သျှမ်းပြည်မြောက်ပိုင်း သိန္နီမြို့တွင် နိုဝင်ဘာ ၃ ရက်နေ့ မနက် ၉ နာရီအချိန်ခန့်မှစ၍ စစ်ကောင်စီ၏ ရဟတ်ယာဉ်လေးစင်းသည် ဝေဟင်မှနေ၍ ပြည်သူနေအိမ်များရှိရာ သိန္နီမြို့အတွင်းသို့ စက်သေနတ်များဖြင့် တစ်နေကုန်နီးပါး ပစ်ခတ်တိုက်ခိုက်ခဲ့ကြောင်း ဒေသခံတစ်ဉီးမှ သျှမ်းသံတော်ဆင့် သို့ ပြောကြားသည်။
အောက်တိုဘာ ၃ ရက် နံနက်ပိုင်းမှစ၍ စစ်ကောင်စီမှ သိန္နီမြို့အား ဖုန်းလိုင်းနှင့်အင်တာနက်လိုင်းများဖြတ်တောက်ထားစဉ် ယခုလို ရဟတ်ယာဉ်များဖြင့် ပစ်ခတ်တိုက်ခိုက်ခဲ့ခြင်း ဖြစ်ကြောင်း သိရသည်။
“ နှစ်စီးဆင်း နှစ်စီးတက်ပုံစံနဲ့ ရဟတ်ယာဉ်လေးစင်းက အလှည့်နဲ့ ဒီနေ့တစ်နေကုန် မြို့ထဲပတ်ပစ်နေတာ ၊ ရဟတ်ယာဉ်က လားရှိုးဘက်ကနေတက်လာတဲ့ လေယာဉ်တွေဖြစ်တယ်” ဟု သိန္နီမြို့နေ စိုင်းအောင် (အမည်လွှဲ) က သျှမ်းသံတော်ဆင့် ထံ ပြောကြားသည်။
သိန္နီမြို့နေပြည်သူတစ်ဉီး၏ နေအိမ်အား ကျဉ်ဆံများထိမှန်ပြီး ထော်လာဂျီတစ်စီး ၊ သုံးဘီးတစ်စီး မီးလောင်ပျက်စီးသွားသည်ဟု သိရပြီး အဆက်အသွယ်များပြတ်တောက်နေပါသဖြင့် ထိုထက်မက ထိခိုက်ဆုံးရှုံးမှုများ ရှိနိုင်ကြောင်း ၎င်းမှ ဆက်လက်ပြောကြားသည်။
သိန္နီရှိ စစ်ကောင်စီလက်အောက်ခံ စကခ (၁၆) နှင့် ရေပူဂိတ်စခန်း ကို ညီနောင်မဟာမိတ်တပ်ဖွဲ့များက တပြိုင်နက်တည်းတိုက်ခိုက်ရန် ကြိုးစားနေကြောင်း၊ စစ်ရှောင် ၃၀၀၀ ကျော်ရှိနေသည့် ကျောင်းခမ်းကျောင်းဘုန်းတော်ကြီးကျောင်းသည် သိန္နီမြို့ရှိ စစ်ကောင်စီလက်အောက်ခံ စကခ ( ၁၆ )၏ အနီးဝန်းကျင်တွင် တည်ရှိကြောင်း သိရသည်။
မဟာမိတ်တပ်များ စကခ (၁၆) အား ဝင်ရောက်တိုက်ခိုက်ပါက ကြားညှပ်မည်ကို စိုးရိမ်နေသော ပြည်သူများသည် အခြားတနေရာသို့ တိမ်းရှောင်ရန်ကြိုးစားသော်လည်း စစ်ဘေးရှောင်များအား စစ်ကောင်စီမှ ထွက်ခွင့်မပေးပဲ ပိတ်ပင်ထားသည်ဟု စုံစမ်းသိရှိရသည်။
အောက်တိုဘာ ၂၇ ရက်နေ့မှစ၍ မြောက်ပိုင်းညီနောင်မဟာမိတ်များဖြစ်သည့် ကိုးကန့် (MNTJP/MNDAA) ၊ တအာင်း (PSLF/TNLA) နဲ့ ရက္ခိုင့် (ULA/AA) တို့ ဉီးဆောင်ပြီး အာဏာသိမ်း စစ်ကောင်စီကို Operation 1027 အမည်ဖြင့် တိုက်ခိုက်နေသည့် စစ်ဆင်ရေးကြီးတွင် ဗမာပြည်သူ့လွှတ်မြှောက်ရေးတပ်မတော် BPLA နှင့် မန္တလေးပြည်သူ့ကာကွယ်ရေး MDY-PDF တို့လည်း ပူးပေါင်းပါဝင်တိုက်ခိုက်နေခြင်းဖြစ်ကြောင်း သိရသည်။
အောက်တိုဘာ ၂၇ ရက်မှစသည့် စစ်ဆင်ရေးကြီးသည် ရက်အနည်းငယ်အတွင်း သျှမ်းမြောက်ရှိ မြို့နယ် ၁၀ မြို့နယ်ထက်မနည်း စစ်မီးလျှံများ လျှင်လျှင်မြန်မြန် ကူးစက်ပျံ့နှံ့သွားခဲ့ပြီး စစ်ဘေးရှောင်ပြည်သူများလည်း သောင်းဂဏန်းအထိ တဟုန်ထိုး မြှင့်တက်ခဲ့ကြောင်း သိရှိရသည်။
