သျှမ်းပြည် သိန္နီမြို့အခြေစိုက် ခလရ-၆၉ ကို ညီနောင်မဟာမိတ်တပ်များက သိမ်းပိုက်လိုက်ပြီး စစ်ကောင်စီတပ်က လေကြောင်းဖြင့် အင်အားဖြည့်တင်းနေကြောင်း စုံစမ်းသိရသည်။
ယမန်နေ့ (ဇန်နဝါရီလ ၄ ရက်) နံနက် ၉ နာရီအချိန်ခန့်က သိန္နီမြို့နယ်ရှိ စစ်ကောင်စီ ခြေလျင်တပ်ရင်း ခလရ-၆၉ ကို ညီနောင်မဟာမိတ်တပ်များက တိုက်ခိုက်သိမ်းပိုက်နိုင်ခဲ့ပြီး နှစ်ဘက်တိုက်ပွဲအကြား ပြည်သူထိခိုက်သေဆုံးမှုလည်း ရှိနေကြောင်း သိန္နီမြို့နယ်ဒေသခံများက ပြောသည်။
“သိန္နီက ခလရ-၆၉ တပ်လည်း ကျပြီလို့ ပြောလို့ရပြီ။ မနေ့က မနက် ၉ နာရီလောက်ကတည်းက ကျသွားပြီ။ ခလရ-၆၉ နဲ့ စကစ-၁၆ က ကပ်ရပ်ပဲ၊ ခြံစည်းရိုးပဲ ခြားတယ်။ သိန္နီတပ်တွေကိုလည်း မနက်ဖန်တောင် မကျော်ဘူးထင်တယ်၊ မဟာမိတ်တပ်တွေ အကုန်သိမ်းနိုင်လောက်ပြီ။” သိန္နီမြို့မှ လားရှိုးမြို့သို့ စစ်ဘေးရှောင်လာသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ နှစ်ဘက်တိုက်ပွဲကြား ပြည်သူထိခိုက်သေဆုံးမှုရှိကြောင်း ၊လက်ရှိမှာ ဖုန်းလိုင်း အဆင်မပြေကြောင်း ၎င်းက ဆိုသည်။
သိန္နီမြို့ရှိ ခလရ-၆၉ တပ်ရင်းကို ညီနောင်မဟာမိတ်တပ်များက တိုက်ခိုက်သိမ်းပိုက်နိုင်သည့် အခြေအနေကို သျှမ်းသံတော်ဆင့်မှ TNLA တပ်ဖွဲ့၏ ပြောရေးဆိုခွင့်ရှိသူရုံးထံသို့ ဆက်သွယ်မေးမြန်းသော်လည်း ပြန်လည်ဖြေကြားခြင်း မရှိသေးပေ။
စစ်ကောင်စီတပ်ဘက်ကလည်း သိန္နီမြို့ကို နေ့စဉ်နီးပါး လေကြောင်းဖြင့် ဗုံးကြဲတိုက်ခိုက်နေပြီး တပ်မ-၅၅/၈၈/၉၉ များမှ တပ်သားများကို လေယာဉ်ဖြင့် စကခ-၁၆ သို့ အင်အားအများအပြား ဖြည့်တင်းနေကြောင်း သိန္နီမြို့ဒေသခံများထံမှ သိရသည်။
“သိန္နီမှာက ခလရ-၆၉ ရယ်၊ စကခ-၁၆ နဲ့ ခမရ-၃၂၃ တွေ ရှိတယ်ဆိုပေမဲ့လည်း စစ်ကောင်စီတပ်က တပ်မ-၅၅/၈၈/၉၉ က တပ်သားတွေကို လေယာဉ်နဲ့အများကြီး ထပ်လာချသွားသေးတယ်။ လေယာဉ်ပျံနဲ့ နေ့တိုင်းလာတိုက်နေတာ တစ်နေကုန်ပဲ၊ ညလည်း သွားနေတာပဲ။ သိန္နီ၊ ကွတ်ခိုင်၊ နမ့်ဖက်ကာ၊ လောက်ကိုင်ပေါ့ ဒီဟာတွေကို သွားတာနေမှာ”ဟု သိန္နီမြို့မှ ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် ဇန်နဝါရီလ ၃ ရက်နေ့ကလည်း သိန္နီမြို့ရှိ စစ်ဘေးရှောင်များ ခိုလှုံရာ ကျောင်းခမ်းဘုန်းကြီးကျောင်းကို မည်သည့်လက်နက်ကိုင်အဖွဲ့၏ ဒရုန်းဟု မသိရဘဲ ဗုံးကြဲချမှုကြောင့် စစ်ဘေးရှောင်ကျောင်းသူ ၁ ဦး သေဆုံးသွားပြီး ၉ ဦး ထိခိုက်ဒဏ်ရာရရှိခဲ့ကြောင်း ဒေသခံများထံမှ သိရသည်။
အဆိုပါ ကျောင်းခမ်းဘုန်းကြီးကျောင်းထဲတွင် စစ်ဘေးရှောင် ၄၀၀ကျော်ကျန်ရှိနေသေးကြောင်း၊ ထိုစစ်ရှောင်များသည် သေနတ်သံ၊ လက်နက်ကြီးသံကြားမှ ထပ်မံထွက်ပြေးတိမ်းရှောင်ရန်ကြိုးစားနေကြသည်။
ပြီးခဲ့သည့် နိုဝင်ဘာလအတွင်း သိန္နီမြို့ကို ညီနောင်မဟာမိတ်တပ်ဖွဲ့သုံးဖွဲ့မှ ထိန်းချုပ်နိုင်ပြီဟု ကြေညာထားသော်လည်း သိန္နီမြို့အခြေစိုက် စစ်ကောင်စီလက်အောက်ခံ စကခ-(၁၆) ကို သိမ်းပိုက်နိုင်ရန် ကျန်ရှိနေသေးသည်။
လက်ရှိတွင် သိန္နီမြို့နယ်အတွင်း ညီနောင်မဟာမိတ်တပ်များနှင့် စစ်ကောင်စီတပ်တို့ စစ်ရေးတင်းမာလျက်ရှိကာ သိန္နီမြို့နယ်ဒေသခံ ထက်ဝက်ကျော်သည် တိုက်ပွဲကြောင့် အခြားဒေသများသို့ စစ်ဘေးရှောင်နေရပြီး နေရပ်ပြန်လည် နေထိုင်နိုင်ခြင်း မရှိသေးကြောင်း စစ်ဘေးရှောင်ကူညီသူများထံမှ သိရသည်။
