Sunday, July 21, 2024

သျှမ်း-ကရင်နီ နေရပ်ပြန် စစ်ရှောင်များ တိုက်ပွဲများကြား ထပ်မံပိတ်မိ

Must read

သျှမ်း-ကရင်နီ နယ်စပ် မိုးဗြဲမြို့ ၊ လွိုင်ကော်မြို့နယ် နှင့် ဒီးမော့ဆို့အတွင်း စစ်ကောင်စီတပ်စခန်းများကို တော်လှန်ရေး တပ်ပေါင်းစုများက နိုဝင်ဘာ (၁၁)ရက်တွင် တိုက်ပွဲပြန်လည်ဖြစ်ပွားခဲ့ရာ နေရပ်ပြန် စစ်ရှောင်များ ပိတ်မိနေကြောင်း စုံစမ်းသိရသည်။

မိုးဗြဲစစ်ရှောင်စခန်း

နိုဝင်ဘာ (၁၁)ရက်တွင် ၁၁.၁၁ စစ်ဆင်ရေး အနေဖြင့် စစ်ကောင်စီ တပ်စခန်းများအား တော်လှန်ရေး တပ်ပေါင်းစုများက ထိုးစစ်ဆင်ခဲ့ရာ နှစ်ဖက်တိုက်ပွဲပြန်လည်ဖြစ်ပွားခဲ့ပြီး စစ်ကောင်စီဘက်မှ လက်နက်ကြီး၊လက်နက်ငယ်များအပြင် တိုက်လေယာဥ်များကို အသုံးပြုပြီး တိုက်ခိုက်ခဲ့သည်။

ထိုသို့ ဖြစ်ပွားနေသော တိုက်ပွဲအတွင်း စစ်ကောင်စီဘက်မှ လက်နက်ကြီးနှင့် တိုက်လေယာဉ်များကို အသုံးပြုပြီး ပစ်ခတ်တာကြောင့် ဒေသခံများ ထိခိုက်သေဆုံးမှုရှိနေပြီး၊ လွန်ခဲ့သည့် လပိုင်းတွင် တိုက်ပွဲငြိမ်သက်သောကြောင့် နေရပ်ပြန်စစ်ရှောင်များလည်း လက်ရှိထပ်ဖန်ဖြစ်ပွားသည့် တိုက်ပွဲများကြား ပိတ်မိနေကြောင်း နေရပ်ပြန်စစ်ရှောင် တစ်ဦးက သျှမ်းသံတော်ဆင့်ကိုပြောသည်။

မိုးဗြဲ စစ်ဘေးရှောင်

“အောက်တိုဘာလ ကုန်ခါနီးလောက်ကတည်းက စစ်ကောင်စီဘက်က လက်နက်ကြီးနဲ့ ရမ်းပစ်သံတွေ ကြားနေရတာ။ တိုက်ပွဲဖြစ်တော့ လက်နက်ကြီးပစ်တာ၊ လေယာဉ်ဝဲတာတွေက တောက်လျှောက်ပဲ။ စစ်ကောင်စီက စစ်မြေပြင်မဟုတ်ဘဲ မြို့ထဲ၊ ရွာထဲလည်း ‌‌ဗုံးကြဲ၊ လက်နက်ကြီးနဲ့ ပစ်တာဆိုတော့ ကျမတို့က အခု ဗုံးခိုကျင်းတွေ၊ ဘုရားကျောင်းတွေမှာ ပုန်းအောင်းနေရတယ်” ဟု နေရပ်ပြန် စစ်ရှောင် တစ်ဦးမှ ပြောသည်။

အဆိုပါ စစ်ရှောင်များသည် ၂၀၂၂ ခုနှစ် အစောပိုင်းကတည်းက ဖြစ်ပွားခဲ့သော စစ်ပွဲများကြောင့် နေအိမ်ကို စွန့်ခွာကာ နီးစပ်ရာ သျှမ်းပြည် တောင်ပိုင်းဘက်တွင် ထွက်ပြေးတိမ်းရှောင်နေကြတဲ့ ဒေသခံများဖြစ်ပြီး စစ်ရှောင်စခန်းတွင် စစ်ရှောင်ရင်း စားဝတ်နေရေး၊ ကျန်းမာရေးနှင့် အလုပ်အကိုင်ရှားပါးမှုစသော အခက်အခဲ ပြဿနာများကြောင့် အရဲစွန့်ကာ နေရပ်ဒေသသို့ ပြန်ခဲ့ကြသူများ ဖြစ်သည်။

လွိုင်ကော် လေယာဥ်ကွင်း

“စစ်ရှောင်ရတာ အဆင်မပြေလို့ ပြန်လာကာမှ အခုလို ထပ်ဖြစ်တော့ တခြားတစ်နေရာကို ထပ်ပြီး တိမ်းရှောင်ဖို့က ကျမတို့မှာ အခက်အခဲဖြစ်တာ‌ပေါ့။ ငွေရေးကြေးရေးအရ‌ရော၊ လုံခြုံရေးအရရော အဆင်မပြေဘူး။ အခုက လမ်းတွေလည်း ပိတ်ထားတော့ သွားလို့လည်းမရဘူး”ဟု ၎င်းမှ ထပ်လောင်း ပြောကြားသည်။

ကရင်နီပြည်နယ်ရှိ ဒေသခံများသည် တိုက်ပွဲများကြားတွင် လက်နက်ကြီးထိမှာကို စိုးရိမ်စိတ်ဖြင့် နေထိုင်နေရပြီး ယခင်ကလို အေးချမ်းစွာ ပြန်လည် နေထိုင်နိုင်ရန် ဆန္ဒပြုနေကြသည်။

လက်ရှိမှာ တိုက်ပွဲ ပြင်းထန်စွာ ဖြစ်ပွားနေသောကြောင့် လွိုင်ကော်-ဒီးမော့ဆို၊ လွိုင်ကော်-မိုးဗြဲနှင့် လွိုင်ကော်- ဆီဆိုင်သွား လမ်းမကြီးများကို အသွားအလာ မပြုလုပ်ကြရန်နဲ့ နေအိမ်ပြင်ပထွက်ပြီး သွားလာခြင်းများ မလိုအပ်ပါက မပြလုပ်ကြပါရန်နှင့် လုံခြုံသော နေရာများတွင်သာ နေထိုင်ကြပါရန် KNDFက အထူးတိုက်တွန်းထားပါသည်။

အလားတူ သျှမ်း-ကယား(ကရင်နီ)ပြည် နယ်စပ်ဒေသ မိုးမြဲမြို့အတွင်းတွင် နေထိုင်နေသည့် ပြည်သူများ၊ စစ်ဘေးရှောင်များ ဘေးလွှတ်ရာသို့ အမြန်ဆုံးပြောင်းရွှေ့ပြောင်းရန် မိုးဗြဲ အခြေစိုက် MB1111 စစ်ဆင်ရေးမဟာမိတ်အင်အားစုများ က ယမန်နေ့ (နိုဝင်ဘာ ၁၃)ရက်တွင် အသိပေးကြေညာခဲ့သည်။

(နော်လာဝါ သတင်းပေးပို့သည်။)

Leave a Comments

- Advertisement -spot_img

Latest article