သျှမ်းပြည် တောင်ပိုင်း တောင်ကြီးမြို့နယ်တွင် စက်သုံးဆီးများ တင်သွင်းမှု နည်းပါးသဖြင့် လက်ကျန်နည်းသောကြောင့် ဓာတ်ဆီဆိုင်များမှ နိုဝင်ဘာလ (၁၅) ရက်မှ စတင်ကာ ဝယ်ယူသူများကို အကန့်အသတ်ဖြင့်သာ ရောင်းချပေးတော့ကြောင်း စုံစမ်းသိရသည်။
စက်သုံးဆီ အဝင်နည်းနေသဖြင့် ပြတ်လပ်သွားမည့် အခြေအနေမျိုး မရောက်ရှိစေရန် အချို့ ဆီဆိုင်များမှာ အကန့်အသတ်ဖြင့်သာ ရောင်းပေးနေကြောင်း၊ ပုံးနှင့် လာဝယ်တာမျိုးလည်း မရောင်းချပေးတော့ကြောင်း ဒေသခံများ ပြောကြားချက်အရ သိရှိရသည်။
“ဆီက လုံးဝပြတ်နေတာတော့ မဟုတ်သေးဘူး။ ဒါပေမယ့် အရမ်းနည်းနေပြီ။ အဲ့ဒါကြောင့် အကန့်အသတ်နဲ့ပဲရောင်းပေးနေတာ။ ကားတို့ ဆိုင်ကယ်တို့ လာဖြည့်ရင်တော့ ရောင်းပေးတယ်။ ပါဆယ်လာဝယ်လို့တော့မရဘူး” ဟု ဓာတ်ဆီရောင်းချနေ သူ တစ်ဦးမှ ပြောသည်။
တောင်ကြီးမြို့ရှိ အချို့နေရာများတွင် စက်သုံးဆီကို အကန့်အသတ်ဖြင့် ဝယ်ယူနိုင်သေးသော်လည်း အချို့သော ဆိုင်များမှာ ရောင်းပေးခြင်း မရှိတော့ဘဲ ပိတ်ထားလိုက်ပြီဖြစ်ကြောင်းလည်း သိရသည်။
စက်သုံးဆီစျေး ထပ်တက်နိုင်သည့် အခြေအနေရှိသည့်အတွက် ဆိုင်ရှင်များမှ ဓာတ်ဆီများကို လှောင်ထားခြင်းဖြစ်ကြောင်း ဒေသခံများက ထင်ကြေးပေးနေကြသည်။
“အခုက ဓာတ်ဆီကို ပုံးနဲ့တောင် ဝယ်လို့ မရတော့ဘူး။ တချို့ ဓာတ်ဆီဆိုင်ကြီးတွေမှာတော့ သုံးသောင်းဖိုးလောက် အများဆုံး ရောင်းပေးနေတာမျိုး ရှိတယ်။ ဒီမနက် ဆီထည့်တာတော့ 92 တစ်လီတာကို နှစ်ထောင် နှစ်ရာသုံးဆယ်နဲ့ ပေးဝယ်ခဲ့ရတယ်” ဟု တောင်ကြီးမြို့ ဒေသခံတစ်ဦး၏ ပြောပြချက်အရ သိရသည်။
မြန်မာနိုင်ငံတွင် အောက်တိုဘာလကုန်ပိုင်းမှ စတင်ကာ ဒေသအချို့တွင် စက်သုံးဆီများ စတင်ပြတ်လပ်လာပြီး ယခုနောက်ပိုင်းတွင် တစ်နိုင်ငံလုံး အတိုင်းအတာအနေဖြင့် ဓာတ်ဆီဝယ်ယူရန် ယခင်ကထက် ပိုမိုအခက်အခဲ ရှိကြောင်း သိရသည်။
Leave a Comments