သျှမ်းပြည် သိန္နီမြို့နယ်ရှိ စစ်ဘေးရှောင်ဦးရေ ၃၀၀၀ ကျော်အတွက် စားနပ်ရိက္ခာနှင့် သောက်သုံးရေများ အရေးပေါ် လိုအပ်နေကြောင်း စုံစမ်းသိရသည်။

အောက်တိုဘာ ၂၇ ရက် မှ စတင်ဖြစ်ပွားသော ညီနောင်မဟာမိတ် ၃ ဖွဲ့နှင့် စစ်ကောင်စီတပ်တို့၏ “စစ်ဆင်ရေး-၁၀၂၇”ကြောင့် သိန္နီမြို့နယ်အတွင်း စစ်ဘေးရှောင်ဦးရေ ၃၀၀၀ ကျော်ရှိလာပြီး ၎င်းတို့မှာ စားနပ်ရိက္ခာနှင့် သောက်သုံးရေများ အရေးပေါ်လိုအပ်နေကြောင်း သိန္နီမြို့ စစ်ဘေးရှောင်ပြည်သူများက ပြောသည်။

“စားနပ်ရိက္ခာပိုင်းမှာဆိုရင်တော့ ထမင်းကတော့ ချက်ပေးတယ်။ စစ်ရှောင်ဦးရေက အရမ်းများပြီး လာလှူတဲ့ အလှူရှင်က မရှိဘူး၊ အကုန်လုံးကို မကျွေးနိုင်ဘူးပေါ့။ အိမ်နီးတဲ့လူတွေဆိုရင် အိမ်မှာ ဆန်ပြန်ယူပြီးတော့ ဘုန်းကြီးကျောင်းမှာ လာချက်စားရတာ။ သူများတွေ ထမင်းဝေတဲ့နေရာမှာ သွားယူပေမယ့်လည်း မလောက်ငှဘူးလေ”ဟု သိန္နီမြို့ ကျောင်းခမ်းဘုန်းကြီးကျောင်းတွင် စစ်ဘေးရှောင်နေသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

အောက်တိုဘာ ၂၇ ရက်မှ စတင်ပြီး ယနေ့ (အောက်တိုဘာ ၂၉ ရက်)အထိ သိန္နီမြို့ပေါ်ရှိ ကန်ဝိန်းကျောင်း၊ ကျောင်းဆိုင်၊ ဓာတ်တော်စေတီနှင့် ရွှေမြင်သာ ဘုန်းကြီးကျောင်းတို့တွင် စစ်ဘေးရှောင်ဦးရေ ၁၅၀၀ ခန့်၊ ကျောင်းခမ်း ဘုန်းကြီးကျောင်းတွင် စစ်ဘေးရှောင် ၁၇၀၀ ကျော်၊ စုစုပေါင်း စစ်ဘေးရှောင်ဦးရေ ၃၀၀၀ ကျော် ရောက်ရှိခိုလှုံနေကြသည်။

“စိုးရိမ်တာကတော့ အစားအသောက်ပဲ စိုးရိမ်တယ်။ လာလှူတဲ့သူ၊ လာကူညီတဲ့သူ မရှိဘူးလေ။ ဘာလို့လဲဆိုတော့ မြို့အဝင်အထွက်လဲ လုပ်လို့မရတော့ဘူး၊ တခြားသူတွေလဲ လာကြည့်လို့ မရတော့လေ။ ဒီမှာက ရေကို စက်နဲ့တင်ရတာ။ ရေကတော့ သောက်ရေသုံးရေအတွက် ချွေတာရတာပေါ့။ ရေသန့်ကတော့ မရှိတော့ဘူး၊ ပြတ်နေတယ်။ တချို့တွေဆို ရေသန့်တောင် မသောက်ကြရတော့ဘူး”ဟု သိန္နီမြို့ ကျောင်းခမ်းဘုန်းကြီးကျောင်းတွင် စစ်ဘေးရှောင်နေသည့် ၎င်းအမျိုးသမီးက သျှမ်းသံတော်ဆင့်ကို ဆက်ပြောသည်။

သိန္နီမြို့နယ်အတွင်း ယမန်နေ့ (အောက်တိုဘာ ၂၈ ရက်) ညပိုင်းမှ စ၍ ယနေ့ (အောက်တိုဘာ ၂၉ ရက်) အထိ မြောက်ပိုင်းမဟာမိတ် ၃ ဖွဲ့နှင့် စစ်ကောင်စီတပ်တို့သည် နှစ်ဘက်အပြန်အလှန် ထိတွေ့တိုက်ပွဲ ပြင်းထန်နေခြင်းကြောင့် ပြည်သူများမှာ တိုက်ပွဲအတွင်း ပိတ်မိနေသည်။

လက်ရှိ သိန္နီမြို့ပေါ်တွင် တိုက်ပွဲပြင်းထန်နေပြီး အချို့သော စစ်ဘေးရှောင်စခန်းများမှာ စစ်ကောင်စီတပ်နှင့် နီးကပ်နေသဖြင့် လုံခြုံရေးအခြေအနေကြောင့် မည်သူမှ အပြင်သို့ မထွက်ရဲကြဘဲ လက်နက်ကြီး ထိမှန်မှုကြောင့် သေဆုံးသူကိုပင် မြေမြှုပ်သင်္ဂြိုဟ်နိုင်ခြင်း မရှိသေးပါ။

စစ်ကောင်စီပစ်ခတ်လိုက်သည့် လက်နက်ကြီးထိမှန်မှုကြောင့် ယမန်နေ့ (အောက်တိုဘာ ၂၈ ရက်)က မန်မိုင်အုပ်စု ကျောင်းခမ်းရွာနေ ဦးဆံထွန်း ဆိုသူ အမျိုးသားတစ်ဦး သေဆုံးခဲ့ပြီး ယနေ့ (အောက်တိုဘာ ၂၉ ရက်)တွင် ကုန်းဟော်အုပ်စုမှ ဦးစိုင်းဖူး ဆိုသူ အမျိုးသားတစ်ဦးတို့ ထပ်မံသေဆုံးခဲ့သည်။

ယခုအချိန်ထိ သိန္နီမြို့သို့ အဝင်/အထွက် ပြုလုပ်နိုင်ခြင်းမရှိသေးဘဲ လမ်းပန်းဆက်သွယ်ရေး ပြတ်တောက်နေပြီး အောက်တိုဘာ ၂၆ ရက်မှစ၍ လက်ရှိအချိန်အထိ အင်တာနက်နှင့်ဖုန်းလိုင်းများ ဖြတ်တောက်ခံထားရကာ စစ်ကောင်စီလက်အောက်ခံ မိုင်တဲလ် လည်း မကြာခဏ ပြတ်တောက်နေသည်ဟု သိရသည်။