မြန်မာ – တရုတ်နယ်စပ်ဒေသ နမ့်ခမ်းမြို့ရှိ မြို့လယ်ဘုရားတွင် ယနေ့ ( နိုဝင်ဘာလ ၆ ရက်) ည ၇ နာရီ ဝန်းကျင်မှစပြီး စစ်ကောင်စီတပ် နှင့် တအာင်း (ပလောင်) အမျိုးသားလွတ်မြောက်ရေး တပ်မတော် TNLA တို့ တိုက်ပွဲ ထပ်မံဖြစ်ပွားကာ လက်ရှိအချိန်ထိ ပစ်ခတ်နေသေးကြောင်း ဒေသခံတစ်ဦးက ပြောသည်။
“ ဒီညပိုင်း ၇ နာရီဝန်းကျင်လောက်က နမ့်ခမ်းမြို့လယ်ဘုရားမှာ ထပ်ပစ်နေကြတယ်။ အဲ့မှာက စစ်ကောင်စီတပ် နဲ့ TNLA တို့ ပစ်နေကြတာ။ သူတို့ပစ်နေကြတာတော့ ဒီနေ့ နေ့လယ်ကတည်းကစပြီး အခုထိပဲ “ ဟု ၎င်းက ပြောသည်။
ထို မြို့လယ်ဘုရားကျောင်းတွင် စစ်ကောင်စီတပ်ဖွဲ့မှ တပ်စွဲနေထိုင်ထားသောကြောင့် မြို့တွင်းလှုပ်ရှားနေသည့် (TNLA) တပ်ဖွဲ့နှင့် ထိတွေ့တိုက်ပွဲ ဖြစ်ပွားရကြောင်း ၎င်းက ဆက်ပြောသည်။
အလားတူ ယနေ့ (နိုဝင်ဘာလ ၆ ရက်) မွန်းလွဲ ၂ နာရီကျော်အချိန်တွင် နမ့်ခမ်းမြို့လယ်ဘုရားကျောင်းအတွင်း တပ်စွဲနေသော စစ်ကောင်စီတပ်ကိုလည်း TNLA တို့က ဝင်ရောက် ပိတ်ဆို့ တိုက်ခိုက်ခဲ့သည်ဟု TNLA က ထုတ်ပြန်ထားသည်။
အဆိုပါ တိုက်ခိုက်မှုအတွင်း ထိခိုက်သေဆုံးမှု အသေးစိတ်ကိုတော့ ရေးသားဖော်ပြထားခြင်း မရှိပေ။
ထို့အပြင် “ ၁၀၂၇ စစ်ဆင်ရေး “ ရက်သတ္တပတ် ကျော်ကာလအတွင်း နမ့်ခမ်းမြို့အဝင် စစ်ကောင်စီ စစ်ဆေးရေးဂိတ်၊ နမ့်ခမ်းမြို့ ရဲစခန်းအပါအဝင် ရွှေလီကြိုးတံတားရှိ တပ်စခန်း နှင့် ဟတ်ယိုင် (ဟဲယိုင်) တပ်စခန်း အများအပြားကို သိမ်းပိုက်နိုင်ခဲ့ကြောင်း TNLA က ထုတ်ပြန်ထားပါသည်။
Leave a Comments