Monday, July 22, 2024

လောက်ကိုင်မြို့တွင် လက်နက်ကြီးကြောင့် လူ ၆ ဦးသေဆုံး၊ အများအပြား ဒဏ်ရာရ

Must read

သျှမ်းပြည် လောက်ကိုင်မြို့တွင် လက်နက်ကြီး ကျရောက်ပေါက်ကွဲခြင်းကြောင့် အရပ်သား ၆ ဦး သေဆုံးပြီး၊ ၁၀ ဦးထက်မနည်း ထိခိုက်ဒဏ်ရာ ရရှိကြောင်း စုံစမ်းသိရသည်။

လောက်ကိုင်မြို့ အရပ်သားကားပေါ် လက်နက်ကြီးကျ

ယနေ့ (နိုဝင်ဘာ ၂၂ ရက်) နံနက် ၈ နာရီခွဲဝန်းကျင်တွင် လောက်ကိုင်မြို့အထွက် တုန်ချိန်နှင့် ဆယ်တန်ဂိတ်တို့တွင် လက်နက်ကြီး ကျရောက်ပေါက်ကွဲခြင်းကြောင့် ပြည်သူ ၆ ဦး သေဆုံးပြီး ၁၀ ဦးထက်မနည်း ထိခိုက်ဒဏ်ရာရရှိကြောင်း လောက်ကိုင်ဒေသခံများက ပြောသည်။

“ပထမတစ်နေရာက လောက်ကိုင်အထွက် တုန်ချိန်မှာ ဖြစ်တာ၊ အဲ့မှာ ၃ ယောက်သေတယ်။ အဲ့ကနေ ထပ်ပြီးထွက်လာရင် ဆယ်တန်ဂိတ်အကျော်မှာ ဟိုင်းဂျက်ကား တစ်စီးပေါ်လည်း ထိထားတယ်။ ဒီတစ်စီးက လက်နက်ကြီး မှန်တာ။ လမ်းပေါ်မှာ ၃ ယောက်သေနေတာ တွေ့တယ်။ ထိခိုက်ဒဏ်ရာရတာတော့ ဘယ်နှယောက်လဲ မသိဘူး။ ဒီနေ့မနက်လေးတင် လောက်ကိုင်အထွက်လမ်း တုန်ချိန်မှာ ၂ နေရာစလုံး ဖြစ်တာ”ဟု လောက်ကိုင်မြို့ ဒေသခံတစ်ဦးက သျှမ်းသံတော်ဆင့်ကို ပြောသည်။

လောက်ကိုင် အရပ်သားကားပေါ် လက်နက်ကြီးထိ

လက်ရှိတွင် လောက်ကိုင်မြို့ပေါ်သို့ တိုက်ပွဲဖြစ်ပွားမည်ကို စိုးရိမ်သည့် ပြည်သူအများအပြားသည် မြို့မှ ထွက်ခွာလျက်ရှိရာ စက်သုံးဆီဈေးများ အဆမတန် မြင့်တက်နေပြီး စားသုံးဆီနှင့် ဆန်ဝယ်ယူရန် ခက်ခဲနေကြောင်း လောက်ကိုင်ဒေသခံများထံမှ သိရသည်။

အရပ်သားကားပေါ် လက်နက်ကြီးထိ

“လောက်ကိုင်ကနေ ထွက်မယ့်လူကတော့ အရမ်းများလို့ ဓာတ်ဆီတောင် ၅၀၀၀ မကတော့ဘူး၊ ၁ သောင်းကျော်နေပြီ။ ဆန်တစ်အိတ်ကိုလည်း ၃၀၀၀ ယွမ် ဝယ်လို့တောင် မရတော့ဘူး။ စားဆီကတော့ ဘယ်မှာမေးမေး မရှိတော့ဘူး”ဟု လောက်ကိုင်မြို့မှ ၎င်းဒေသခံက သျှမ်းသံတော်ဆင့်ကို ဆက်ပြောသည်။

အလားတူ နိုဝင်ဘာ ၁၁ ရက်ကလည်း လောက်ကိုင်မြို့မှ ထွက်ပြေးတိမ်းရှောင်လာသည့် လူအုပ်ကြားထဲသို့ စစ်ကောင်စီ လေကြောင်းမှ ကြဲချခဲ့သည့် ဗုံးကျရောက်ပေါက်ကွဲမှုကြောင့် စစ်ဘေးရှောင် ၁၀ ဦးထက်မနည်း သေဆုံးခဲ့ပြီး ထိခိုက်ဒဏ်ရာ ရရှိသူများကို ကိုးကန့်တပ်ဖွဲ့ MNDAA က လုံခြုံသည့်နေရာတွင် ဆေးဝါးကုသပေးခဲ့ကြောင်း သိရသည်။

လက်ရှိတွင် ကိုးကန့်တပ်ဖွဲ့ MNDAA က လောက်ကိုင်မြို့ကို ဝိုင်းရံပိတ်ဆို့ထားပြီး ထိုးစစ်ဆင်နွှဲသည့်အခါ မြို့နေပြည်သူများ ထိခိုက်ဆုံးရှုံးမှု အနည်းဆုံးဖြစ်စေရန် စစ်ကောင်စီ၏ တပ်၊ ဌာနဆိုင်ရာများအနီးမှ အမြန်ဆုံးရွှေ့ပြောင်းကြရန် နိုဝင်ဘာ ၁၈ ရက်နေ့က ထုတ်ပြန်ထားသည်။

“၁၀၂၇ စစ်ဆင်ရေး”ကြောင့် လောက်ကိုင်မြို့အနီး မြန်မာ-တရုတ်နယ်စပ်ရှိ BP-125 စစ်ရှောင်စခန်းတွင် စစ်ဘေးရှောင်ဦးရေ ၃၀၀၀၀ ကျော်အထိ ထွက်ပြေးတိမ်းရှောင်နေရပြီး နိုဝင်ဘာ တတိယပတ်အတွင်း မိုးရွာသွန်းမှုကြောင့် သောက်သုံးရေနှင့် စားနပ်ရိက္ခာများ အရေးပေါ်လိုအပ်လျက်ရှိကြောင်း လောက်ကိုင်ဒေသခံများထံမှ သိရသည်။

Leave a Comments

- Advertisement -spot_img

Latest article