သျှမ်းပြည် နမ့်ခမ်းမြို့နယ်တွင် ယနေ့ (ဒီဇင်ဘာ ၁)ရက် နံနက်ပိုင်း၌ တိုက်ပွဲများ ပြင်းထန်ပြီး စစ်ကောင်စီမှ လေယာဉ်ဖြင့် ဗုံးကြဲတိုက်ခိုက်မှုကြောင့် အမျိုးသမီးတစ်ဦး သေဆုံးပြီး လူငယ် တစ်ဦး ထိခိုက်ဒဏ်ရာရရှိခဲ့ကြောင်း စုံစမ်းသိရသည်။
ယနေ့( ဒီဇင်ဘာလ ၁ ရက်နေ့) မနက် ၈ နာရီခွဲတွင် နမ့်ခမ်းမြို့ ပေါက်နေရပ်ကွက်၊ စာရေးတန်းရပ်ကွက်၊ နမ့်ခမ်းဖောင်၊အောင်မင်္ဂလာ၊ဟိုနောင်ရပ်ကွက်တို့တွင် လေယာဉ်ဖြင့် ဗုံးကြဲ တိုက်ခိုက် မှုကြောင့် အမျိုးသမီးတစ်ဦး သေဆုံးကာ လူငယ်တစ်ဦး ဒဏ်ရာရရှိခဲ့ပြီး နေအိမ်များလည်း ပျက်စီးမှု ရှိခဲ့ကြောင်း နမ့်ခမ်းဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။
“ရပ်ကွက်ထဲက အိမ်တွေ နဲ့ စာသင်ကျောင်းတွေ ၉ လုံးလောက်ပျက်စီးသွားတာ။အဖွားတစ်ယောက်က သေသွားပြီး သူ့ရဲ့ မြေးတစ်ယောက် ဒဏ်ရာရသွားတယ်။” ဟု နမ့်ခမ်းဒေသခံအမျိုးသားတစ်ဦးက ပြောသည်။
အလားတူ နမ့်ခမ်းတွင် ယမန် (နိုဝင်ဘာ ၃၀) ရက်နံနက် ၉ နာရီမှ ဒီဇင်ဘာလ ၁ ရက် နံနက် ၇ နာရီထိ တိုက်ပွဲများ ပြင်ထန်ခဲ့ကြောင်း ဒေသခံများက ပြောသည်။
စစ်ကောင်စီ နှင့် ညီနောင်မဟာမိတ် ၃ ဖွဲ့တို့ တိုက်ပွဲများပြင်းထန်ပြီး မူဆယ်မြို့ထဲထိ လက်နက်ကြီးသံများ လေယာဉ်သံများဆက်တိုက်ကြားနေရပြီး မူဆယ်မြို့တွင် ဖုန်းလိုင်းများ၊ Wifi များ ပြတ်တောက်ခံ ရကြောင်း မူဆယ်ဒေသခံများက ပြောသည်။
မြန်မာ – တရုတ်နယ်စပ် မူဆယ်မြို့နယ် ၁၀၅ မိုင် ကုန်သွယ်ရေးဇုန်အပြင် နေရာတော်တော်များများတွင် ဖုန်းလိုင်းများ၊ အင်တာနက်လိုင်းများ ပြတ်တောက်ခံရပြီး စစ်ကောင်စီ နှင့် ညီနောင်မဟာမိတ်တို့ တိုက်ပွဲများလည်း ဆက်လက် ဖြစ်ပွားနေကြောင်း ဒေသခံ ပြည်သူများက သျှမ်းသံတော်ဆင့်ကို ပြောသည်။
Leave a Comments