သျှမ်းပြည် မိုးမိတ်မြို့နယ်တွင် စစ်ကောင်စီတပ်က လေကြောင်းပစ်ကူဖြင့် KIA ၊ PDF ပူးပေါင်းတပ်ဖွဲ့ကို ပြန်လည်တိုက်ခိုက်ခဲ့ပြီး တိုက်ပွဲဆက်လက် ပြင်းထန်နေကြောင်း စုံစမ်းသိရသည်။

ယနေ့ (ဇန်နဝါရီလ ၄ ရက်) နေ့လယ်အချိန်ကလည်း မိုးမိတ်မြို့အခြေစိုက် စစ်ကောင်စီတပ်မှ စင့်ကင်ရွာဘက်သို့ လက်နက်ကြီးနှင့် လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် စင့်ကင်နှင့်သဲနီရွာတို့မှ ဒေသခံများမှာ စိုးရိမ်ထိတ်လန့်ပြီး မိုးမိတ်မြို့အတွင်းရှိ ဆွေမျိုးများထံသို့ ထွက်ပြေးတိမ်းရှောင်ရကြောင်း မိုးမိတ်ဒေသခံများက ပြောသည်။

“နေ့ခင်းက စစ်တပ်ဘက် လေယာဉ်နဲ့ စင့်ကင်ဘက် ပစ်တယ်လို့ကြားတယ်။ ခုစစ်တပ်က မိုးမိတ်မြို့ထဲ နေရာယူထားတယ်။ အမှတ် ၄ ကျောင်းကနေလည်း
လက်နက်ကြီးနဲ့ ရမ်းပစ်နေတယ်။ မြို့မရဲစခန်းကပ်လျက် အမှတ် ၂ ကျောင်းကနေလဲ လက်နက်ကြီးနဲ့ လှမ်းပစ်တယ်။ မြို့မရဲစခန်း၊ အမှတ် ၂ ကျောင်း၊ မြို့နယ်ထွေအုပ်၊ လျှပ်စစ်ရုံး အကုန်လုံးက ကပ်ရပ်နီးနီးလေးပဲ”ဟု မိုးမိတ်မြို့မှ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

ယမန်နေ့ (ဇန်နဝါရီလ ၃ ရက်) ညနေ ၅ နာရီခွဲဝန်းကျင်မှ စတင်၍ မိုးမိတ်မြို့နယ် စင့်ကင်ကျေးရွာတွင် တပ်စွဲထားသည့် စစ်ကောင်စီတပ်စခန်းကို ကချင်လွတ်မြောက်ရေးတပ် KIA နှင့် PDF ပူးပေါင်းတပ်ဖွဲ့တို့က ထိုးစစ်ဆင်တိုက်ခိုက်ခဲ့ရာ တိုက်ပွဲပြင်းထန်ခဲ့ကြောင်း မိုးမိတ်မြို့နယ်ဒေသခံများထံမှ သိရသည်။

“စစ်ကောင်စီတပ်က နမ့်မိတ်ချောင်းရဲ့ မြောက်ဘက်မှာရှိတဲ့ စင့်ကင်ရွာ (ဝၢၼ်ႈၸၢင်ႈၵၢင်ႇ)ထဲမှာ နေရာယူထားတာ။ KIA နဲ့ PDF ပူးပေါင်းတပ်ဖွဲ့ကျတော့ နမ့်မိတ်ချောင်း တောင်ဘက်က သဲနီရွာ (ဝၢၼ်ႈသၢႆးလႅင်)ထဲကနေ ပြန်ပစ်နေကြတော့ အဲ့မှာ တိုက်ပွဲပြင်းထန်နေတယ်။ အခုထိတော့ စင့်ကင်ရွာက စစ်ကောင်စီတပ်စခန်းကို KIA နဲ့ PDF ပူးပေါင်းတပ်ဖွဲ့တွေ မသိမ်းနိုင်သေးဘူး”ဟု မိုးမိတ်မြို့နယ်မှ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် ဇန်နဝါရီလ ၁ ရက်တွင် မိုးမိတ်မြို့နယ် မန်ပတ်‌ကျေးရွာရှိ စစ်ကောင်စီတပ် ခလရ-၂၇၆ တပ်ရင်းကို KIA နှင့် PDF ပူးပေါင်းတပ်ဖွဲ့တို့က တိုက်ခိုက်သိမ်းပိုက်နိုင်ခဲ့သည်။