သျှမ်းပြည် သိန္နီမြို့နယ်တွင် ကိုးကန့်တပ်ဖွဲ့ MNDAA က လူငယ် ၂၀ ဦးထက်မနည်းကို ဖမ်းဆီးခေါ်ဆောင်သွားကြောင်း စုံစမ်းသိရသည်။

“၁၀၂၇ စစ်ဆင်ရေး” စတင်လာသည့် အောက်တိုဘာ ၂၇ ရက်မှစ၍ သိန္နီမြို့နယ် နမ့်စလပ်နှင့် စယ်အူကျေးရွာအုပ်စုရှိ ကျေးရွာများမှ လူငယ် ၂၀ ဦးထက်မနည်းကို ကိုးကန့်တပ်ဖွဲ့ MNDAA က ဖမ်းဆီးခေါ်ဆောင်သွားကြောင်း သိန္နီမြို့နယ် ဒေသခံများက ပြောသည်။

“နမ့်စလပ်နဲ့ စယ်အူထဲက ရွာတွေမှာ ကိုးကန့်တပ်က ယောကျ်ားလေးကော၊ မိန်းကလေးကော လာဖမ်းပြီး ခေါ်သွားတယ်။ အဲ့လိုလိုက်ဖမ်းနေလို့ ကျတော်တို့လဲ မနေနိုင်တော့ လားရှိုးဘက်ကို ထွက်ပြေးလာတာ။ ကိုးကန့်တပ်တွေ ဖမ်းသွားတာ ကျတော်သိသလောက်ဆိုရင် နမ့်စလပ်အုပ်စုထဲက တန့်ဆော်ရွာက ၁၂ ယောက်၊ မိုင်းပွန်းနဲ့ နမ့်စလီး ဘက်မှာလဲ ပြီးခဲ့တဲ့အပတ်ကပဲ ၈ ယောက် လာဖမ်းသွားတယ်။ ကျနော်မသိတဲ့ တခြားရွာတွေလဲ ရှိသေးတယ်”ဟု သိန္နီမြို့နယ်မှ လူငယ်တစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် နိုဝင်ဘာလ ဒုတိယပတ်အတွင်း မူစယ်မြို့နယ်မှ သီပေါမြို့သို့ နေရပ်ပြန်လာသည့် အသက် ၁၅ နှစ် အရွယ်ရှိ စိုင်းဘုန်းနိုင်ဦး၊ အသက် ၁၀ နှစ်အရွယ်ရှိ နန်းအွန်ဖွေး တို့ လူငယ် ၂ ဦးနှင့် စိုင်းသာဦး အမည်ရှိ ကားသမားတစ်ဦးတို့အား ကိုးကန့်တပ်ဖွဲ့ MNDAA က သိန္နီမြို့ ပန်လော့တိုးဂိတ်၌ ဖမ်းဆီးခဲ့ရာ ယနေ့အထိ ပြန်မလွှတ်မြောက်သေးကြောင်း ၎င်းတို့၏ မိသားစုဝင်များထံမှ သိရသည်။

အလားတူ နိုဝင်ဘာ ၁၃ ရက်ကလည်း မူဆယ်မြို့နယ် မုံးကိုးမြို့ရှိ ဘုန်းကြီးကျောင်းတစ်ခုမှ ကိုရင်များကို ကိုးကန့်တပ်ဖွဲ့ MNDAA က စစ်ဘေးလွတ်ရာသို့ တိမ်းရှောင်မည်ဟုဆိုကာ ခေါ်ဆောင်သွားခဲ့ပြီး ကိုရင် ၄ ပါးအား ပြန်မလွတ်ပေးဘဲ စစ်မှုထမ်းရန် လူဝတ်လဲလိုက်ရကြောင်း မုံးကိုးဒေသခံများထံမှ သိရသည်။

ထို့အပြင် မုံးကိုးမြို့တွင်လည်း MNDAA တပ်ဖွဲ့က ရပ်ကွက်တိုင်းရှိ နေအိမ်များတွင် အိမ်ထောင်စုစာရင်းများ ကောက်ယူနေပြီး စစ်မှုထမ်းနိုင်မည့် လူငယ်မရှိလျှင် သက်ကြီးရွယ်အိုများကိုပါ စစ်ဝတ်စုံဝတ်ခိုင်းပြီး ချက်ပြုတ်ရေးအတွက် ခေါ်ဆောင်သွားကြောင်း မုံးကိုးဒေသခံများက ပြောသည်။

အဆိုပါ ကိစ္စနှင့်ပတ်သက်ပြီး MNDAA ပြောရေးဆိုခွင့်ရှိသူ လီကျားဝင်း က ” ကျနော်တို့ စစ်မှုထမ်းဥပဒေက အထူးဒေသ(၁) အတွင်း အရပ်သားတွေအနေနဲ့ အသက် ၁၆နှစ်ကနေစထမ်းရပါတယ်” ဟု သျှမ်းသံတော်ဆင့်ကိုပြောသည်။

သို့သော် လက်ရှိမှာ အသက် (၁၂) အရွယ် ကလေးငယ်များပါ ခေါ်ဆောင်သွားကြောင်း၊ အထူးဒေသ (၁) နေထိုင်သူမဟုတ်သည့် သိန္နီမြို့နယ် ပြည်သူများပါ ဖမ်းခေါ်နေသည့်အတွက် ပြည်သူများစိုးရိမ်နေကြောင်း ဒေသခံများက ပြေသည်။

ကိုးကန့်တပ်ဖွဲ့ MNDAA သည် “၁၀၂၇ စစ်ဆင်ရေး” တစ်လနီးပါး ကာလအတွင်း စစ်ကောင်စီ၏ တပ်စခန်း ၁၅၀ ကျော်နှင့် ချင်းရွှေဟော်မြို့ကို တိုက်ခိုက်သိမ်းပိုက်နိုင်ခဲ့ပြီး လက်ရှိတွင် လောက်ကိုင်မြို့ကို ဝိုင်းရံပိတ်ဆို့လျက်ရှိကာ အလုံးစုံထိန်းချုပ်နိုင်ရန်အတွက် စစ်အင်အား အများအပြား ဖြန့်ကျက်ထားကြောင်းလည်း သိရသည်။