သျှမ်းပြည် သိန္နီမြို့အခြေစိုက် စစ်ကောင်စီတပ် စကခ-၁၆ ကို ညီနောင်မဟာမိတ် တပ်များနှင့်အတူ PLA ၊ BPLA ၊ KNDF ပူးပေါင်းတပ်ဖွဲ့များက တိုက်ခိုက်သိမ်းပိုက်နိုင်ခဲ့ကြောင်း စုံစမ်းသိရသည်။
ယမန်နေ့ (ဇန်နဝါရီလ ၇ ရက်) နံနက် ၉ နာရီခန့်မှစ၍ သိန္နီမြို့အခြေစိုက် စစ်ဆင်ရေးကွပ်ကဲမှုဌာနချုပ် စကခ-၁၆ ကို ညီနောင်မဟာမိတ်တပ်များနှင့်အတူ ပြည်သူ့လွတ်မြောက်ရေးတပ်မတော် (PLA)၊ ဗမာပြည်သူ့ လွတ်မြောက်ရေးတပ်တော် (BPLA)၊ ကရင်နီအမျိုးသားများ ကာကွယ်ရေးတပ်ဖွဲ့ (KNDF) တို့က တိုက်ခိုက်သိမ်းပိုက်နိုင်ခဲ့ကြောင်း PLA တပ်ဖွဲ့မှ သတင်းထုတ်ပြန်လာသည်။
သိန္နီမြို့ရှိ စကခ-၁၆ ဌာနချုပ်ကို ဇန်နဝါရီလ ၄ ရက်မှ စတင်တိုက်ခိုက်ခဲ့ပြီး တပ်ရင်းအတွင်းရှိ လက်နက်ကြီးကုန်းများ၊ ရဟတ်ယာဉ်ကွင်း၊ သံချပ်ကာကားများ၊ ဟောင်ဝစ်ဇာနှင့် လက်နက်ခဲယမ်း အများအပြားကို ဇန်နဝါရီလ ၇ ရက်တွင် သိမ်းပိုက်ရရှိကြောင်း ထုတ်ပြန်ထားသည်။
စကခ-၁၆ နှင့် ကပ်ရပ်ရှိ ခလရ-၆၉ တပ်ရင်းကိုလည်း ဇန်နဝါရီလ ၄ ရက်နေ့က သိမ်းပိုက်နိုင်ခဲ့ပြီး ဇန်နဝါရီလ ၆ ရက်နေ့တွင် စစ်ကောင်စီလက်အောက်ခံ ခမရ-၂၄၀၊ ခမရ-၃၂၃၊ အင်ဂျင်နီယာတပ်နှင့် ဆေးတပ်များအားလုံး ထွက်ပြေးသွားကြောင်း သတင်းထုတ်ပြန်ချက်အရ သိရသည်။
ယခုကဲ့သို့ သိန္နီမြို့ရှိ စစ်ကောင်စီတပ်စခန်းအားလုံးကို ညီနောင်မဟာမိတ်နှင့် ပူးပေါင်းတပ်ဖွဲ့များက အလုံးစုံသိမ်းပိုက်နိုင်သည့်အပေါ် ကိုးကန့်တပ်ဖွဲ့ MNDAA ၏ ပြောရေးဆိုခွင့်ရှိသူထံသို့ သျှမ်းသံတော်ဆင့်မှ ဆက်သွယ်မေးမြန်းသော်လည်း ပြန်လည်ဖြေကြားခြင်း မရှိသေးပါ။
အလားတူ ကွတ်ခိုင်မြို့အခြေစိုက် စစ်ဗျူဟာကုန်း (စဗခ)တပ်ကိုလည်း ယမန်နေ့ (ဇန်နဝါရီလ ၇ ရက်) ည ၁၁ နာရီခန့်တွင် တအာင်း(ပလောင်)တပ်ဖွဲ့ TNLA က အပြီးသတ် သိမ်းပိုက်နိုင်ခဲ့ကြောင်း TNLA တပ်ဖွဲ့၏ ပြောရေးဆိုခွင့်ရှိသူရုံးမှ တာဝန်ခံတစ်ဦးက ပြောသည်။
“ကွတ်ခိုင်မြို့က တပ်ကိုတော့ TNLA တပ်က မနေ့ညက ဝင်ရောက်ရှင်းလင်းသိမ်းပိုက်နိုင်ခဲ့တယ်။ စစ်သုံ့ပန်းနဲ့ သိမ်းဆည်းရမိတဲ့ လက်နက်အရေအတွက်ကိုတော့ အသေးစိတ်မသိရသေးပါဘူး”ဟု ကွတ်ခိုင်ဗျူဟာကုန်း စခန်းသိမ်းအခြေအနေကို TNLA တပ်ဖွဲ့၏ ပြောရေးဆိုခွင့်ရှိသူရုံးမှ ၎င်းတာဝန်ခံက သျှမ်းသံတော်ဆင့်ကို ပြောသည်။
ပြီးခဲ့သည် ဇန်နဝါရီ ၄ ရက်တွင်လည်း လောက်ကိုင်အခြေစိုက် ဒေသကွပ်ကဲမှုစစ်ဌာနချုပ် (ဒကစ) တပ် လက်နက်ချခဲ့ရာ စစ်ကောင်စီတပ်သား ၂၁၀၀ ကျော်နှင့် မိသားစု၀င် ၁၆၀၀ ကျော်၊ စုစုပေါင်း လူ ၄၀၀၀ နီးပါးကို ကိုးကန့်တပ်ဖွဲ့ MNDAA က လားရှိုးနှင့် ကျိုင်းတုံ ပြန်ပို့ပေးခဲ့ရသည်။
လက်ရှိတွင် “၁၀၂၇ စစ်ဆင်ရေး” နှစ်လခွဲကျော်အတွင်း ညီနောင်မဟာမိတ်တပ်များသည် သျှမ်းမြောက်ရှိ စစ်ကောင်စီတပ်စခန်းပေါင်း ၃၀၀ ကျော်ကို သိမ်းပိုက်ထားနိုင်ပြီး လားရှိုးနှင့် မူဆယ်မြို့များကို ဝိုင်းရံပိတ်ဆို့ထားသည်ဟု ဒေသခံများထံမှ သိရသည်။
