သျှမ်းပြည် လားရှိုးမြို့နယ်တွင် သိန္နီမြို့မှ ထွက်ပြေးတိမ်းရှောင်လာသည့် စစ်ဘေးရှောင်များသည် လားရှိုးမြို့တွင်းသို့ ဝင်ရောက်ခွင့်မရကြောင်း စုံစမ်းသိရသည်။

သိန္နီမြို့မှ လားရှိုးမြို့သို့ ထွက်ပြေးတိမ်းရှောင်လာသည့် စစ်ဘေးရှောင်များကို လားရှိုးမြို့ရှိ စစ်ကောင်စီလက်အောက်ခံ ဌာနဆိုင်ရာများမှ ယမန်နေ့ (နိုဝင်ဘာ ၁၆ ရက်)မှစ၍ ဟိုပိတ်တိုးဂိတ်မှ မြို့တွင်းသို့ ဝင်ရောက်ခြင်းကို ကန့်သတ်လိုက်ကြောင်း လားရှိုးဒေသခံများက ပြောသည်။

“ဟုတ်တယ်။ စစ်ကောင်စီတပ်က သိန္နီကနေ စစ်ဘေးရှောင်လာတဲ့လူတွေကို မနေ့က ၁၆ ရက်နေ့ကတည်းက လားရှိုးမြို့ထဲ အဝင်မခံတော့ဘူး။ သူတို့ပြောတာတော့ အပြင်က စစ်သားတွေပါ စစ်ဘေးရှောင်အနေနဲ့ အယောင်ဆောင်ပြီး ဝင်လာမှာ စိုးရိမ်တယ်လို့ အဲ့လိုပြောတယ်။ နောက်ပြီး လားရှိုးမြို့ထဲမှာလဲ စစ်ရှောင်တွေ အများကြီးရှိတော့ ကျွေးလို့မလောက်ဘူးပေါ့။ သူတို့အဲ့လိုပြောတာပဲ”ဟု လားရှိုး‌ဒေသခံတစ်ဦးက သျှမ်းသံတော်ဆင့်ကို ပြောသည်။

သိန္နီမြို့မှ စစ်ဘေးရှောင်များကို သွားရောက်သယ်ဆောင်လာသည့် ယာဉ်တန်းကို စစ်ကောင်စီတပ်မှ လားရှိုးမြို့နယ် ဟိုပိတ်ကျေးရွာရှိ တိုးဂိတ်တွင် တားမြစ်ခဲ့ပြီး မြို့တွင်းသို့ မဝင်ရောက်ရန် ကန့်သတ်လိုက်ခြင်းကြောင့် လားရှိုးမြို့ပြင်ရှိ ဘုန်းကြီးကျောင်းများတွင်သာ တည်းခိုနေရကြောင်း လားရှိုးဒေသခံများထံမှ သိရသည်။

“အခက်အခဲကတော့ အများကြီးရှိတယ်။ အဝတ်အထည်၊ အစားအသောက်၊ တည်းခိုရတဲ့နေရာ ဒီဟာတွေပေါ့။ အခုအခြေအနေမှာ အရမ်းအခက်အခဲ ဖြစ်နေတာက စစ်ရှောင်တွေထားမယ့် နေရာပေါ့။ မနေ့က သိန္နီကနေ လားရှိုးကို စစ်ဘေးရှောင်လာတဲ့ လူတွေဆိုရင် စစ်ကောင်စီက မြို့ထဲ ပေးမဝင်တော့ မြို့ပြင်က ဘုန်းကြီးကျောင်းတွေမှာပဲ တည်းရတာမျိုးတွေ ရှိတယ်”ဟု လားရှိုးမြို့ဒေသခံတစ်ဦးက သျှမ်းသံတော်ဆင့်ကို ဆက်ပြောသည်။

အလားတူ သျှမ်း-ကရင်နီနယ်စပ် တလျှောက်တွင် နိုဝင်ဘာ ဒုတိယပတ်မှစ၍ စစ်ရေးပြင်းထန်နေပြီး ထိုဒေသမှ ထွက်ပြေးတိမ်းရှောင်လာသူများကို တောင်ကြီး၊ အောင်ပန်း၊ ညောင်ရွှေ မြို့ များတွင် ဖြတ်သန်းခွင့်မပြုသည့်အပြင် ဘုန်းကြီးကျောင်းများ၊ ဆွေမျိုးနီးစပ်ရာ နေအိမ်များတွင်လည်း ခိုလှုံခွင့်မပြုရန် စစ်ကောင်စီက နိုဝင်ဘာ ၁၅ ရက်တွင် ညွှန်ကြားထားကြောင်း သိရသည်။

လက်ရှိတွင် လားရှိုးမြို့အခြေစိုက် စစ်ကောင်စီတပ်စခန်းများကို ညီနောင်မဟာမိတ် ၃ ဖွဲ့က ဒရုန်းဖြင့် ခြိမ်းခြောက်တိုက်ခိုက်မှုများ ရှိနေပြီး “၁၀၂၇ စစ်ဆင်ရေး” စတင်သည့် အောက်တိုဘာ ၂၇ ရက်မှစ၍ ယနေ့ နိုဝင်ဘာ ၁၇ ရက်အထိ လားရှိုးမြို့နယ်တွင် စစ်ဘေးရှောင်ဦးရေ ၆၅၀၀ ကျော် နှင့် သိန္နီမြို့မှ ထွက်ပြေးတိမ်းရှောင်လာသည့် စစ်ဘေးရှောင် ၁၅၀၀ ဦးခန့်၊ စုစုပေါင်း စစ်ဘေးရှောင်ဦးရေ ၉၀၀၀ ကျော်မှာ စားနပ်ရိက္ခာနှင့် စစ်ရှောင်နေရာ အခက်အခဲများ ရှိနေကြောင်း သိရသည်။