သျှမ်းပြည် သိန္နီမြို့နယ် စစ်ကောင်စီတပ်ဖွဲ့မှ ရမ်းသမ်းပစ်ခတ်လိုက်သော လက်နက်ကြီးများ ကြောင့် လူ ၃ ဦး ထိခိုက်ဒဏ်ရာရရှိခဲ့ကြောင်းThe Kokangက ယနေ့ ဇန်နဝါရီလ ၂ ရက်တွင် ထုတ်ပြန်ထားသည်။

ပြီးခဲ့တဲ့ ဇန်နဝါရီ ၁ ရက် မွန်းလွှဲ ၂ နာရီအချိန်တွင် သိန္နီမြိုနယ်တွင် ကျန်ရှိနေသေးသည့် စစ်ကောင်စီတပ်ဖွဲ့မှ ရမ်းသမ်းပစ်ခတ်လိုက်သော လက်နက်ကြီးများသည် ပန်လော့ကျေရွာရှိ အရပ်သားနေအိမ် ခြံဝန်းထဲသို့ ကျရောက်ပေါက်ကွဲပြီး မီးဖိုချောင်ထဲမှ မိခင်နှင့်ကလေးတို့ ၂ ဦးအပါအဝင် အမျိုးသား ၁ ဦးကို ထိမှန်ကာ ဒဏ်ရာရရှိခဲ့ ကြောင်း ရေးသားဖော်ပြထားသည်။

အဆိုပါ ထိခိုက်ဒဏ်ရာရသည့် ကလေးတစ်ဦးမှာ အသက် ၁၂ နှစ်အရွယ် အမျိုးသမီးငယ် တစ်ဦးဖြစ်ကြောင်း သိရသည်။

ယင်းကဲ့သို့ ထိခိုက်ဒဏ်ရာရရှိပြီးနောက် ၎င်းတို့အား ကိုးကန့်တပ်ဖွဲ့ MNDAAမှ နောက်တန်းဆေးခန်းသို့ ပို့ဆောင်ကုသပေးခဲ့ပြီး ယနေ့ (ဇန်နဝါရီ ၂ ရက်)ထိ မိခင်ဖြစ်သူ အမျိုးသမီးတစ်ဦးမှာ ရရှိထားသော ဒဏ်ရာများကြောင့် ဆက်လက်ကုသနေရဆဲကြောင်း ဆိုသည်။

သျှမ်းမြောက်ဒေသတွင် “၁၀၂၇ စစ်ဆင်ရေး” နှစ်လအတွင်း မြို့နယ် ၁၅ ခုမှာ အရပ်သား သေဆုံးမှု ၂၀၀ နီးပါးအထိ မြင့်တက်လာပြီး ထိခိုက်ဒဏ်ရာရသူ ၄၀၀ ကျော်အထိ ရှိလာကြောင်း သျှမ်းသံတော်ဆင့်မှ သီခြားကောက်ယူထားသည့် မှတ်တမ်းများအရ သိရသည်။