သျှမ်းပြည် အင်းလေးဒေသတွင် ဆက်ကြေးလိုက်ကောက်နေသည့် စစ်တပ်လက်အောက်ခံ ပျူစောထီးအဖွဲ့ဝင် နှစ်ဦးကို အမည်မသိ လက်နက်ကိုင်တပ်ဖွဲ့က သေနတ်ဖြင့် ပစ်သတ်ခဲ့ကြောင်း စုံစမ်းသိရသည်။
သျှမ်းပြည် အင်းလေးဒေသ မင်းချောင်းနောက်ကျေးရွာ ယမန်နေ့ (ဒီဇင်ဘာလ ၁၆ ရက်) ည ၆ နာရီဝန်းကျင်တွင် ဆက်ကြေးလိုက်ကောက်သည့် စစ်တပ်လက်အောက်ခံပျူစောထီးအဖွဲ့ ခေါင်းဆောင်နှင့် နောက်လိုက်တစ်ဦးကို အမည်မသိလက်နက်ကိုင်တပ်ဖွဲ့က ပစ်သတ်ခဲ့ကြောင်း ဒေသခံများက သျှမ်းသံတော်ဆင့်ကို ပြောသည်။
“မနေ့ညနေ မီးပွဲမှာ ဆက်ကြေးကောက်ပြီး အပြန်မှာ အမည်မသိလက်နက်ကိုင်အဖွဲ့က ပစ်သွားတာ။သူတို့ကို ၁၀ ချက်လောက်ရှိမယ်။ကြားတာ။ပျူစောထီးတို့မှာလည်း သေနက်တွေပါတယ်။မီးပွဲကလည်း တပတ်တခါ လုပ်တယ်။လူလည်းစည် တယ်။သူတို့တွေက အပတ်တိုင်းလိုက်ကောက်တာ” ဟုဒေသခံ အသက် ၃၀ ခန့် အမျိုးသားတစ်ဦးက ပြောသည်။
ထိုသေဆုံးသွားသည့်အမျိုးသားသည် ပျူစောထီခေါင် ကိုအောက်စိုးလွင် နှင့် ကိုကျော်ဟိန်းတိုဖြစ်ပြီး၊ အလောင်းများကို ညောင်ရွှေမြို့သို့ သယ်ဆောင်သွားကြောင်း သိရသည်။
ယမန်နေ့တွင် ပစ်ခတ်မှုဖြစ်ပွားပြီးနောက် စစ်ကောင်းစီ၊စစ်ကောင်စီလက်အောက်ခံ ပျူစောထီအဖွဲ့နှင့် ရဲ များစစ်ဆေးရေးတင်းကြပ်နေကြောင်း ပြည်သူဒေသခံများက သျှမ်းသံတောင်ဆင့်ကို ပြောသည်။
“မနေ့ကဆိုရင် အဲ့လမ်းတလျှောက် သွားနေတဲ့သူမှန်သမျှ အကုန်ထိန်းထားတယ်။ ၈ နာရီလောက်မှ ပြန်လွှတ်ပေးတာ။ဒီနေ့လည်း စစ်ဆေးရေးတွေလုပ်နေတယ်။ခုနေ့လည်လည်း စစ်နေတာပဲ”ဟု အင်းလေးဒေသခံ အမျိုးသားတစ်ဦးက ပြောသည်။
ညောင်ရွှေမြို့နယ်တွင် လက်ရှိ စစ်ရှောင်ဦးရေ တစ်သောင်းနှစ်ထောင်ခန့် ရှိနေပြီး ထိုစစ်ရှောင်များသည် ဘုရားဆောင်းတန်းများ၊ ဘုန်းကြီးကျောင်းများ နှင့် ဇရပ်များမှာ အဆင်ပြေသလို ခင်းကျဉ်းနေထိုင်ကြပြီး စစ်ရှောင်စခန်း တစ်ခုလျှင် လူဦးရေ (၂၀၀) ခန့် စုပေါင်း နေထိုင် နေကြရသည်။
ညောင်ရွှေမြို့ရှိ စစ်ရှောင် စခန်းများသို့ ကရင်နီပြည်မှ တိမ်းရှောင်ရသူများမှာ ကျန်းမာရေး စောင့်ရှောက်မှုများ အရေးပေါ် လိုအပ်နေသကဲ့သို့ ရွှေ့ပြောင်းနေစဉ် ကာလအတောအတွင်း အမြတ်ထုတ်သူများကြောင့်လည်း အခက်အခဲများ ကြုံတွေ့ကြရကြောင်း သိရသည်။
