သျှမ်းပြည် သိန္နီမြို့နယ်တွင် စစ်ကောင်စီတပ်၏ လက်နက်ကြီးထိမှန်မှုကြောင့် အမျိုးသမီး ၁ ဦး အပါအဝင် ၃ ဦး ပွဲချင်းပြီး သေဆုံးကာ ကလေး ၂ ဦး ဒဏ်ရာပြင်းထန်ကြောင်း စုံစမ်းသိရသည်။
ယမန်နေ့ (နိုဝင်ဘာ ၃၀ ရက်) ည ၉ နာရီအချိန်ခန့်တွင် သိန္နီမြို့အခြေစိုက် စစ်ကောင်စီတပ် စကခ-၁၆ မှ ရမ်းသမ်းပစ်ခတ်လာသည့် လက်နက်ကြီးသည် သိန္နီမြို့နယ် မိုင်းပါးကျေးရွာအုပ်စု နောင်ကော်ရွာအတွင်းရှိ နေအိမ်ပေါ်သို့ ကျရောက်ပေါက်ကွဲခဲ့သဖြင့် အမျိုးသမီး ၁ ဦး အပါအဝင် ၃ ဦး ပွဲချင်းပြီး သေဆုံးကာ ကလေး ၂ ဦး ဒဏ်ရာပြင်းထန်ကြောင်း သိန္နီမြို့နယ်ဒေသခံများက ပြောသည်။
“ပြီးခဲ့တဲ့ရက် (နိုဝင်ဘာ ၃၀ ရက်)က မနက် ၉ နာရီလောက်ကနေ ၁၆ တပ် (စကခ-၁၆) လက်နက်ကြီး လှမ်းထုနေတာ ည ၁၀ နာရီလောက်အထိပဲ။ ပိန်းဟုန်းတို့ နောင်ကော်တို့ဘက် အိမ်တွေလာမှန်တယ်။ နောင်ကော်ရွာမှာ ညဘက်ကျတဲ့တစ်လုံးက ရွာသူကြီးအိမ်ပေါ် ကျကွဲတာ၊ အိမ်ထဲမှာ အိပ်နေတဲ့မိသားစုတွေ သေကုန်ကြတယ်ပြောတာပဲ။ အဲ့အိမ်မှာ မြေးအဖွားတွေကော နေကြတာ၊ လူကြီးတွေဆုံးပြီး ကလေးတွေပဲ ကျန်ခဲ့တယ်”ဟု သိန္နီမြို့နယ် မိုင်းပါးဒေသခံတစ်ဦးက သျှမ်းသံတော်ဆင့်ကို ပြောသည်။
သိန္နီမြို့အခြေစိုက် စစ်ကောင်စီတပ် စကခ-၁၆ မှ ပစ်ခတ်လိုက်သည့် လက်နက်ကြီး ထိမှန်မှုကြောင့် နောင်ကော်ကျေးရွာမှ အသက် ၅၄ နှစ်အရွယ်ရှိ ရွာသူကြီးဖြစ်သူ လုံးစိုင်းဟန်၊ အသက် ၅၃ နှစ်အရွယ်ရှိ ပါ့ခမ်းရွှေ ဆိုသူ အမျိုးသမီးနှင့် သားဖြစ်သူ အသက် ၂၈ အရွယ် စိုင်းမောင်လှတို့ နေအိမ်ထဲတွင် ပွဲချင်းပြီးသေဆုံးသွားခဲ့ပြီး မြေးဖြစ်သူ အသက် ၇ နှစ်နှင့် ၂ နှစ်အရွယ် ကလေးငယ်တို့မှာ ဒဏ်ရာပြင်းထန်ကြောင်း သိန္နီမြို့မှ ၎င်းဒေသခံက ဆက်ပြောသည်။
ထို့အပြင် သိန္နီမြို့နယ် မိုင်းပါးကျေးရွာအုပ်စုအတွင်း ပိန်းဟုန်းကျေးရွာရှိ နေအိမ် ၂ လုံးလည်း လက်နက်ကြီးထိမှန်ကာ ပျက်စီးသွားကြောင်း ဒေသခံများထံမှ သိရသည်။
အလားတူ သိန္နီမြို့နယ် နမ့်စလပ်ကျေးရွာအုပ်စုတွင်လည်း နိုဝင်ဘာ ၂၁ ရက်က စစ်ကောင်စီတပ်မှ ပစ်ခတ်လာသည့် လက်နက်ကြီး ကျရောက်ပေါက်ကွဲခြင်းကြောင့် အမျိုးသားတစ်ဦး ပွဲချင်းပြီး သေဆုံးကာ ၂ ဦး ထိခိုက်ဒဏ်ရာရရှိခဲ့ကြောင်း သိန္နီမြို့နယ် ဒေသခံများက ပြောသည်။
“၁၀၂၇ စစ်ဆင်ရေး” တစ်လကျော် ကာလအတွင်း သိန္နီမြို့နယ်တွင် စစ်ကောင်စီတပ်၏ လက်နက်ကြီးထိမှန်မှုကြောင့် အမျိုးသမီး ၄ ဦး အပါအဝင် စုစုပေါင်း ၁၃ ဦး သေဆုံးခဲ့ပြီး ၂၀ ဦးထက်မနည်း ထိခိုက်ဒဏ်ရာရရှိကာ ဆက်သွယ်ရေးပြတ်တောက်မှုကြောင့် သတင်းမရရှိဘဲ သေဆုံးဒဏ်ရာရသူဦးရေမှာ လက်ရှိထက် ပိုမိုများပြားနိုင်ကြောင်း သိန္နီမြို့နယ်ဒေသခံများထံမှ သိရသည်။
Leave a Comments