သျှမ်းပြည် ကွတ်ခိုင်မြို့တွင် လက်နက်ကြီးကြောင့် ကလေး ၁ ဦးနှင့် အမျိုးသမီး ၂ ဦး ထိခိုက်ဒဏ်ရာရရှိခဲ့ပြီး စစ်ကောင်စီတပ်က အရပ်သား ၂ ဦးကို ပစ်သတ်ခဲ့ကြောင်း စုံစမ်းသိရသည်။
ယမန်နေ့ (ဒီဇင်ဘာလ ၁၇ ရက်) ညနေ ၃ နာရီကျော်တွင် ကွတ်ခိုင်မြို့ ရပ်ကွက်(၁) ရဲစခန်းအောက်ရှိ သာယာကုန်းတွင် မည်သည့်လက်နက်ကိုင်အဖွဲ့က ပစ်ခတ်လာသည်ဟု မသိရှိရသည့် လက်နက်ကြီးပေါက်ကွဲမှုကြောင့် ကလေး ၁ ဦးနှင့် အမျိုးသမီး ၂ ဦး ထိခိုက်ဒဏ်ရာရရှိကြောင်း ကွတ်ခိုင်မြို့ဒေသခံများက ပြောသည်။
“မနေ့ညကတော့ ဘယ်ကပစ်လိုက်တဲ့ လက်နက်ကြီးလဲတော့ မသိဘူး။ ရပ်ကွက်(၁)ထဲကို ကျတာ။ ကလေးတစ်ယောက်က ခေါင်းမှာ လက်နက်ကြီးစ နည်းနည်း ရှပ်မှန်တယ်။ နောက်ထပ် အမျိုးသမီး ၂ ယောက်ကျတော့ ခါးမှာ ထိတယ်။ မနေ့က ညနေပိုင်းမှာ ဖြစ်တာ၊ ရပ်ကွက်(၁) ရဲစခန်းအောက်မှာပေါ့။ နေအိမ်တွေကတော့ ကလေးထိတဲ့အိမ်မှာ သွပ်တွေ ပေါက်ကုန်ပြီးတော့ ရေခဲသေတ္တာတွေလဲ ပျက်စီးကုန်တယ်”ဟု ကွတ်ခိုင်မြို့မှ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
ထို့အပြင် ဒီဇင်ဘာလ ၁၅ ရက်က ည ၉ နာရီအချိန်ခန့်တွင် ကွတ်ခိုင်မြို့ ရပ်ကွက်(၂)အတွင်း ကင်းလှည့်နေသော စစ်ကောင်စီတပ်သားများက အရပ်သား ၂ ဦးကို သေနတ်ဖြင့် ပစ်သတ်ခဲ့ကြောင်း ကွတ်ခိုင်မြို့ ဒေသခံများထံမှ သိရသည်။
“တစ်ယောက်ကတော့ မနေ့က သင်္ဂြိုလ်ပြီးတာ၊ သူက တုန်ဆင်ရွာကလို့ ပြောတယ်။ နောက်တစ်ယောက်က သူ့မိဘတွေက ဘယ်သူမှန်းမသိ အဲ့လိုဖြစ်နေလို့။ သူတို့က ညအချိန် ဆိုင်ကယ်နဲ့ဆိုတော့ လှည့်ကင်းနဲ့သွားတိုးတော့ အသံမကြားလို့လားမသိဘူး ဆိုင်ကယ်မရပ်ဘူးလေ အပစ်ခံရတာ။ ၁၅ ရက်နေ့က ည ၉ နာရီလောက်က ရပ်ကွက်(၂)မှာ သေနတ်ပစ်ခံရတာ”ဟု ကွတ်ခိုင်မြို့နေ အမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်၏ သေနတ်ပစ်ခံရခြင်းကြောင့် ပွဲချင်းပြီး သေဆုံးသွားသူမှာ တုန်ဆင်ကျေးရွာမှဖြစ်ပြီး အသက် ၂၈ နှစ်အရွယ်ရှိ နားချန်ကျေးရွာမှ လဇေ ဟု အမည်ရသည့် အမျိုးသားသည် ဆေးရုံအရောက်၌ သေဆုံးသွားပြီး ယနေ့ (ဒီဇင်ဘာလ ၁၈ ရက်တွင်) သင်္ဂြိုလ်မည်ဟု သိရသည်။
အလားတူ ပြီးခဲ့သည့် နိုဝင်ဘာလ တတိယပတ်အတွင်း လားရှိုးမြို့တွင်လည်း စစ်ကောင်စီက ညမထွက်ရအမိန့် ထုတ်ပြန်ပြီးနောက် မလိုက်နာသူများကို ဖမ်းဆီးအရေးယူပြီး အမျိုးသား ၄ ဦးထက်မနည်းကို ပစ်သတ်ခဲ့ကြောင်း လားရှိုးဒေသခံများက ပြောသည်။
လားရှိုးမြို့အခြေစိုက် အရှေ့မြောက် တိုင်းစစ်ဌာနချုပ် (ရမခ) လက်အောက်ခံ လားရှိုး၊ ကွတ်ခိုင်၊ သိန္နီ၊ မူဆယ်၊ နမ့်ခမ်း၊ ကွမ်းလုံနှင့် လောက်ကိုင်မြို့အခြေစိုက် ဒေသကွပ်ကဲမှု စစ်ဌာနချုပ် (ဒစက) လက်အောက်ခံ လောက်ကိုင်နှင့် ကုန်းကြမ်းမြို့နယ်တို့တွင်လည်း နိုဝင်ဘာ ၁၅ ရက်နေ့မှစ၍ မာရှယ်လော ကြေညာထားပြီး ည ၆ နာရီမှ နံနက် ၆ နာရီအထိ ညမထွက်ရအမိန့် ထုတ်ပြန်ထားသည်။
Leave a Comments