သျှမ်းပြည် မူဆယ်မြို့နယ်အတွင်း ဒရုန်းနှင့် လက်နက်ကြီး ပစ်ခတ်မှုကြောင့် ပြည်သူများစိုးရိမ်နေရကြောင်း ဒေသခံများပြောပြချက်အရသိရသည်။
သျှမ်းပြည် မူဆယ်မြို့နယ် ကျေးရွာအချို့တွင် ညီနောင်မဟာမိတ်တို့ ဒရုန်းများ၊ စစ်ကောက်စီတို့၏ လက်နက်ကြီး များနှင့် လေကြောင်းဖြင့် ဗုံးကြဲတိုက်ခိုက်မှုများကြောင်း ပြည်သူများ အသက်အန္တရာယ် စိုးရိမ်နေရသည့် အဆင့်ဖြစ်နေကြောင်း ဒေသခံများက သျှမ်းသံတော်ဆင့်ကိုပြောသည်။
” အခု က ဘယ်လိုလည်းဆိုတော့ ညီနောင်မဟာမိတ်တွေက ဒရုန်းနဲ့ ပစ်တယ်။ စစ်တပ်က လက်နက်ကြီးနဲ့ လေကြောင်းဗုံးနဲ့ ပစ်တယ်။ အပြန်အလှန်ပစ်နေကြတာပေါ့။ အိမ်ထဲမှာနေလည်း မလုံခြုံ ဘယ်မှာနေနေ စိုးရိမ်နေရတဲ့အဆင့်” ဟု မူဆယ်မြို့ အသက် ၄၀ ဝန်းကျင်ရှိ အမျိုးသားတစ်ဦးက ပြောသည်။
ထို့ပြင် စစ်ကောင်စီသည် မူဆယ်မြို့နယ်အတွင်း တိုက်ပွဲကြောင့် ထွက်ပြေး တိမ်းရှောင်သွားသည့် ပြည်သူ့နေအိမ်များကို ဝင်ရောက်မွှေနှောက်ပြီး တန်ဖိုးကြီးပစ္စည်းများ ယူဆောင်သွားခြင်းနှင့် စစ်ကောင်စီတပ်သားများ နေအိမ်ထဲပုန်းခိုနေထိုင်မှုကြောင့် ညီနောင်မဟာမိတ်များက ဒရုန်းဖြင့် လှစ်ပစ်ခြင်းများ ပြုလုပ်နေကြောင်း သိရသည်။
ဆက်လက်ပြီး လက်ရှိတွင် မူဆယ်မြို့နယ်အတွင်း စစ်ကောင်စီနှင့် ညီနောင်မဟာမိတ်တပ်တို့ စစ်ရေး အရှိန်ပိုပြင်းထန်လာပြီး၊ တစ်ဖက်တွင်လည်း ဖုန်းလိုင်းနှင့် အင်တာနက်လိုင်းများ ပြတ်တောက်ခံလာရသည်မှာ ရက်တပတ်ထိကြာမြင့်လာပြီဖြစ်ကြောင်း ဒေသခံများက ပြောပြသည်။
” အခု တိုက်ပွဲက ပိုပြင်းထန်လာတယ်။ နောက် အခုဖုန်းလိုင်းတွေ အင်တာနက်လိုင်းတွေလည်းပိတ်ခံထားရတယ်။ မီးက ရက်တပတ်ရှိပြီမလာတာ။ သူခိုးတွေကလည်း ပေါတယ်” ဟု မူဆယ်မြို့ ဒေသခံ အမျိုးသားတစ်ဦးက ထပ်လောင်းပြောပြသည်။
ပြီးခဲ့သည့် ဒီဇင်ဘာလ ၂ ရက်နေ့တွင် မူဆယ်မြို့နယ် စယ်လန့်ကျေးရွာ စစ်ကောင်စီမှ လေကြောင်းဖြင့် ဗုံးကြဲတိုက်ခိုက်မှုကြောင့် အမျိုးသားတစ်ဦး၊အမျိုးသမီးတစ်ဦးနှင့် ကလေးတစ်ဦးထိခိုက်ဒဏ်ရာရရှိခဲ့ပြီး နေအိမ်များ ၃ လုံးထက်မနည်းပျက်စီးခဲ့ကြောင်း သိရသည်။
Leave a Comments