သျှမ်းပြည် ပန်ဆိုင်းမြို့ (ကြူဂုတ်) ရှိ ရဲစခန်းအနီး လက်နက်ကြီးကျပေါက်ကွဲမှုကြောင့် အမျိုးသား တစ် ဦးသေဆုံးပြီး၊ အမျိုးသမီး တစ်ဦးထိခိုက်ဒဏ်ရာရရှိခဲ့ကြောင်း ဒေသခံတစ်ဦးက ပြောသည်။
ပန်ဆိုင်းမြို့ (ကြူဂုတ်) ရပ်ကွက် ၈ အတွင်းရှိ စစ်ကောင်စီ ရဲစခန်းအနီး၌ ယနေ့ (နိုဝင်ဘာ ၁ ) ရက်တွင် လက်နက်ကြီး ကျရောက်ပေါက်ကွဲမှုကြောင့် အမျိုးသား တစ်ဦး သေဆုံးကာ အမျိုးသမီး တစ်ဦး ထိခိုက်ဒဏ်ရာရရှိခဲ့ကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
“ ဒီနေ့မနက်ပိုင်းက ရဲစခန်းနားမှာ လက်နက်ကြီးကျလို့ တစ်ယောက်ဆုံးသွားတယ်။ သေသွားတဲ့တစ်ယောက်က အမျိုးသားပါ။ အမျိုးသမီး တစ်ယောက်ကတော့ လက်နက်ကြီးကျည်စမှန်ထားတယ်။ ဒေသခံတစ်ယောက်ကလည်း သွေးတိုးနေတယ် “ ဟု ၎င်းဒေသခံတစ်ဦးက ပြောသည်။
လက်ရှိမှာ လက်နက်ကြီးကြောင့် ထိခိုက်ဒဏ်ရာရသူအပါအဝင် သွေးတိုးနေသော ပြည်သူတစ်ဦးကိုလည်း ဒေသလူမှုကူညီရေးအသင်းမှ သွားရောက်ကူညီခဲ့ပြီး မူဆယ်ဆေးရုံသို့ ပို့ဆောင်ပေးနေကြောင်း သိရသည်။
လက်ရှိသတင်းရေးသားချိန်ထိ တိုက်ပွဲသည် ပြင်းထန်နေဆဲဖြစ်သဖြင့် ထွက်ပြေးတိမ်းရှောင်ရန် ကြိုတင်ပြင်ဆင်ထားသည့် ဒေသခံများ တိုက်ပွဲကြား ပိတ်မိနေကြောင်း ဒေသခံတစ်ဦးက ဆက်ပြောသည်။
“ အခုတိုက်ပွဲပြင်းထန်နေသေးလို့ ထွက်ပြေးလို့မရသေးဘူး။ အိမ်ထဲမှာ ဝင်ပုန်းနေရသေးတယ်။ လက်နက်ကြီးသံတွေလည်း ဒုန်းဒုန်းဒိုင်းဒိုင်း ကြားနေရတယ် “ ဟု ၎င်းက ဆက်ပြောသည်။
လက်ရှိမှာ စစ်ကောင်စီဘက်မှ ဂျက်လေယာဥ်ဖြင့် ပျံဝဲနေပြီး၊ ပြည်သူများအနေဖြင့် လေကြောင်း ဗုံးကြဲမည်ကို စိုးရိမ်နေကြသည်။
အလားတူ ယမန်နေ့ (အောက်တိုဘာ ၃၁ ရက်) တွင်လည်း ပန်ဆိုင်းမြို့ (ကြူဂုတ်) ရှိ ရဲစခန်းကို ညီနောင်မဟာမိတ်တို့က ဝင်ရောက်တိုက်ခိုက်ခဲ့ကြောင်း သိရသည်။
လက်ရှိ သတင်းရေးသားချိန်အထိ ပန်ဆိုင်းမြို့ ရပ်ကွက် ၄ အနီးရှိ စစ်တပ်စခန်းကုန်းတွင် တိုက်ပွဲပြင်းထန်နေသည်။
