သျှမ်းပြည် လားရှိုးမြို့နယ် မိုင်းကျက်အုပ်စုတွင် ညီနောင်မဟာမိတ် ၃ ဖွဲ့က ပြည်သူနေအိမ်များကို ဝင်ရောက်ဖျက်စီးနေပြီး တိုက်ပွဲကာလ သုံးပတ်အတွင်း ပြည်သူ ၁ ဦး သေနတ်ပစ်သတ်ခံရကြောင်း စုံစမ်းသိရသည်။
လားရှိုးမြို့နှင့် မိုင် ၆၀ အကွာရှိ မိုင်းယော်တိုက်နယ်၊ မိုင်းကျက်အုပ်စုတွင် အခြေစိုက်သော စစ်ကောင်စီတပ်ကို “၁၀၂၇ စစ်ဆင်ရေး” စတင်သည့် အောက်တိုဘာ ၂၇ ရက်ကတည်းက ညီနောင်မဟာမိတ် ၃ ဖွဲ့က ထိုးစစ်ဆင် တိုက်ခိုက်နေပြီး ဝမ်လုံ၊ ဝမ်ကတ်ကျေးရွာများတွင် စခန်းချနေသည့် ညီနောင်မဟာမိတ်တပ်များက ပြည်သူနေအိမ် ဝင်ရောက်ဖျက်ဆီးမှုများ ရှိနေကြောင်း လားရှိုးမြို့နယ် မိုင်းကျက်ဒေသခံများက ပြောသည်။
“ဝမ်လုံ၊ ဝမ်ကတ်ဘက်က ပြည်သူနေအိမ်တွေကို ညီနောင်မဟာမိတ်တပ်သားတွေက ဝင်ဖောက်ပြီး အိမ်ထဲက ဥစ္စာပစ္စည်းတွေကို ယူသွားရောင်းနေတာ။ ဝမ်ကတ်မှာ ရှိတဲ့ ကုန်စုံဆိုင် ၆ ဆိုင်နဲ့ ဝမ်လုံမှာရှိတဲ့ ကုန်စုံဆိုင်တွေ အကုန်လုံးကို သူတို့စစ်သားတွေ ဖောက်နေတာ။ အိမ်တံခါးပိတ်ထားလဲ သူတို့ဖျက်ပြီး ဝင်မွှေကြတယ်။ ဆိုင်ကယ်တွေလဲ ယူစီးသွားပြီး ဆီကုန်တဲ့နေရာမှာ ပစ်ထားခဲ့တယ်”ဟု လားရှိုးမြို့နယ် မိုင်းယော်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့အပြင် လားရှိုးမြို့နယ် မိုင်းကျက်ကျေးရွာအုပ်စုတွင် နှစ်ဘက်တိုက်ပွဲ ဖြစ်ပွားနေသည့် သုံးပတ်အတွင်း ညီနောင်မဟာမိတ်တို့၏ သေနတ်ပစ်သတ်ခံရ၍ အရပ်သားတစ်ဦး သေဆုံးခဲ့ပြီး၊ နောက်တစ်ဦး ပျောက်ဆုံးနေကြောင်း လားရှိုးမြို့နယ် မိုင်းကျက်ဒေသခံများထံမှ သိရသည်။
ပြီးခဲ့သည့် သီတင်းကျွတ် လဆုတ် (၁၀)ရက် (နိုဝင်ဘာ ၈ ရက်) နံနက် ၉ နာရီဝန်းကျင်တွင် ဦးတျပ်ဆိုသည့် အမျိုးသားတစ်ဦးကို ညီနောင်မဟာမိတ်တပ်သားများက ဖမ်းဆီးရိုက်နှက်စဉ် ထိုသူက ထွက်ပြေးရန် ပြုလုပ်သဖြင့် သေနတ်ပစ်ခတ်ခံခဲ့ရကြောင်း မိုင်းကျက်ဒေသခံများက ပြောသည်။
“အဲ့ ဦးတျပ် သေနတ်ပစ်ခံရတဲ့ရက်မှာပဲ နားပေါင်းရွာက အသက် ၅၈ နှစ်အရွယ် ဦးယွမ်းမတ် လည်း ပျောက်နေတယ်။ ပြီးတော့ အသက် ၆၀ အရွယ် ဦးလူ ကတော့ လေယာဉ်ဗုံးကြဲတာ ထိမှန်တယ်”ဟု လားရှိုးမြို့နယ် မိုင်းကျက်ကျေးရွာအုပ်စုမှ အမျိုးသားတစ်ဦးက သျှမ်းသံတော်ဆင့်ကို ဆက်ပြောသည်။
လားရှိုးမြို့နယ် မိုင်းကျက်အုပ်စုတွင် နိုဝင်ဘာလ ၂၀ ရက်မှစကာ နှစ်ဘက်တိုက်ပွဲ ပြန်လည်ပြင်းထန်နေပြီး စစ်ကောင်စီတပ်မှ ဂျက်တိုက်လေယာဉ်ဖြင့် လာရောက်ဗုံးကြဲမှုကြောင့် ဝမ်ကတ်ကျေးရွာရှိ နေအိမ် ၃၀ ကျော် ထိခိုက်ပျက်စီးခဲ့ကြောင်း ဒေသခံများထံမှ သိရသည်။
“မနေ့ (နိုဝင်ဘာ ၂၁ ရက်)ကတော့ ဂျက်တိုက်လေယာဉ် တစ်စီးထဲက ၃ ခေါက်လာတာ။ အရင် ၂ ခေါက်လာတာက ဗုံးကြဲသွားတယ်၊ ၃ ကြိမ်မြောက်လာတော့ လေယာဉ်ပေါ်ကနေ စက်သေနတ်နဲ့ ပစ်သွားတာ။ မဟာမိတ်တပ်သားတွေကတော့ ရွာထဲမှာ နေရာယူထားတာ။ အခုထိ မထွက်သေးဘူး။ အိမ်တွေကတော့ အလုံး ၃၀ ထက်မနည်း ပျက်ကုန်ပြီ”ဟု လားရှိုးမြို့နယ် မိုင်းကျက်ဒေသခံတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် နိုဝင်ဘာ ၄ ရက်တွင်လည်း မိုင်းကျက်ရှိ စစ်ကောင်စီ တပ်စခန်းအား ညီနောင်မဟာမိတ် ၃ ဖွဲ့က တိုက်ခိုက်စဉ်တွင် စစ်ကောင်စီတပ်မှ လေကြောင်းဖြင့် အဆိပ်ငွေ့ဗုံး အသုံးပြုကာ ပြန်လည်တိုက်ခိုက်ခဲ့ကြောင်း ညီနောင်မဟာမိတ် ၃ ဖွဲ့က နိုဝင်ဘာ ၁၈ ရက်တွင် သတင်းထုတ်ပြန်ထားသည်။
