Saturday, July 13, 2024

နမ့်ခမ်းမြို့ပေါ် စစ်ကောင်စီတပ် လေယာဉ် ၆ စီးဖြင့် အင်အားဖြည့် ဗုံးကြဲတိုက်ခိုက်၊ အရပ်သား ၁ ဦး ထိမှန်သေဆုံး

Must read

သျှမ်းပြည် နမ့်ခမ်းမြို့တွင် စစ်ကောင်စီတပ်က အင်အားအများအပြား ဖြည့်တင်းလျက်ရှိကာ လေယာဉ် ၆ စီးဖြင့် လေကြောင်းဗုံးကြဲ တိုက်ခိုက်မှုကြောင့် အရပ်သား ၁ ဦး သေဆုံးသွားကြောင်း စုံစမ်းသိရသည်။

ယမန်နေ့ (ဒီဇင်ဘာလ ၁၁ ရက်) ညအချိန်မှစ၍ နမ့်ခမ်းမြို့ရှိ စစ်ကောင်စီတပ် စခန်းသစ်ကုန်းကို တအာင်း(ပလောင်)တပ်ဖွဲ့ TNLA က ထိုးစစ်ဆင်တိုက်ခိုက်ခဲ့ပြီး နှစ်ဖက်ထိတွေ့တိုက်ပွဲ ပြင်းထန်လျက်ရှိကာ စစ်ကောင်စီတပ်မှ ယနေ့ (ဒီဇင်ဘာ ၁၂ ရက်)တွင် အင်အားထပ်မံ ဖြည့်တင်းလာပြီး လေယာဉ် ၆ စီးဖြင့် နမ့်ခမ်းမြို့ပေါ် လေကြောင်းဗုံးကြဲတိုက်ခိုက်ခဲ့ကြောင်း နမ့်ခမ်း‌ဒေသခံများက ပြောသည်။

စစ်ကောင်စီ လေကြောင်းဗုံးကြဲတိုက်ခိုက်

စစ်ကောင်စီ၏ ယနေ့ (ဒီဇင်ဘာ ၁၂)ရက် တွင် လေကြောင်းတိုက်ခိုက်မှုအတွင်း နမ့်ခမ်းမြို့ ကောင်းဆာကျေးရွာမှ အသက် ၆၀ အရွယ်ရှိ လုံးလှအောင် ဆိုသူသည် ဗုံးစထိမှန် သေဆုံးသွားကြောင်း နမ့်ခမ်းဒေသခံများထံမှ သိရသည်။

“စစ်ကောင်စီတပ်က ရဟတ်ယာဉ် ၃ စီးနဲ့ အင်အားဖြည့်နေတာ။ ဟက်စကီးလည်း လာတယ်၊ ဂျက်ဖိုက်တာလည်းလာတယ်၊ Mi-35 ကောပါတယ်။ ဗုံးကြဲနေတာနဲ့ဆိုရင် စုစုပေါင်း ၆ စီးလောက်တောင်မှ လာတယ် ဒီနေ့တစ်ရက်တည်းကို။ နေ့လယ် ၁၂ နာရီ ၁ နာရီလောက်တုန်းက ကြမ်းတယ်လို့ပြောရမှာ”ဟု နမ့်ခမ်းမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ယမန်နေ့ (ဒီဇင်ဘာလ ၁၁ ရက်) ည ၇ နာရီခွဲအချိန်ခန့်ကလည်း နမ့်ခမ်းမြို့ ပေါက်နေရပ်ကွက်ရှိ မြို့မရဲစခန်းအနီးသို့ စစ်ကောင်စီတပ်မှ လေကြောင်းဗုံးကြဲ တိုက်ခိုက်ခဲ့ရာ ပြည်သူနေအိမ် ၁၀ လုံးထက်မနည်း ထိခိုက်ပျက်စီးခဲ့ကြောင်း နမ့်ခမ်းဒေသခံများထံမှ သိရသည်။

ညီနောင်မဟာမိတ် ၃ ဖွဲ့နှင့် စစ်ကောင်စီတို့သည် တရုတ်၏ ကြားဝင်စေ့စပ်မှုဖြင့် ဒီဇင်ဘာလ ဒုတိယပတ်အတွင်း တရုတ်နိုင်ငံတွင် တွေ့ဆုံဆွေးနွေးခဲ့သည်ဟု စစ်ကောင်စီ သတင်းထုတ်ပြန်ရေး အဖွဲ့ခေါင်းဆောင် ဗိုလ်ချုပ်ဇော်မင်းထွန်းက ဒီဇင်ဘာလ ၁၁ ရက်နေ့တွင် ထုတ်ဖော်ပြောဆိုခဲ့သည်။

သို့သော် တရုတ်-မြန်မာ နယ်စပ်ရှိ နမ့်ခမ်းမြို့အခြေစိုက် စစ်ကောင်စီတပ် စခန်းသစ်ကုန်းကို သိမ်းပိုက်နိုင်ရန် TNLA တပ်ဖွဲ့က ဆက်လက်ထိုးစစ်ဆင် တိုက်ခိုက်နေပြီး နှစ်ဘက်တိုက်ပွဲ ပြင်းထန်လျက်ရှိသည်။

“၁၀၂၇ စစ်ဆင်ရေး” တစ်လကျော်ကာလအတွင်း နမ့်ခမ်းမြို့နယ်တွင် စစ်ကောင်စီ၏ လက်နက်ကြီးနှင့် လေကြောင်းဗုံးကြဲမှုကြောင့် အမျိုးသမီး ၆ ဦးနှင့် ကလေး ၄ ဦး အပါအဝင် စုစုပေါင်း ၁၆ ဦး သေဆုံးပြီး ၂၀ ဦးထက်မနည်း ထိခိုက်ဒဏ်ရာရရှိကာ ပြည်သူနေအိမ် ၂၀၀ ထက်မနည်း ထိခိုက်ပျက်စီးခဲ့ရပြီး စစ်ဘေးရှောင်ဦးရေ ၆၀၀၀ ကျော်အတွက် စားနပ်ရိက္ခာနှင့် ဆေးဝါးများ လိုအပ်နေကြောင်း နမ့်ခမ်းမြို့စစ်ဘေးရှောင် ကူညီသူများထံမှ သိရသည်။

Leave a Comments

- Advertisement -spot_img

Latest article