ် (PNO) များစစ်ဆေးမှုတင်းကြပ်သည့်အပြင် မကြာခဏဆိုသလို မူးယစ်ဆေးဝါး အကြောင်းပြ ဖမ်းဆီးပြီး ပိုက်ဆံတောင်းမှုများလည်း ရှိနေကြောင်း သိရသည်။
Leave a Comments