“၁၀၂၇ စစ်ဆင်ရေး” ဆင်နွှဲနေသော ညီနောင်မဟာမိတ်တပ်များ၊ ပြည်သူ့ကာကွယ်ရေးတပ် PDF များနှင့် စစ်ကောင်စီတပ်တို့ကို စစ်ရေးပဋိပက္ခအတွင်း ပြည်သူလူထုအား အကာအကွယ်ပေးရန် သျှမ်းလူထုနှင့် အရပ်ဖက် အဖွဲ့အစည်းများက ယနေ့ (နိုဝင်ဘာ ၁၁ ရက်)တွင် ထုတ်ပြန်လာသည်။
စစ်ရေးပဋိပက္ခတွင် ပါဝင်ကြသော နှစ်ဘက်လက်နက်ကိုင် တပ်ဖွဲ့အားလုံးသည် ပြည်သူလူထုအား ခြိမ်းခြောက်ခိုင်းစေခြင်း၊ အတင်းအဓမ္မ ဖမ်းဆီးသတ်ဖြတ်ခြင်း၊ လူသားတံတိုင်းကဲ့သို့ အသုံးပြုခြင်း၊ လူနေအိမ်နှင့် သာသနိက အဆောက်အဦများကို ပစ်ခတ်ခြင်း စသည့် လူ့အခွင့်အရေး ချိုးဖောက်ခြင်းများနှင့် အပြည်ပြည်ဆိုင်ရာ လူသားချင်း စာနာထောက်ထားမှု ဥပဒေ (IHL)ကို အကြိမ်ကြိမ် ချိုးဖောက်ခဲ့ကြကြောင်း ထုတ်ပြန်ချက်တွင် ဆိုထားသည်။
“တော်လှန်ရေးအင်အားစုကော စစ်ကောင်စီကော အပြန်အလှန် ချေမှုန်းကြတာက အဲ့ဒီမှာနေတဲ့ သျှမ်းပြည်သူလူထုကို အများကြီး ထိခိုက်တာ ရှိတယ်။ အခု ပြည်သူလူထုက အများကြီး ရွှေ့ပြောင်းနေရတယ်။ ရွှေ့ပြောင်းတဲ့အချိန်မှာ ကောင်းကောင်းမွန်မွန် မရွှေ့ပြောင်းရဘူးဆိုတာတွေ ရှိတယ်။ မြို့ထဲ ရွာထဲမှာ လက်နက်ကြီးတွေ ချတယ်။ မြို့ရွာတွေထဲကို တမင်ကြံရွယ်ချက်နဲ့ စစ်လာတိုက်နေကြတယ်”ဟု ထုတ်ပြန်ချက်တွင် ပါဝင်ထောက်ခံသည့် အဖွဲ့အစည်းများကိုယ်စား နန်းဆွဲ့ခမ်းက သျှမ်းသံတော်ဆင့်ကို ပြောသည်။
စစ်ရေးပဋိပက္ခတွင် ပါဝင်ကြသည့် လက်နက်ကိုင်တပ်ဖွဲ့ အားလုံးကလည်း လူထု၏ ဒုက္ခကို လျစ်လျူရှုနေကြပြီး ဒေသခံပြည်သူများစွာမှာ အသက်အန္တရာယ် စိုးရိမ်မှုကြောင့် နေရပ်စွန့်ခွာ ထွက်ပြေးနေကြရသည်ဟု ထုတ်ပြန်ချက်တွင် ဖော်ပြထားသည်။
“အခုလက်ရှိမှာ သျှမ်းပြည်သူလူထုတွေ တအားကြီးကို ကြုံတွေ့နေရတဲ့ ဘာအကာအကွယ်မှ မရှိဘဲ နေနေရတဲ့ အချိန်ကာလမှာ လူသားတံတိုင်းလိုမျိုး အသုံးချခံနေရတယ်ဆိုတာမျိုး ဖြစ်နေတယ်။ စစ်ဥပဒေ၊ အပြည်ပြည်ဆိုင်ရာ ဥပဒေတွေကို လုံးဝ မလိုက်နာတဲ့ ကဏ္ဍလေးတွေ ရှိနေတယ်။ အဲ့လိုမျိုး မဖြစ်စေချင်ဘူး။ အခုဆိုရင် စစ်ဘေးရှောင်တွေ သိန္နီမှာ ပိတ်မိနေတာတွေ ရှိတယ်။ တခြားနေရာ ဒေသမှာ ပိတ်မိနေတာ ရှိတယ်”ဟု နန်းဆွဲ့ခမ်းက သျှမ်းသံတော်ဆင့်ကို ဆက်ပြောသည်။
စစ်ပွဲအတွင်း ပိတ်မိနေသည့် ပြည်သူလူထုများ ဘေးကင်းစွာ စစ်ဘေးရှောင်နိုင်ရေးနှင့် လူသားချင်း စာနာထောက်ထားမှု အကူအညီပေးသည့် ပြည်သူများနှင့် အရပ်ဖက်အဖွဲ့အစည်းများကို လွတ်လပ်စွာ ကူညီခွင့်ပြုရန်လည်း ထုတ်ပြန်ချက်တွင် တိုက်တွန်းတောင်းဆိုထားသည်။
“စစ်ကောင်စီကို မလာနိုင်အောင် အမျိုးမျိုး ဖြတ်တောက်တာတွေရှိတယ်။ စစ်ဆင်ရေးအရ ဖြတ်တောက်တာက တစ်မျိုးပေါ့နော်။ ဒါပေမယ့် တကယ့်လူနေတဲ့ နေရာဒေသမှာ လုပ်နေတဲ့ ကိစ္စရပ်ကကျတော့ မလုပ်စေချင်ဘူး။ ပြည်သူတွေကြားမှာ တိုက်ပွဲမဖော်ဆောင်ပါနဲ့။ ပြည်သူလူထုတွေကို အကာအကွယ် ပေးပါ။ အခုဆိုရင် လူသားချင်း စာနာထောက်ထားမှု အကူအညီတွေ လုပ်နေတဲ့ အဖွဲ့တွေ လုပ်ရကိုင်ရ အရမ်းခက်နေတယ်၊ သူတို့တွေကိုလဲ အကာအကွယ်ပေးဖို့ လိုအပ်တယ်”ဟု စစ်ရှောင်ကူညီနေသူများ၏ အခက်အခဲကို နန်းဆွဲ့ခမ်းက သျှမ်းသံတော်ဆင့်ကို ပြောသည်။
ထို့အပြင် တော်လှန်ရေးခေါင်းစဉ်ကို အကြောင်းပြ၍ ပိုးလမ်းမစီမံကိန်း BRI မှ အကျိုးအမြတ် ရရှိစေရန် ကြိုတင်ကြံစည်၍ ထိန်းချုပ်နယ်မြေ လုယူခြင်း၊ လူမျိုးရေး ပဋိပက္ခဖြစ်စေရန် စည်းရုံးလှုံဆော်ကြခြင်းနှင့် နိုင်ငံရေး၊ စစ်ရေး မရိုးဖြောင့်မှုများ ပြုလုပ်လာခြင်းကြောင့် စိုးရိမ်ပူပန်မိကြောင်းလည်း ထုတ်ပြန်ချက်တွင် ရေးသားထားသည်။
“ထုတ်ပြန်ချက်တွေမှာ ဘယ်လိုပဲ ရေးနေ ရေးနေ၊ နိုင်ငံရေး စစ်ရေးအရ ဘယ်လိုပဲ ပြောနေပါစေ သူ့နောက်ကွယ်က အကျိုးစီးပွား ကြီးကြီးမားမားတွေ ရှိတယ်ဆိုတာကို မြင်သာနိုင်တယ်ပေါ့။ အဲ့ထဲက တစ်ခုကို ထောက်ပြပါဆိုရင် ပိုးလမ်းမကိစ္စ BRI က နံပါတ်တစ်လောက် ဖြစ်နိုင်တယ်ပေါ့။ အဲ့ဒီအတွက်ကြောင့် အခုကတည်းက ကြိုတင်ပြင်ဆင်ပြီးတော့ နယ်မြေချဲ့ထွင်ခြင်း ဖြစ်တယ်လို့ ပြည်သူလူထုအများစုက အဲ့လိုပဲ ယူဆကြပါတယ်”ဟု လက်ရှိဖော်ဆောင်နေသည့် စစ်ဆင်ရေးအပေါ် နန်းဆွဲ့ခမ်းက သျှမ်းသံတော်ဆင့်ကို ယခုကဲ့သို့ ပြန်လည်ဖြေကြားထားသည်။
ယခု သဘောထားထုတ်ပြန်ချက်ကို သျှမ်းပြည်တွင်းနှင့် ပြည်ပရှိ သံဃာတော်များ၊ ပြည်သူလူထုနှင့် အရပ်ဖက် အဖွဲ့အစည်းများ စုစုပေါင်း ၂၆ ဖွဲ့က ပူးပေါင်းထုတ်ပြန်ခြင်းဖြစ်သည်။
