မြန်မာ-တရုတ်နယ်စပ်ဒေသ မူဆယ်မြို့အတွင်း စစ်ကောင်စီတပ်၏ လေကြောင်း ပျံဝဲပြီး ပစ်လိုက်သည့် ကျည်ကြောင့် အမျိုးသမီးတစ်ဦး ကျည်ထိမှန်ဒဏ်ရာရရှိကြောင်း မူဆယ်မြို့ ဒေသခံများက ပြောသည်။
ယနေ့ (ဒီဇင်ဘာလ ၃၀ ရက်) နေ့လယ် ၁၂ ဝန်းကျင်တွင် မူဆယ်မြို့ ကောင်းကင်ပေါ်သို့ စစ်ကောင်စီ ရဟတ်ယာဉ်ဖြင့် ပျံဝဲပြီး ပစ်ခတ်လိုက်သည့် လက်နက်များကြောင့် မြို့တွင်းသို့ ကျရောက်ပြီး အိမ်ရှေ့မှ အမျိုးသမီးတစ်ဦးကို ထိမှန်ကာ ဒဏ်ရာရရှိခဲ့ကြောင်း မူဆယ်မြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ ရဟတ်ယာဥ်က လူတွေနေတဲ့အိမ်ပေါ်မှာ ပျံဝဲနေတာ အဲ့အချိန်မှာပဲ လက်နက်ကျည်က ကျလာတာ။ အဲ့မှာ တောင်ရပ်ကွက်က အမျိုးသမီးတစ်ယောက်ကို ကျည်ထိပြီး ဘယ်ဘက်ခြေထောက်ကျိုးသွားတယ်။ အိမ်တွေ တော်တော်များများ ထိတယ်” ဟု မူဆယ်မြို့ ဒေသခံ အမျိုးသားတစ်ဦးကဆိုသည်။
ထိခိုက်ဒဏ်ရာရသူ အမျိုးသမီးတစ်ဦးသည် အသက် ၅၀ နှစ်ကျော်ရှိဖြစ်ကြောင်းသိရသည်။
ယနေ့ (ဒီဇင်ဘာလ ၃၀ ရက်) နေ့လယ် ၁၂ ဝန်းကျင်တွင် မူဆယ်မြို့ စစ်ကောင်စီ ရဟတ်ယာဉ်ဖြင့် ပျံဝဲနေစဉ် မြို့၏အရှေ့ဘက်ရှိ လွိုင်နမ့်လိမ်ပေါ်မှ နေရာယူထားသော ညီနောင်မဟာမိတ်တပ်ဖွဲ့များ ကလည်း ပစ်ခတ်မှုရှိကြောင်းသိရသည်။
အလားတူ မူဆယ်မြို့ တောင်ရပ်ကွက်အပြင် ဟိုနားနယ်မြေ ကောင်းမူးတုန်ရပ်ကွက်၊ ဈေးရပ်ကွက် ညဈေးတန်းရှိ နေအိမ်များလည်း ကျည်ထိမှန်ထားကြောင်း ဒေသခံများ၏ သတင်းပေးပို့ချက်အရသိရသည်။
လက်ရှိ မူဆယ်မြို့ပေါ် ပျံသန်းလာသည့် စစ်ကောင်စီ ရဟတ်ယာဉ်သည် တိုက်ပွဲအတွင်း ထိခိုက်ဒဏ်ရာရထားသည့် စစ်ကောင်စီတပ်ဖွဲ့ဝင် တပ်သားများကို လာရောက်ကယ်ထုတ်နေခြင်း ဖြစ်ကြောင်း ဒေသခံများက ပြောသည်။
ထို့ကြောင့် ပြည်သူများအနေဖြင့် မူဆယ်မြို့ ကောင်းကင်ပေါ်တွင် စစ်ကောင်စီ၏ ရဟတ်ယာဉ်များ ပျံသန်းလာပါက မိမိနေအိမ်မှအပြင်သို့ ထွက်မကြည့်ကြရန်၊ လုခြံမည့် နေရာများတွင် နေထိုင်ရန် ၎င်းကတိုက်တွန်းထားသည်။
