သျှမ်းမြောက် နမ့်ခမ်းမြို့ ရှိ စည်ပင်သာယာရေးရုံးရှေ့တွင် စစ်ကောင်စီ နှင့် တအာင်း(ပလောင်) အမျိုးသား လွတ်မြောက်ရေးတပ်မတော် (TNLA) တို့ ကြား ဒရုန်းပစ်ခတ်မှုကြောင့် နမ့်ခမ်း စည်ပင်ဝန်ထမ်း (၁) ဦး နှင့် ပြည်သူတစ်ဦး ပွဲချင်းပြီး သေဆုံးကာ ၇ ဦးထက် မနည်း ထိခိုက်ဒဏ်ရာ ရရှိခဲ့ကြောင်း စုံစမ်းသိရှိရသည်။
နိုဝင်ဘာ ၂၁ ရက် ညနေ ၃ နာရီခွဲဝန်းကျင်တွင် စစ်ကောင်စီဘက် မှ ထောက်ပို့ လေယာဉ်ဖြင့် လေထီးနှင့် နမ့်ခမ်းမြို့ရှိ စခန်းသစ်ကို လာချသည့် အချိန် TNLA ဘက်မှလည်း ဒရုန်း နှင့် လက်နက်ကြီး လက်နက်ငယ်ဖြင့် ပစ်ခတ်ခဲ့ကြောင်းသိရှိရသည်။
“နှစ်ဖက်စလုံး အပြန်အလှန်ပစ်တဲ့ အချိန်ကဖြစ်သွားတာ။ ဘယ်အဖွဲ့က လက်နက်ကြီး လက်ချက်လဲဆိုတော့ အသေအချာ မပြောနိုင်ပါ။ ဘာကြောင့်လဲဆိုတော့ လေထီးလာချတဲ့အချိန်မှာ စကစ လဲ လေထီးပါလာတဲ့ ပစ္စည်းတွေ စခန်းသစ်ကနေ ထွက်ကောက်ကြတာ TNLA က သိလို့ လက်နက်ကြီးနဲ့လှမ်းထုတာ ဟိုဘက်ကလဲ ပြန်ထုလာတယ်” ဟု နမ့်ခမ်းဒေသခံ မြေပြင် သတင်းရင်းမြစ် တစ်ဦးက သျှမ်းသံတော်ဆင့် ကိုပြောသည်။
ထိုထိခိုက်ဒဏ်ရာ ရသူ (၇) ဦးထဲမှ (၃) ဦးသည် ဒဏ်ရာ ပြင်းထန်စွာ ရရှိသဖြင့် မူဆယ်ဆေးရုံသို့ ပို့ဆောင်ထားပြီး ကျန်သည့် ၄ ဦးကို နမ့်ခမ်းဆေးရုံသို့ ဆေးကုသမှု ခံယူထားကြောင်း မြေပြင်သတင်းရင်းမြစ် တစ်ဦးထံမှ သိရသည်။
“စည်ပင်ရုံးရှေ့ကို ထွက်လာပြီး လေထီးချတာ ထွက်ကြည့်တဲ့အချိန်မှာ ထိသွားတာပါ။ အခု (၂) ယောက်သေတဲ့အထဲမှာ တစ်ယောက်က အမျိုးသားဖြစ်ပြီး နောက်တစ်ယောက်က အမျိုးသမီးဖြစ်တယ်။ အဲ့ဒီ သေသွားတဲ့ အမျိုးသမီးရဲ့ ယောက်ျား က လွန်ခဲ့တဲ့ ၁၀ နှစ်က အမှိုက်သိမ်းရင်းနဲ့ မြို့လယ်ဘုရားကျောင်းရှေ့ မှာ ထောင်ထားတဲ့ ဗုံးနဲ့ ထိပြီး ဆုံးသွားခဲ့တာ” ဟု နမ့်ခမ်းဒေသခံ မြေပြင်သတင်းရင်းမြစ် တစ်ဦး ကပြောသည်။
သျှမ်းမြောက်ဒေသမှာ ညီနောင်မဟာမိတ် (၃) ဖွဲ့ တို့ (၁၀၂၇) စစ်ဆင်ရေး ဖော်ဆောင်ပြီးနောက် စစ်ကောင်စီဘက်မှ အများအပြား ထိခိုက်သေဆုံးမှု ရှိခဲ့ပြီးနောက် စစ်ကောင်စီသည် နမ့်ခမ်းမြို့အပါအဝင် သျှမ်းပြည်အတွင်းရှိ မြို့နယ်အများစုကို မာရှယ်လောထုတ်ထားပြီး မနက် (၆) နာရီမှ ည (၆) နာရီအထိ အပြင်သို့ သွားလာခွင့် မပြုကြောင်း ထုတ်ပြန်ထားသည်။
“အခု နှစ်ဖက်တပ်တွေက ညမထွက်ရ အမိန့်ချထားတော့ တမြို့လုံး တိတ်ဆိတ်နေတယ်။ ညနေ ၅:၀၀ နာရီကျော်တိုင်း ဘယ်သူမှမထွက်ကြတော့ဘူး။ TNLA တွေက မြို့ထဲ စျေးနား နဲ့ ရဲစခန်းတွေမှာတော့ နေရာယူထားတယ်” ဟု ဒေသခံ တစ်ဦး ကပြောသည်။
နမ့်ခမ်းမြို့သည် နိုဝင်ဘာ (၃) ရက်နေ့မှ စတင်ပြီး TNLA တပ်ဖွဲ့တို့ မြို့သိမ်းတိုက်ပွဲ ဆင်နွှဲပြီးနောက် ရက်ဆက်တိုက်နီးပါး နမ့်ခမ်းမြို့နယ်အတွင်း လက်နက်ကြီး လက်နက်ငယ်သံများ ဆက်တိုက်ကြားနေရသဖြင့် ဒေသခံများ စိုးရိမ်ထိတ်လန့်နေကြသည်။
လက်ရှိချိန်ထိ နမ့်ခမ်းမြို့နယ်ရှိ စစ်ကောင်စီတပ်စခန်း၏ အကြီးဆုံး စခန်းဖြစ်သည့် စခန်းသစ်ကိုတော့ TNLA ဘက်မှ သိမ်းပိုက်နိုင်ခဲ့ခြင်း မရှိသေးပေ။
