သျှမ်းပြည် ကျောက်မဲခရိုင် နမ္မတူမြို့နယ်၊ ဆိုင်းခေါင်ကျေးရွာအုပ်စုရှိ ဘုန်းကြီးကျောင်းဝင်းအတွင်းတွင် အာဏာသိမ်း စစ်ကောင်စီ တပ်မှ လက်နက်ကြီး တပ်ဆင်ထားကြောင်း စုံစမ်းသိရသည်။
ဒီဇင်ဘာလ ပထမပတ်အတွင်းမှ စတင်ကာ နမ္မတူမြို့နယ်၊ ဆိုင်းခေါင်ကျေးရွာအုပ်စုအတွင်း အာစာသိမ်း စစ်ကောင်စီ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့ စစ်ရေးတင်းမာမှု ရှိခဲ့ရာ စစ်ကောင်စီက ဆိုင်းခေါင်ကျေးရွာအုပ်စု၊ တုန်ဟုန်းခမ်း (တူၼ်ႈႁုင်းၶမ်း )ဘုန်းတော်ကြီးကျောင်း၌ လက်နက်ကြီး တပ်ဆင်ထားကြောင်း မြေပြင် သတင်းအချက်အလက်သိရသည်။
“စစ်ကောင်စီက ၆၀ မမ အမျိုးအစား လက်နက်ကြီးကို ဘုန်းကြီးကျောင်းဝင်းထဲမှာ ထောင်ထားတယ်၊ ပြီးတော့ ကျောင်းပတ်ပတ်လည်လည်း ကင်းတွေချထားတယ်။ အခု အဲ့ဘုန်းကြီးကျောင်းက ဆရာတော်၊ ဦးဇင်း နဲ့ ကိုရင် တွေ ထွက်ပြေးပြီ၊ သူတို့ စစ်အင်အားကတော့ ၅၀ လောက်ပေါ့” ဟု လုံခြုံရေး အရအမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
စစ်ကောင်စီမှ ဘုန်းကြီးကျောင်းဝင်းအတွင်း ဝင်ရောက်နေရာယူ တပ်စွဲထားပြီး လက်နက်ကြီးပါ တပ်ဆင်ထောင် ထားသည့်အတွက် ကျောင်းထိုင်ဆရာတော်နှင့် ကိုရင်များ ထွက်ပြေးရသည့်အပြင်၊ ဒေသခံ တချို့လည်း နမ္မတူ မြို့ပေါ် နှင့် အမျိုးရှိရာ နီးစပ်သည့် ကျေးရွာများသို့ ထွက်ပြေးသွားရကြောင်း အထက်ပါ အမျိုးသားက ဆက်ပြောသည်။
“တိုက်ပွဲက ဘယ်အချိန်မဆို ဖြစ်နိုင်တယ်ဆိုပြီး စစ်တပ်ကလည်း ရွာသားတွေကိုလာပြောတာတဲ့၊ စစ်တပ်နဲ့ TNLA တပ်စွဲထားတဲ့နေရာကလည်း အရမ်းနီးနေကြတယ်။ အဲ့ကြောင့် တချို့က အိမ်စောင့်တစ်ယောက်ထားပြီး ထွက်ပြေးတယ်။ တချို့လည်း တအိမ်သားလုံး ထွက်ပြေးတာပေါ့။” ဟု အထက်ပါ အမျိုးသားက သျှမ်းသံတော်ဆင့်ကို ဆက်ပြောသည်။
တအာင်း (ပလောင်) အမျိုးသား လွတ်မြောက်ရေး တပ်မတော် (TNL) သည် တုန်ဟုန်းခမ်း (တူၼ်ႈႁုင်းၶမ်း) ကျေးရွာ နှင့် ၂ မိုင်နီး ပါးသာ ကွာဝေးသည့် နမ့်မန်းဆာ (ၼမ့်မႅင်းသႃး) ကျေးရွာ၌ တပ်စွဲနေရာယူထားပြီး အဝင်အထွက်လမ်းကို ပိတ်ဆို့ စစ်ဆေးကာ နှစ်ဖက် စစ်ရေးတင်းမာနေလျက်ရှိကြောင်း ဒေသခံများထံမှ သတင်းသိရသည်။
“TNLA အင်အားလည်း ၅၀ ကျော်ကျော်လောက်ရှိတယ်။ သူတို့က ကျေးရွာထဲမှာနေပြီးတော့ ရွာထိပ် ဟိုဘက် ဒီဘက် စောင့်ပြီး လမ်းကိုလည်း ပိတ်ဆို့စစ်ဆေးတာ။ တခြားရွာကို သွားမယ်ဆိုရင် ဘယ်အချိန်ရွာထဲ ပြန်ဝင်ရ မလဲဆိုတာ ပြောရတယ်၊ တခြားရွာကလာရင်လည်း ဘယ်သူ့အိမ်ကိုလဲ၊ ဘာကြောင့်လာရလဲဆိုတာ ပြောပြီးမှ ပေးထွက်တာ” ဟု ဆိုင်းခေါင်ကျေးရွာအုပ်စုမှ အသက် (၅၀) ဝန်းကျင် အမျိုးသားက ပြောသည်။
လက်ရှိအချိန်တွင် စစ်ကောင်စီတပ် နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့က စစ်ရေးတင်းမာနေလျက်ရှိပြီး ကြိုတင်စစ်ရှောင်နေရသည့် ဒေသခံများကလည်း နေရပ်မပြန်နိုင်ကြသေး ကြောင်း သိရသည်။
ထို့အပြင် အချို့ဒေသခံများသည် ရိပ်သိမ်းပြီးသားစပါးများကို ပုံထားပြီး မသိမ်းရသေးသည့်အတွက် စိတ်ပူရကြောင်း၊ တိုက်ပွဲများ ပိုမိုပြင်းထန် လာပါက ကောက်ပဲသီးနှံများ ဆုံးရှုံးမည်ကိုလည်း စိုးရိမ်ရကြောင်း ဒေသခံများ က ပြောဆိုနေကြသည်။
Leave a Comments